قازاقستان • 15 مامىر، 2020

قازاقستان وزبەكستانداعى ساردوبا سۋ قويماسىنا تەحنيكالىق اۋديت جاساۋعا قاتىسادى

28 رەت كورسەتىلدى

شىمكەنت قالاسىندا قازاقستان رەسپۋبليكاسى ەكولوگيا، گەولوگيا جəنە تابيعي رەسۋرستار مينيسترلىگى باسشىسى ماعزۇم مىرزاعاليەۆ وزبەكستان رەسپۋبليكاسى سۋ شارۋاشىلىعى ءمينيسترى شاۆكات حامراەۆپەن كەزدەستى. بۇل تۋرالى ەكولوگيا، گەولوگيا جəنە تابيعي رەسۋرستار مينيسترلىگىنىڭ ءباسپاسوز قىزمەتى حابارلادى.

قوس مەملەكەت باسشىلارى ق.توقاەۆ پەن ش.ميرزيەەۆتىڭ جۋىرداعى كەلىسسوزدەرى كەزىندە قول جەتكىزىلگەن ۋاعدالاستىقتى ىسكە اسىرۋ ءۇشىن تاراپتار قازاقستان مەن وزبەكستان اراسىنداعى سۋ شارۋاشىلىعىنداعى كەڭ اۋقىمدى ماڭىزدى مəسەلەلەردى تالقىلادى.

كەزدەسۋدىڭ باستى تاقىرىبىنىڭ ءبىرى - ساردوبا سۋ قويماسىنىڭ تاعدىرى.

قازاقستاننىڭ ەكولوگيا مينيسترلىگى باسشىسى م. مىرزاعاليەۆ كەزدەسۋ كەزىندە دامبانىڭ جارىلۋى وزبەكستان مەن قازاقستان اۋماعىنداعى سۋ باسقان ايماقتا تۇراتىن حالىققا زور ەكونوميكالىق زارداپ كەلتىرگەنىن اتاپ ءوتتى.

«كەلىسسوزدەر بارىسىندا ءبىز حالىقارالىق ۇيىمداردىڭ، قازاقستاندىق ساراپشىلاردىڭ كومەگىمەن ساردوبا سۋ قويماسىنا تەحنيكالىق اۋديت جاساۋ تۋرالى بىرلەسكەن شەشىم قابىلدادىق. ونىڭ قورىتىندىسىندا بۇل نىساننىڭ ودان ارعى تاعدىرى تۋرالى شەشىم شىعارىلادى»، - دەدى قازاقستاننىڭ ەكولوگيا مينيسترلىگى باسشىسى.

تاراپتار ترانسشەكارالىق سۋ نىساندارىن بىرلەسە باسقارۋ، پايدالانۋ جəنە قورعاۋ تۋرالى ۇكىمەتارالىق كەلىسىمدى əزىرلەپ، وعان قول قويۋعا ۋاعدالاستى.

كەزدەسۋ بارىسىندا تاراپتار اعىمداعى جىلعى 15 ماۋسىمعا دەيىن سۋ بايلانىسى سالاسىنداعى ىنتىماقتاستىق مəسەلەسى جونىندەگى جول كارتاسىن əزىرلەپ، بەكىتۋگە كەلىستى.

«نەگىزگى سۋ شارۋاشىلىعى جەرلەرىندەگى سۋ جينالۋدى مونيتورينگىلەۋ جəنە باقىلاۋ ءۇشىن بىرلەسكەن جۇمىس توبىن ۇيىمداستىرۋ تۋرالى شەشىمگە قول جەتكىزىلدى»، - دەدى م.مىرزاعاليەۆ.

كەزدەسۋگە قاتىسۋشىلار سىرداريا وزەنى سۋ رەسۋرستارىنىڭ سۋ شارۋاشىلىق بالانسى بويىنشا بىرلەسكەن جۇمىستار جۇرگىزۋگە كەلىسىپ، قاراداريا مەن شىرشىق وزەندەرىنەن سۋ الۋ ءليميتى مəسەلەسىن ودان ارعى تالقىلاۋدىڭ مۇمكىندىگىن قاراستىردى.

سوڭعى جاڭالىقتار

تۇركىستان جاسىل قالاعا اينالۋدا

وڭتۇستىك قازاقستان • كەشە

ۇقساس جاڭالىقتار