الەمدەگى ەڭ بايىرعى گازەتتەردىڭ ءبىرى – لوندوندا شىعاتىن «Lloyd’s List» ءوزىنىڭ قاعازدىق نۇسقاسىن جاۋىپ, ءبىرجولا ينتەرنەت-باسىلىم ۆەرسياسىنا كوشۋگە شەشىم قابىلدادى. بۇل تۋرالى «گازەتا.رۋ» سايتى حابارلادى.
بۇگىندە شىعىپ كەلە جاتقانىنا 280 جىل تولىپ وتىرعان كونە گازەت الداعى 20 جەلتوقساننان باستاپ قاعازدىق نۇسقاسىن شىعارۋدى ءبىرجولا توقتاتادى.
«Lloyd's List» - الەمدىك كەمە قاتىناسى سالاسى ءۇشىن جاڭالىقتاردىڭ, اناليتيكا مەن باسقا دا مالىمەتتەردىڭ قاينار كوزى - 2013 جىلدىڭ 20 جەلتوقسانىنان تولىق تسيفرلى ۆاريانتقا اۋىسادى», - دەلىنگەن رەداكتسيانىڭ ءوزى تاراتقان حابارلامادا.
باسىلىم باسشىلىعى حابارلاعانداي, ارنايى جۇرگىزىلگەن تەكسەرۋدىڭ قورىتىندىسىندا گازەتتىڭ قاعاز جۇزىندەگى نۇسقاسىن وقىرماندار اۋديتورياسىنىڭ 2 پايىزعا دا جەتپەيتىن بولىگىنىڭ عانا وقيتىنى انىقتالعان. سوڭعى جىلدارى جاھانداعى تەڭىز ساۋداسى جاڭالىقتارىنا ماماندانعان «Lloyd’s List» تسيفرلى جانە ءموبيلدى پلاتفورمالاردى ينۆەستيتسيالاپ كەلدى. الايدا, رەداكتسياداعىلار گازەتتىڭ قاعازدىق نۇسقاسىن شىعارۋدان باس تارتۋ باسشىلىققا بۇل باعىتتاعى جۇمىستاردى بەلسەندى تۇردە دامىتا تۇسۋگە جانە وقىرمانداردىڭ سۇرانىسىن نەعۇرلىم كوبىرەك قاناعاتتاندىرۋعا مۇمكىندىكتەر بەرەدى دەپ ەسەپتەيدى.
«ءبىز تسيفرلى پلاتفورمالاردىڭ اقپاراتپەن بارىنشا جان-جاقتى جانە ءتيىمدى الماسۋعا مۇمكىندىكتى مولىراق بەرەتىنىن مويىنداۋعا ءتيىسپىز», - دەلىنگەن رەداكتسياداعىلار مالىمدەمەسىندە. «ەگەر XVIII عاسىردا گازەت پاراقشالارى كوفەحانالاردىڭ قابىرعالارىنا ءىلىنىپ تۇرعان بولسا, - دەپ اتاپ وتەدى گازەت حابارلاماسى, - قازىر سول كوفەحانالاردا ءاربىر وقىرمان ءوز پلانشەتتەرى مەن سمارتفوندارى ارقىلى باسىلىمدى وقي الادى».
«ءبىزدىڭ گازەتىمىزدىڭ ءۇش ءجۇز جىلدىق تاريحى بار, ال تەڭىز ساۋداسى - كونسەرۆاتيۆتىك سالا, سوندىقتان دا ءبىز تاۋەكەلگە بارىپ وتىرعانىمىزدى تۇسىنەمىز جانە ونلاين-نۇسقاعا كوشۋگە اسا قاۋىپتەنبەيمىز», - دەيدى گازەتتىڭ باس رەداكتورى ريچارد ميد.
«Lloyd's List» گازەتى لوندوندا 1734 جىلدان بەرى شىعىپ كەلەدى. ونىڭ شىعارۋشىسى بريتانيالىق Informa كومپانياسى بوىلپ تابىلادى.
مۇرات ايتقوجا.
