وسكەمەن قالاسىنىڭ اكىمى تەمىربەك قاسىمجانوۆتىڭ اتى قازىر قىزمەتتىك كولىگىنىڭ ءۇش بىردەي ماشينەگە بارىپ سوققانىمەن شىعىپ جاتىر.
وسكەمەن قالاسىنىڭ اكىمى تەمىربەك قاسىمجانوۆتىڭ اتى قازىر قىزمەتتىك كولىگىنىڭ ءۇش بىردەي ماشينەگە بارىپ سوققانىمەن شىعىپ جاتىر.
وقيعا قالانىڭ قاق ورتاسىنداعى كوشەلەردىڭ بىرىندە ورىن العان. مۇنىڭ انىق-قانىعىن تەكسەرگەن جول پوليتسياسى قىزمەتكەرلەرى مەن شەنەۋنىكتەر بۇل جونىندەگى اقپاردىڭ سىرتقا تاراپ كەتپەۋىنە قاتتى مۇددەلىلىك تانىتىپ, ءبارىن جىلى جاۋىپ قويا سالۋعا ءبىراز تىرىسقاندارىمەن, ولارىنان ەشتەڭە شىقپاپتى. مۇنداعى نەگىزگى ءۋاج بۇل كەزدە اكىمنىڭ دەمالىستا جۇرگەنى بولعانعا ۇقسايدى. الايدا, باستىعىنىڭ جوقتىعىن پايدالانىپ, قالادا ەمىن-ەركىن سايرانداپ جۇرگەن جۇرگىزۋشىنىڭ ەرەجەنى قالاي بۇزعانىن كوزدەرىمەن كورگەن جۇرت كوپ كىدىرتپەي, ونىڭ جاساعان جول اپاتىن بەينەلەيتىن سۋرەتتەردى عالامتورعا سالعان دا جىبەرگەن.
ايتا كەتۋ كەرەك, وبلىس اكىمىنىڭ سوزىمەن ايتقاندا, ءبىر كەزدەرى ت.قاسىمجانوۆ «قالانى باسقارۋعا لايىقتى ەمەس» دەپ تابىلىپ, ورىنتاعىن بوساتقانىمەن, ءبىرشاما ۋاقىتتان كەيىن ورنىنا قايتا كەلگەن كورىنەدى. دەگەنمەن, ءوزى دەمالىستا جۇرگەن قالا اكىمىنىڭ جوندەۋدەگى كولىگى قالاي جول اپاتىنا تاپ بولا قالعانى قاتتى تاڭعالدىرىپ وتىر.
ال اكىمنىڭ قىزمەتتىك كولىگىن رۇقساتسىز ءمىنىپ كەتكەنىمەن قويماي, ءۇش بىردەي كولىكتى جاپىرىپ وتكەن جۇرگىزۋشى سول جەردە بىردەن ماشينەنىڭ مەملەكەتتىك ءنومىرىن الىپ تاستاپتى. بىراق, تۇرعىندار كولىكتىڭ قالا اكىمىنە تيەسىلى ەكەنىن جازباي تانىعان. سەبەبى, قالادا بۇل تەكتەس باسقا كولىك جوق.
وسى وقيعادان كەيىن جۇرگىزۋشى جۇمىستان بوساتىلعان. اكىمدىك قىزمەتكەرلەرى بولسا, جوندەۋگە كەلمەيتىن «مەرسەدەستىڭ» ورنىنا جاڭا كولىك ىزدەۋگە كىرىسىپ كەتىپتى.
«ون جىلدىق تاجىريبەسى بار اكىم اپپاراتىنىڭ جۇرگىزۋشىسى جوندەۋدە تۇرعان كولىكتى جەكە قولدانىسىنا ءوز ەركىمەن العان. ەكى كۇن وتكەن سوڭ بولعان اپاتتا اششى سۋ ىشكەنىن مويىنداپ وتىر», – دەيدى وسكەمەن قالاسى اكىمدىگىنىڭ ءباسپاسوز حاتشىسى لاريسا پولوموشنوۆا.
قۇرىش نۇرىمبەت.
