«حالىقارالىق تۇركى اكادەمياسىنىڭ ۇيىتقى بولۋىمەن ابايدىڭ ولەڭ-جىرلارى مەن پوەمالارى قىرعىز تىلىندە جارىق كوردى. باۋىرلاس ەلدىڭ بايتاعى بىشكەكتە جارىق كورگەن بۇل باسىلىمنىڭ اكادەميالىق العاشقى جيناق ەكەنىن ايتا كەتۋ كەرەك.
بۇعان دەيىن الاتاۋدىڭ ارجاعىندا ابايدى قىرعىزشا سويلەتكەن اقىندار از بولماعان. ۇلى اقىندى العاش قىرعىزدىڭ كلاسسيك اقىنى جومارت بوكونباەۆ 1930 جىلداردىڭ سوڭىندا قوتارعان كورىنەدى. سودان كەيىن اكادەميك, ەڭبەك ەرى, اتاقتى االى توقومباەۆ باستاپ, قىرعىز ەلىنىڭ باتىرلارى سوورونباي جۋسۋەۆ, ءسۇيىنباي ەراليەۆ, ەل اقىندارى جاليل سادىكوۆ, سۇيەرقۇل تۋرگۋنباەۆ, ومار سۇلتانوۆ, جولدوشباي ابدىكالىكوۆ, تۇگەلباي قازاقوۆ, كەريمبەك كادىراكۋنوۆ سىندى اقىندار جالعاعان اۋدارماشىلار ءتىزىمىن قازاق پەن قىرعىزعا دانەكەر بولىپ جۇرگەن Perizat Almaz Kyzy قارىنداسىمىزعا دەيىن اكەلۋگە بولادى», - دەپ جازدى دارحان قىدىرالى Facebook پاراقشاسىندا.
ونىڭ ايتۋىنشا, جاڭا اكادەميالىق جيناقتا جوعارىدا اتالعان اتاقتى اقىنداردىڭ ەڭ تاڭداۋلى اۋدارمالارى تاڭداپ الىنىپ, ولارعا تۇسىنىكتەمە جازىلىپ, ويشىل اقىننىڭ جىرلارى كەزىندە مۇحتار اۋەزوۆ تۇزگەن حرونولوگيالىق جۇيەمەن بەرىلدى.
«ماشاقاتتى جۇمىستى ۇيلەستىرىپ, بۇكىل اۋدارمالاردى سالىستىرىپ, ولارعا عىلىمي تۇسىنىكتەر جازعان بەلگىلى قىرعىز اقىنى كەرىمبەك قادىراقۋنوۆ پەن اكادەميا قىزمەتكەرى, پروفەسسور قادىرالى قوڭقاباەۆ اعاما العىس ايتامىن! ۇلى ابايدىڭ ادەبي مۇراسى بىرلىگى جاراسقان باۋىرلاس ەلدىڭ رۋحاني بايلانىستارىن بەكەمدەي بەرسىن!», - دەپ جازدى دارحان قىدىرالى.
