رەسەي فەدەراتسياسىنان اكەلىنەتىن بەنزين كولەمىنىڭ قىسقارۋىنا بايلانىستى قازاقستان نارىعىندا بەنزين باعاسى كۇرت قىمباتتاپ كەتۋى مۇمكىن.
بۇل تۋرالى جۋرناليستەرگە بەرگەن سۇحباتىندا مۇناي جانە گاز ءمينيسترى ۇزاقباي قارابالين مالىمدەدى.
«قازاقستان رەسەيدەن جوعارى وكتاندى بەنزيندى بەلگىلى ءبىر مولشەردە ۇدايى يمپورتتاپ وتىراتىنى بەلگىلى. سەبەبى, ءبىزدىڭ زاۋىتتار ىشكى نارىقتى بەنزيننىڭ مۇنداي تۇرلەرىمەن قامتاماسىز ەتە المايدى», - دەدى ۇ.قارابالين.
ونىڭ ايتۋىنشا, رەسەيدەن جىلىنا 800-900 مىڭ توننا بەنزين يمپورتتالادى.
«قازان ايىندا ومبى, ۋفا قالالارىنداعى ءىرى زاۋىتتار جوسپارلى تۇردەگى جوندەۋ جۇمىستارىنان وتەدى دەپ جوسپارلانۋدا. وسىعان وراي, رەسەيدەن اكەلىنەتىن مۇناي ونىمدەرىنىڭ مولشەرى ازايادى. بۇل – ۋاقىتشا قۇبىلىس, دەسەك تە, بۇل جايت قازاقستانداعى بەنزين باعاسىنا اسەر ەتەتىن بولادى», - دەدى مينيستر.
ۇزاقباي قارابالين قازاقستان نارىعىندا بەنزيننىڭ باعاسى ءوسۋى مۇمكىن دەگەن بولجام ايتتى.
«قازىر سىزگە ناقتى ايتا المايمىن, بىراق 5-7 پايىزدان اسپايدى دەپ بولجاپ وتىرمىز», - دەپ ويىن تۇيىندەدى ول.
ساكەن مايلىباي.
