مەملەكەت باسشىسى نۇرسۇلتان نازارباەۆ “قازاگرو” ۇلتتىق حولدينگىنىڭ باسقارما توراعاسى اسىلجان مامىتبەكوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
ا.مامىتبەكوۆ پرەزيدەنتتى حولدينگتىڭ 2009 جىلعى جۇمىستارىنىڭ قورىتىندىلارى مەن اعىمداعى جىلعا بەلگىلەنگەن مىندەتتەرى تۋرالى حاباردار ەتتى. اتاپ ايتقاندا, مال شارۋاشىلىعى سالاسى ءوندىرىسىنىڭ ونىمدەرىن جانە قازاقستاننان ەكسپورتقا شىعارىلاتىن ەتتىڭ مولشەرىن ارتتىرۋ جونىندەگى ماسەلەلەر تالقىلاندى. – مەملەكەت باسشىسى اگرارلىق ازىق-ت ۇلىك رىنوگىن ودان ءارى تۇراقتاندىرۋ, يمپورتقا تاۋەلدىلىكتى ازايتۋ, اۋىل شارۋاشىلىعىنىڭ ەكسپورتتىق الەۋەتىن ۇلعايتۋ, سونىمەن قاتار اگرارلىق سەكتورداعى ەڭبەك ونىمدىلىگىن ارتتىرۋ بويىنشا ناقتى تاپسىرمالار بەردى, – دەدى ا.مامىتبەكوۆ. * * * مەملەكەت باسشىسى نۇرسۇلتان نازارباەۆ قازاقستان رەسپۋبليكاسى پرەزيدەنتتىك مادەنيەت ورتالىعىنىڭ ديرەكتورى مىرزاتاي جولداسبەكوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. م.جولداسبەكوۆ ورتالىقتىڭ اعىمداعى جۇمىسى, سونىڭ ىشىندە قازىرگى قازاقستاننىڭ تاريحىنا قاتىستى كىتاپتار شىعارۋ ءىسى تۋرالى اڭگىمەلەدى. – مەن بۇگىن پرەزيدەنتكە العاشقى 14 تومدى تابىس ەتتىم, ولار “تاۋەلسىزدىك شەجىرەسى”, “ەلمەن سىرلاسۋ”, “ەل باسشىسى جولدادى – ەلى قولدادى”, “الەم قازاقستان تۋرالى, الەم پرەزيدەنت تۋرالى” اتتى ءتورت سەريادان تۇرادى. ءبىز بيىل وسى جوبانىڭ تاعى دا 19 تومىن باسپاعا دايىندايمىز, جالپى 2015 جىلعا قاراي بارلىعى 138 توم شىعارۋدى جوسپارلاپ وتىرمىز. بۇل باسىلىمدار جاس ۇرپاقتى وتانىمىزدىڭ تاريحىمەن تانىستىرادى, ولاردىڭ بويىنا وتانشىلدىق رۋحىن سىڭىرۋگە سەپتىگىن تيگىزەدى. پرەزيدەنت ءبىزدىڭ بۇل ءىسىمىزدى قۇپتادى, – دەدى م.جولداسبەكوۆ. * * * مەملەكەت باسشىسى نۇرسۇلتان نازارباەۆ ءبىلىم جانە عىلىم ءمينيسترى جانسەيىت تۇيمەباەۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. ج.تۇيمەباەۆ پرەزيدەنتتى ءبىلىم بەرۋ جۇيەسىنىڭ بۇگىنگى جاي-كۇيىنەن جانە كەلەشەك دامۋ باعىتىنان حاباردار ەتتى. قازاقستان بارشاعا ءبىلىم بەرۋ ءىسىن دامىتۋ يندەكسى بويىنشا 2009 جىلى الەمنىڭ 129 ەلى ىشىنەن ءبىرىنشى ورىن الدى جانە ورتالىق ازيادان بولون ۇدەرىسىنە تۇڭعىش قوسىلعان مەملەكەتكە اينالدى. كەزدەسۋ بارىسىندا ءبىلىم بەرۋدى دامىتۋدىڭ 2020 جىلعا دەيىنگى مەملەكەتتىك باعدارلاماسىنىڭ جوباسى, قازاقستان رەسپۋبليكاسى پارلامەنتىنىڭ قاراۋىنداعى “عىلىم تۋرالى” جاڭا زاڭ جوباسى, سونداي-اق استانادا بيىل 26-27 ءساۋىر كۇندەرى وتەتىن تمد ەلدەرى مۇعالىمدەرى مەن پەداگوگتارىنىڭ ءبىرىنشى سەزىن وتكىزۋگە دايىندىق بارىسى جونىندە اڭگىمە بولدى. – سوڭعى 19 جىلدا مۇنداي دەڭگەيدەگى سەزد ءبىرىنشى رەت قازاقستاندا وتەيىن دەپ وتىر. بۇل ءبىزدىڭ تمد كولەمىندەگى زور بەدەلىمىزدىڭ ءبىر بەلگىسى. مەن بۇعان قوسا تۇركى اكادەمياسىن قۇرۋ ۇدەرىسى تۋرالى باياندادىم. اكادەميانىڭ اشىلۋى تۇرىك رەسپۋبليكاسىنىڭ پرەزيدەنتى ابدوللا گۇلدىڭ بيىلعى مامىر ايىندا بولاتىن قازاقستانعا ساپارى ۋاقىتىنا جوسپارلانىپ وتىر, – دەدى ج.تۇيمەباەۆ. مينيستر ءبىلىم بەرۋ سالاسىنا ەرەكشە كوڭىل اۋدارىلىپ وتىرعانى, بيىلعى 1 ساۋىردەن باستاپ جالاقى مەن شاكىرتاقىنىڭ 25 پايىزعا ۇلعايتىلعانى ءۇشىن بارلىق مۇعالىمدەر, پەداگوگتار جانە ستۋدەنتتەر قاۋىمى اتىنان مەملەكەت باسشىسىنا العىس ايتتى.
