بۇگىن, 30 قىركۇيەك كۇنى قىزىلوردا وبلىستىق پروكۋراتۋراسىندا كەزەكتى القا ءماجىلىسى بولىپ ءوتتى. بۇل تۋرالى وبلىستىق پروكۋراتۋرانىڭ ءباسپاسوز قىزمەتى حابارلادى.
جيىندا وبلىستىق سالىق دەپارتامەنتى مەن ونىڭ اۋماقتىق باسقارمالارىنىڭ 2012 جىلعى جانە 2013 جىلدىڭ ءبىرىنشى جارتىسىنداعى جۇمىستارىنىڭ جايى تالقىلاندى. وندا ءبىرىنشى بولىپ وبلىستىق پروكۋراتۋرانىڭ باسقارما باستىعى عالىم ەدىگەەۆتىڭ بايانداماسى تىڭدالدى. بايانداماشى ءوزىنىڭ سوزىندە وسى ورايدا سالادا ورىن العان بىرقاتار كەملشىلىكتەردى اتاپ كورسەتتى. ايتالىق, بۇگىنگى كۇنى وبلىس ورتالىعىنداعى 776 جەر ۋچاسكەلەرىنىڭ يەلەرى وتكەن جىلعى جەر سالىعىن تولەمەگەنى بەلگىلى بولىپ وتىر. دۆيگاتەلدەرىنىڭ كولەمى 4000 تەكشە سانتيمەتردەن اساتىن 640 اۆتوكولىك يەلەرىنىڭ تۇرعىلىقتى مەكەن-جايلارى انىقتالماعاندىقتان, ولاردان 2008 جىلدان بەرى 17,8 ملن. تەڭگەنىڭ سالىعى بيۋدجەت كىرىسىنە كىرمەگەن ەكەن.
وتىرىستا سالىق ورگاندارى جۇرگىزگەن تەكسەرۋلەردىڭ ساپاسى دا قارالدى. وعان بايلانىستى ايتىلعان سىندار جەتكىلىكتى. مىسالى, تەكسەرۋمەن قامتىلعان مەرزىمدە سوتتاردا سالىق ورگاندارىنىڭ جالپى سوماسى 19,5 ملرد. تەڭگەنى قۇرايتىن 26 حابارلامانىڭ كۇشىن جويۋ جونىندە ازاماتتىق ىستەر قارالسا, ونىڭ 6,8 ملرد. تەڭگەنى قۇرايتىن 8 حابارلامانىڭ عانا كۇشى جويىلعان. كورسەتىلگەن ماسەلەلەرمەن قاتار, القادا سالىق ورگاندارىنىڭ قىزمەتىندەگى باسقا دا كەمشىلىكتەرى اتاپ ءوتىلىپ, مەملەكەتتىك بيۋدجەتتى تولتىرۋ, مەملەكەت مۇددەلەرىن قورعاۋ, كاسىپكەرلىك سۋبەكتىلەرىنىڭ قۇقىقتارىنىڭ بۇزىلۋىنا جول بەرمەۋ جانە قىزمەتتى وڭتايلاندىرۋ ماسەلەلەرى تالقىلاندى.
ەكىنشى ماسەلە وراي ءسوز العان وبلىستىق سالىق دەپارتەمەنتى باسشىسىنىڭ ورىنباسارى ادىلبەك بەكىشوۆ كەمشىلىكتەردى جويۋ باعىتىندا اتقارىلىپ وتىرعان جۇمىستارعا توقتالدى. القا وتىرىسى ناتيجەسىندە سالىق ورگاندارىنىڭ باسشىلارىنا سالىقتىق تولەمدەردىڭ تولىق ءتۇسۋىن قامتاماسىز ەتۋ, مەملەكەتتىك ورگاندارمەن ءوزارا بايلانىستى ارتتىرۋ, مىندەتتى زەينەتاقى تولەمدەرى بويىنشا قالىپتاسقان قارىزداردى وتەۋ, قىزمەتكەرلەردىڭ ءبىلىم دەڭگەيىن ارتتىرۋ سياقتى ۇسىنىمدار جاسالدى.
القا ءماجىلىسىن وبلىس پروكۋرورىنىڭ ورىنباسارى ناريمان ماقۇلبەكوۆ قورىتىندىلادى.
قۇرىش نۇرىمبەت.
