مەملەكەت باسشىسى قاسىم-جومارت توقاەۆتىڭ 2020 جىلعى 31 ناۋرىزداعى مالىمدەمەسىندە كاسىپكەرلىك سەكتوردى قولداۋعا باعىتتالعان بىرقاتار مىندەتتەر بەلگىلەنگەن. سونىڭ ىشىندە پرەزيدەنت اگروونەركاسىپتىك كەشەندى ۇزدىكسىز قامتاماسىز ەتۋ, شاعىن جانە ورتا بيزنەستى نەسيەلەۋدى ارتتىرۋ قاجەتتىلىگىن ەرەكشە اتاپ وتكەن بولاتىن.
اۋىل شارۋاشىلىعىن قارجىلاي قولداۋ قورى ءوزىنىڭ نەسيە ونىمدەرى ارقىلى اۋىلدىقتاردى مال شارۋاشىلىعىن دامىتۋ باعىتتارى بويىنشا قارجىلاندىرىپ كەلەدى. قور بيىل مال شارۋاشلىعىمەن اينالىسامىن دەۋشىلەرگە 30 ملن تەڭگەگە دەيىنگى سومادا نەسيە بەرۋدى جوسپارلاپ وتىر. ءىرى قارا, قوي جانە تۇيە شارۋاشىلىعىن دامىتۋعا بەرىلەتىن نەسيەنىڭ مەرزىمى 10 جىلعا دەيىن. نەسيەنىڭ جىلدىق سىياقى مولشەرى 16%, بىراق ونىڭ 10 پروتسەنتىن مەملەكەت سۋبسيديالايدى. ياعني, شارۋا نەسيەنى 6 پروتسەنتپەن تولەيدى. نەگىزگى بورىشتى وتەۋ بويىنشا ەكى جىلعا دەيىن, ال, سىياقىنى وتەۋ بويىنشا ءبىر جىلعا دەيىنگى جەڭىلدىك مەرزىمى قاراستىرىلعان. نەگىزگى بورىش پەن سىياقىنى اي سايىن, توقسان سايىن نەمەسە جارتى جىلدا ءبىر تولەپ تۇرۋ مۇمكىندىگى دە جاسالعان. نەسيە جەكە كاسىپكەرلىكتەرگە, شارۋا قوجالىقتارىنا جانە فەرمەرلىك شارۋاشىلىقتارعا باعىتتالعان.
مال شارۋاشىلىعىن دامىتۋدى جوسپارلاعان كاسىپكەرگە قويىلاتىن بىرقاتار تالاپ تا بار. ەڭ الدىمەن ارينە, ءىرى قارا ۇستايتىن قوراسى مەن جايىلىمدىق جەرى بولۋى قاجەت جانە ءتولىن بورداقىلاۋ الاڭىنا تاپسىرۋ جونىندە كەلىسىمشارت جاساسۋى ءتيىس. قازىرگى ۋاقىتتا شارۋالاردىڭ بارلىعى قولدا بار مالىن اسىلداندىرىپ, ساپاسىن ارتتىرۋ باعىتىندا جۇمىس جۇرگىزىپ جاتىر. قوردان نەسيە العان كاسىپكەر دە مالىن اسىلداندىرۋى ءتيىس. ويتكەنى, اسىل تۇقىمدى مالدىڭ ۇتىمدى تۇستارى كوپ. ەگەر, بىردەن اسىل تۇقىمدى سيىر ساتىپ الىناتىن بولسا 25% جەكە مەنشىك م ۇلىكتى جانە 75% ساتىپ الىناتىن مالدى كەپىلگە قويۋ ارقىلى قارجىلاندىرۋ ماسەلەسى دە قاراستىرىلادى.
قوي شارۋاشىلىعىن دامىتامىن دەگەندەردىڭ دە قورا-جايى مەن جايىلىمدىق جەرى بولۋى ءتيىس. توقتىلارىن ەت وڭدەيتىن كاسىپورىنعا تاپسىرۋ كەلىسىمشارتىن جاساسادى. تۇيە شارۋاشىلىعى بويىنشا دا تۇيە ءسۇتىن, ءجۇنىن قايتا وڭدەۋ كاسىپورنىنا تاپسىرۋ جونىندە كەلىسىم جاسالۋى كەرەك.
ەڭ باستىسى ۇمىتكەردىڭ نەسيە تاريحى جاقسى بولعانى ابزال. كەپىلگە قوياتىن مۇلكى بولۋى شارت. بۇدان بولەك, بيۋدجەتتىك جانە قارجى ۇيىمدارىنىڭ الدىندا مەرزىمى وتكەن بەرەشەگى بولماۋى ءتيىس.
بارلىق وبلىس ورتالىقتارىندا, نۇر-سۇلتان, الماتى جانە شىمكەنت قالالارىندا قوردىڭ فيليالدارى جۇمىس ىستەيدى.
«اۋىل شارۋاشىلىعىن قارجىلاي قولداۋ قورى» اق - «قازاگرو» ۇلتتىق باسقارۋشى حولدينگىنىڭ قۇرامىنا كىرەتىن مامانداندىرىلعان قارجى-نەسيەلىك ۇيىم. قوردىڭ نەگىزگى مىندەتى – اگروونەركاسىپ كەشەنى سالاسىنداعى باسىمدىققا يە سالالار بويىنشا اۋىل كاسىپكەرلىگىن قارجىلاندىرۋ.
