ەلورداداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قازاقستاننىڭ حالىق جازۋشىسى ءازىلحان نۇرشايىقوۆتىڭ 90 جىلدىعىنا ارنالعان «ءازىلحان نۇرشايىقوۆ جانە قازاقستاندىق جۋرناليستيكانىڭ وزەكتى ماسەلەلەرى» اتتى رەسپۋبليكالىق عىلىمي كونفەرەنتسيا بولىپ ءوتتى.
ەلورداداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قازاقستاننىڭ حالىق جازۋشىسى ءازىلحان نۇرشايىقوۆتىڭ 90 جىلدىعىنا ارنالعان «ءازىلحان نۇرشايىقوۆ جانە قازاقستاندىق جۋرناليستيكانىڭ وزەكتى ماسەلەلەرى» اتتى رەسپۋبليكالىق عىلىمي كونفەرەنتسيا بولىپ ءوتتى.
اتالمىش ءىس-شارا «باس رەداكتورلار كلۋبى» قوعامدىق بىرلەستىگىنىڭ ۇيىمداستىرۋىمەن جانە ل.ن.گۋميلەۆ اتىنداعى ەۋرازيالىق ۇلتتىق ۋنيۆەرسيتەتى مەن «بەيبىتشىلىك الەمى» حالىقارالىق قازاق شىعارماشىلىق بىرلەستىگىنىڭ قولداۋىمەن جۇزەگە اسىپ وتىر. ۇيىمداستىرىلىپ وتىرعان ءىس-شارانى ءومىرىنىڭ سوڭىنا دەيىن حالقىنا ادال قىزمەت ەتكەن اتپال ازاماتقا دەگەن زور قۇرمەت دەپ قابىلداعان ءجون. جانە دە بۇل باسقوسۋدى ءا.نۇرشايىقوۆتىڭ وتاندىق جۋرناليستيكانىڭ ورنىعۋىنا جانە قارقىندى دامۋىنا قوسقان ۇلەسىنە, ول كىسىنىڭ ەڭبەكقورلىعىنا, جوعارى كاسىبي بىلىكتىلىگىنە, ءوزىنىڭ ماماندىعىنا ادالدىعىنا بەرىلگەن ۇلكەن باعا دەپ بىلەمىز.
جازۋشى-جۋرناليست, قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى ءازىلحان نۇرشايىقوۆتىڭ قازاق ادەبيەتى مەن جۋرناليستيكاسىندا الار ورنى ەرەكشە. قالىڭ كوپشىلىككە ەتەنە جاقىن «ماحاببات, قىزىق مول جىلدار» مەن «اقيقات پەن اڭىز» روماندارى جازۋشى شىعارماشىلىعىنىڭ شىرقاۋ بيىگى سانالادى. ولمەس تۋىندىنىڭ العاشقىسىندا جاستاردىڭ قايناعان جاستىق ءومىرى تۋرالى باياندالىپ, بۇل رومان وقىرماننىڭ, اسىرەسە, جالىندى جاستاردىڭ ەرەكشە ءسۇيىپ وقيتىن كىتابىنا اينالدى. ال ەكىنشى رومان-ديلوگياسى اتى اڭىزعا اينالعان ۇلتىمىزدىڭ ۇلى تۇلعاسى, جاۋىنگەر جازۋشى باۋىرجان مومىش ۇلى تۋرالى. بۇل كىتاپ ۋكراين جانە چەح تىلدەرىنە اۋدارىلىپ جاريالانسا, بىرقاتار شىعارمالارى قىرعىز, وزبەك, تاجىك, مولداۆان, تاتار, ياكۋت تىلدەرىنە تارجىمالانعان.
وسىنداي ەل قۇرمەتىنە بولەنگەن, ارتىنا ولمەس مۇرا, جۋرناليستيكا سالاسىندا كەيىنگى ۇرپاققا ونەگە بولارلىق وزىندىك ءىزىن قالدىرعان اياۋلى ازاماتقا ارنالعان رەسپۋبليكالىق عىلىمي كونفەرەنتسيا ءازىلحان نۇرشايىقوۆتىڭ ءومىرى مەن شىعارماشىلىعىن كەڭىنەن باياندايتىن دەرەكتى فيلم كورسەتىلىمىمەن باستالدى.
باسقوسۋدى «باس رەداكتورلار كلۋبى» قوعامدىق بىرلەستىگىنىڭ پرەزيدەنتى كەنجەبولات جولدىباي اشىپ, بۇل يگى شارانىڭ ءمان-ماڭىزىنا كەڭىنەن توقتالىپ وتسە, مادەنيەت جانە اقپارات مينيسترلىگى اقپارات جانە مۇراعات كوميتەتى توراعاسىنىڭ ورىنباسارى ارىستانبەك نۇرماحانوۆ كونفەرەنتسياعا ساتتىلىك تىلەدى. ودان سوڭ ءسوز العان زاڭ عىلىمدارىنىڭ دوكتورى بەكەت تۇرعاراەۆ, «بەيبىتشىلىك الەمى» حالىقارالىق قازاق شىعارماشىلىق بىرلەستىگىنىڭ پرەزيدەنتى ابەن نۇرمانوۆ, بەلگىلى قالامگەر سۇلتان ورازالى, «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆ اتاقتى قالامگەر ءازىلحان نۇرشايىقوۆ جونىندە ەستەلىكتەر ايتىپ, ءوز وي-تولعامدارىن ورتاعا سالدى. تىلەك-لەبىزدەردەن سوڭ كونفەرەنتسيادا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى ديحان قامزابەك, جۋرناليستيكا ماسەلەلەرىن زەرتتەۋ ينستيتۋتىنىڭ ديرەكتورى نامازالى وماشەۆ, بەلگىلى قالامگەر قايسار ءالىم, قازاقستان ۇلتتىق جاراتىلىستانۋ عىلىمدارى اكادەمياسىنىڭ ۆيتسە-پرەزيدەنتى كارىمبەك قۇرماناليەۆ, «تۇگەل مەديا» بىرلەستىگىنىڭ باسشىسى سادىبەك تۇگەل, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنىڭ دەكانى قايرات ساق كۇن تارتىبىندەگى ماسەلەلەرگە وراي ارنايى تاقىرىپتاردا باياندامالار جاسادى.
سونداي-اق, شارا باسىندا بەلگىلى قالامگەر قايسار ءالىم قۇراستىرعان «قۇداي-اۋ, قايدا سول جىلدار؟!» ەستەلىكتەر, ەسسەلەر كىتابىنىڭ تۇساۋى كەسىلىپ, ءبىراز قالامگەر-قايراتكەرلەر «باس رەداكتورلار كلۋبى» قوعامدىق بىرلەستىگى مەن «بەيبىتشىلىك الەمى» حالىقارالىق قازاق شىعارماشىلىق بىرلەستىگى تاراپىنان ماراپاتتالدى.
بەرىك سادىر,
«ەگەمەن قازاقستان».
