بۇگىن پرەزيدەنت جانىنداعى مەملەكەتتىك باسقارۋ اكادەمياسىندا «ا» كورپۋسى مەملەكەتتىك قىزمەتشىلەرىنىڭ بىلىكتىلىگىن ارتتىرۋ سەمينارى وتكىزىلدى. ونىڭ اشىلۋىنا ارنالعان جيىندى پرەزيدەنت اكىمشىلىگى باسشىسىنىڭ ورىنباسارى عابيدوللا ءابدىراحىموۆ قىسقاشا ءسوز سويلەپ اشىپ, ءۇش كۇندىك مەرزىمگە بەلگىلەنىپ وتىرعان سەميناردىڭ ءمانى تۋرالى ايتىپ بەردى.
«ا» كورپۋسى مەملەكەتتىك قىزمەتشىلەرىنىڭ كاسىبي بىلىكتىلىگىن ارتتىرۋ ماقساتىمەن العاش رەت سەمينار وتكىزىلىپ وتىر. ەندىگى جەردە بۇل باعىتتاعى جۇمىس جىل سايىن شاقىرىلادى. ويتكەنى, ءبىلىمدى ۇزدىكسىز دامىتۋ - ءومىر تالابى. ال وركەنيەتكە بەت بۇرعان الپاۋىت ەلدەردىڭ ءبارى دە وسى ماسەلەدەن سىرت اينالىپ وتكەن ەمەس. سوندىقتان ءبىزدىڭ مەملەكەتكە سەمينار وتكىزۋگە كەلگەن شەت ەلدىڭ بەلگىلى ساراپشىلارى 3 ءمودۋلدى باعىت بويىنشا (كوشباسشىلىق, مەملەكەتتىك ورگاندارداعى اۋديت, جوبالاردى باسقارۋ) ءدارىس وقيدى. العاشقى ءدارىستى گەرمانياداعى شپايەر اكادەمياسىنىڭ دوكتورى دجۋليا فلەيشەر وتكىزەدى. -بۇگىنگى سەمينارعا مەملەكەتتىك ورگاندارداعى جاۋاپتى حاتشىلار قاتىسىپ وتىر. كەلەشەكتە بارلىق اۋماقتارداعى جەرگىلىكتى بيلىك وكىلدەرى ونلاين رەجىمىندە بىلىكتىلىكتەرىن جەتىلدىرەدى, -دەدى ع. ءابدىراحىموۆ وسى ورايدا.
مەملەكەتتىك قىزمەت ىستەرى اگەنتتىگىنىڭ توراعاسى ءاليحان بايمەنوۆ ءوز كەزەگىندە «ا» كورپۋسى مەملەكەتتىك قىزمەتشىلەرىنىڭ سانى 500-دەن اسىپ كەتكەنىن مالىمدەدى. سونداي-اق ول الداعى مەرزىمدە بارلىق مەملەكەتتىك قىزمەتشىلەردىڭ ءبىلىمىن جەتىلدىرۋگە ءمان بەرىلەتىنىن ەسكەرتىپ ءوتتى. بۇل ءوز كەزەگىندە جاڭا جوبالاردىڭ ءساتتى ىسكە اسىرىلۋىنا نەگىز قالايدى. سەميناردى وتكىزۋدەگى تۇپكى ماقسات دا وسى.
پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى بولاتبەك ءابدىراسىلوۆتىڭ مالىمدەۋىنشە, سەميناردى وتكىزۋشىلەردىڭ ءبىلىمى مەن بىلىكتىلىگى وتە جوعارى. ولار جاڭا باعدارلامالاردى وقىتۋ ءىسىن مەڭگەرگەن. سونىڭ ءبىرى توني بلەردىڭ كەڭەسشىلەر توبىندا بولعان ريچارد ماككلەلان. ول ەكىنشى كۇنى جوبالاردى باسقارۋ جونىنەن ءدارىس وقيدى. ال ءۇشىنشى كۇنى ساراپشى پەر جەۆار (فرانتسيا) كوشباسشىلىق تۋرالى ساباق وتكىزەدى.
ءامىرحان الماعانبەتوۆ.
