سونبەيدى ءۇمىتىمنىڭ شىراعى ءالى

جۇرگەندە اماندىعىن سۇراعالى,

جوعالتتىم,

جەر بەتىنەن ءبىر اعانى.

كونبەيدى

كوڭىل شىركىن ءولدى دەۋگە,

سونبەيدى ءۇمىتىمنىڭ شىراعى ءالى.

جۇرگەندە اماندىعىن سۇراعالى,

جوعالتتىم,

جەر بەتىنەن ءبىر اعانى.

كونبەيدى

كوڭىل شىركىن ءولدى دەۋگە,

سونبەيدى ءۇمىتىمنىڭ شىراعى ءالى.

جان اعا,

باسىمداعى باق-ىرىسىم,

جانىمنىڭ اتىڭا ساي سابىرىسىڭ.

كەۋدەمنەن ءتىرى جۇرسەڭ ءبىر وت سونبەس,

سەيىلمەي ساعان دەگەن ساعىنىشىم.

جان اعا!

تۇلعاڭ سەنىڭ ارىستانداي,

قارۋ عىپ

قالامىڭدى

قالىس قالماي.

ۇلتىنىڭ قامىن ويلاپ,

ۇرپاق ءۇشىن,

اتىلىپ كەتە بارعان

ارىستانداي.

جان اعا!

جازعانىڭا سۇيىنبەس كىم؟

ءوزى ەدىڭ

قارسى بۇتاق – يىلمەستىڭ.

تۇسپەي-اق تەمىر تورعا,

قازعان ورعا.

احاڭ مەن مىرجاقىپتىڭ كۇيىن كەشتىڭ,

احاڭ مەن مىرجاقىپتىڭ ءسوزىن سويلەپ.

كورگەنىڭ

كوز اشقاننان ءتوزىم-بەينەت.

ۇقساعان

قازداۋىستى اتاسىنا.

ويلاۋشى ەم,

ءبيدىڭ ءبىرى ءوزىڭ عوي – دەپ.

دۇنيە-اي,

وتكەن ءومىر كورگەن تۇستەي,

جىلقىداي كەشىپ ءجۇردىڭ بەرگەندى ىشپەي.

وتىردىڭ حان بولماي-اق,

بي بولماي-اق,

سولاردان ابىرويىڭ ءبىر كەم تۇسپەي.

ءسوزىڭنىڭ

مىڭ جىلدا دا,

ءمانى كەتپەي,

جاتا الماس, ناعىز تالانت

جانىپ وتپەي.

شاشتىڭ سەن نەسىبەڭدى وڭدى-سولدى,

باياعى –

شاقشاق اتاڭ جانىبەكتەي.

قاسىڭدا بولعاننان سوڭ قۇپتار ەلىڭ,

حالقىڭنىڭ قاسيەتىن ۇققان ەدىڭ.

تورعايدىڭ جاستارىنىڭ كوسەمى بوپ,

ءبىر كەزدە «اتوي» سالىپ شىققان ەدىڭ.

ءۇزىلىپ تۇرماعان سوڭ ەمەشەگى,

ەركىڭە جىبەرمەدى كەڭەس ەلى.

قولىڭا قالام الدىڭ سودان كەيىن,

ۇلتىمنىڭ وسى عوي دەپ كەلەشەگى.

سودان سوڭ تايعان جوقسىڭ العان بەتتەن,

اينىماي,

اتاڭ مىنگەن تارلانكوكتەن.

قۋدىرىپ قۋ تۇلكىدەي بۇلاڭ قاققان.

دۇنيە-اي,

الدامشى ەدى, جالعان نەتكەن!

كىسى ەدى,

تۋىسقا ادال, دوسقا بەرىك.

بويىنا جيعان ەمەس بوسقا جەلىك.

بەتىنە جان ادامنىڭ جەل بوپ تيمەي,

جەتكەنشە ءدال وسىناۋ جاسقا كەلىپ.

كىسى ەدى,

جانى جايساڭ, ازىلگە باي,

جونىنە جىعىلارسىڭ ءوزىڭ دە وڭاي.

سوزىنە تاڭ-تاماشا قالار ەدىڭ,

تابىلعان ويدا-جوقتا قازىناداي.

قاشاندا

قانجىعاسى سىي بوكتەرىپ,

جۇرەتىن كەۋدەسىنە كۇي كەپتەلىپ.

جەتتى ول –

سارىارقانىڭ ساۋىرىنا,

سۇيەگىن استاناعا سۇيرەپ كەلىپ.

بۇل ءومىر,

ءبىر بەس كۇندىك الدانىشتاي,

ساقتالسىن بار جيناعىڭ قولدان ۇشپاي.

ءبىر كۇنى

كەزى كەلسە اتىلارسىڭ.

جات ءازىر,

بۇعىپ جاتقان جولبارىستاي!

سەرىك تۇرعىنبەك ۇلى.