سومالي ۇكىمەتىنىڭ باسشىسى ابدي فاراح شيردون «اش-شاباب» قارۋلى توبىمەن كۇرەسۋ ءۇشىن الەمدىك قاۋىمداستىقتى كومەككە شاقىردى. بۇل تۋرالى ريا «نوۆوستي» اگەنتتىگى حابارلادى.
قازىرگى تاڭدا بىرىككەن ۇلتتار ۇيىمى قاۋىپسىزدىك كەڭەسىنىڭ شەشىمىمەن 18 مىڭداي اسكەريلەر مەن پوليتسەيلەر سومالي رەسپۋبليكاسىنىڭ اۋماعىنداعى قىزمەت ەتۋدە. بۇلاردىڭ باسىم بولىگى كەنيا, ۋگاندا, بۋرۋندي مەملەكەتتەرىنىڭ ساربازدارى.
سونداي-اق, 2011 جىلى كەنيا اسكەرى كەلىسىم نەگىزىندە سومالي اۋماعىنا ەنگىزىلگەن بولاتىن. دارمەنسىز ەلدىڭ بيلىگى وسىنشاما كومەك قولى سوزىلعانىمەن «اش-شاباب» قارۋلى توبىن تۇنشىقتىرا الماي وتىر.
تاعى ءبىر ايتا كەتەر ءجايت, «اش-شاباب» قارۋلى جاساعىنىڭ وكىلدەرى نايروبيدەگى «Westgate» ساۋدا ورتالىعىندا سالعان ىلاڭدارىن سومالي اۋماعىنداعى كەنيا اسكەرىنىڭ ارەكەتتەرىنە قايتارعان جاۋابىمىز دەپ مالىمدەدى.
جولدىباي بازار.
