قازىرگى ۋاقىتتا ءتۇرلى پورتالدار مەن مەملەكەتتىك ورگانداردىڭ كابينەتتەرى ازاماتتى سايكەستەندىرۋ جانە قىزمەتتەردى الۋعا بەرىلگەن وتىنىشتەرگە قول قويۋ ءۇشىن ەلەكتروندىق تسيفرلىق قولتاڭبانى (ەتسق) تالاپ ەتەدى. ولاردىڭ ىشىندە – سالىق تولەۋشىنىڭ كابينەتى, سوت كابينەتى, مەملەكەتتىك ساتىپ الۋ پورتالى جانە باسقالارى بار. QR-كود ارقىلى اۆتوريزاتسيالاۋ سەرۆيسىن ەنگىزۋ اتالعان رەسۋرستاردى پايدالانۋ پروتسەسىن جەڭىلدەتە تۇسپەك.
«قازىرگى كەزدە ءبارى سمارتفون پايدالانادى. ازاماتتار eGovmobile قوسىمشاسىن بارلىق مەملەكەتتىك سايتتار مەن پورتالداردى اشاتىن كىلت رەتىندە قولدانا الار ەدى. ول ءۇشىن قوسىمشا ارقىلى QR-كودتى سكانەرلەۋ جەتكىلىكتى. ەتسق-نى كومپيۋتەردە پايدالانۋ ءۇشىن قوسىمشا سوفت ورناتۋدىڭ دا قاجەتى بولمايدى», - دەپ اتاپ ءوتتى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترى اسقار جۇماعاليەۆ.
اۆتوريزاتسيالاۋ پروتسەسىنىڭ وسىنداي بالاماسى ەلەكتروندىق ۇكىمەت پورتالىندا ىسكە اسىرىلدى. ازامات «QR-كود بويىنشا اۆتوريزاتسيالانۋدى» تاڭداپ, QR-كودتى eGovmobile قوسىمشاسى ارقىلى سكانەرلەۋى كەرەك. قوسىمشاعا ەنگىزىلمەگەن مەملەكەتتىك قىزمەتتەردى اتالعان پرينتسيپ بويىنشا الداعى ماۋسىم ايىندا الۋعا بولادى.
«ازاماتتاردىڭ مەملەكەتتىك قىزمەتتەردى وڭاي ءارى ىڭعايلى الۋى ءۇشىن وتىنىمدەرگە قول قويۋ مەحانيزمىن QR-كودتى eGovmobile قوسىمشاسى ارقىلى وقۋ پروتسەسىن جۇزەگە اسىرۋ جۇمىستارى جۇرگىزىلۋدە», - دەدى «ۇات» اق باسقارما توراعاسى اسەت تۇرىسوۆ.
مەملەكەتتىك قىزمەتتەردى اۆتوماتتاندىرۋ جانە وڭتايلاندىرۋ جونىندەگى ۆەدومستۆوارالىق كوميسسيانىڭ وتىرىسى تۇراقتى تۇردە, ايىنا بىرنەشە رەت وتكىزىلەتىنىن ايتىپ وتكەن ءجون. وسى كەزدەسۋلەر شەڭبەرىندە مەملەكەتتىك ورگاندار كورسەتىلەتىن قىزمەتتەردى اۆتوماتتاندىرۋ جانە وڭتايلاندىرۋ ءۇشىن جاڭا بيزنەس-پروتسەستەردى تالقىلاپ, پىسىقتايدى.
