پارلامەنت • 14 مامىر، 2020

سەنات بەيبىت جينالىستار تۋرالى زاڭ جوبالارىن تۇزەتۋلەرىمەن ماجىلىسكە قايتاردى

25 رەت كورسەتىلدى

بۇگىن سەناتتىڭ جالپى وتىرىسىندا دەپۋتاتتار بىرقاتار زاڭ جوبالارىن تالقىلادى. وتىرىستى اشقان سەنات توراعاسى ماۋلەن اشىمباەۆ ەلىمىزدە مەملەكەت باسشىسىنىڭ باستاماسىمەن داعدارىسقا قارسى كەشەندى شارالار جۇزەگە اسىرىلىپ جاتقانىن اتاپ ءوتتى. سونداي-اق، ازاماتتار مەن بيزنەسكە ايتارلىقتاي قولداۋ كورسەتىلگەنىنە نازار اۋداردى. الداعى ۋاقىتتا دا بۇل جۇمىستار جالعاسىن تاپپاق. سونىڭ اياسىندا حالىقتىڭ دەنساۋلىعىن ساقتاۋعا، ولاردىڭ ءال-اۋقاتىن ارتتىرۋعا، كاسىپكەرلەردى قولداۋعا جانە ءبىلىم بەرۋ مەن عىلىم جۇيەسىن رەفورمالاۋعا باسا ءمان بەرىلەدى. بۇل تۋرالى سەناتتىڭ ءباسپاسوز قىزمەتى حابارلادى.

ماۋلەن اشىمباەۆتىڭ ايتۋىنشا، سەنات بۇل جاعدايدا ءوز جۇمىسىن ءتيىمدى ۇيىمداستىرۋعا ءتيىس. سول ارقىلى ەلباسى ساياساتىنىڭ ساباقتاستىعىن ساقتاي وتىرىپ، مەملەكەت باسشىسى ۇسىنعان دامۋ ستراتەگياسىن ىسكە اسىرۋدى زاڭنامالىق تۇرعىدا قامتاماسىز ەتۋى قاجەت.

وتىرىستا سەناتورلار «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسىن قارادى. قۇجاتتىڭ نەگىزگى مىندەتى – ازاماتتاردىڭ بەيبىت جانە قارۋسىز جينالۋ، جينالىس، ميتينگ پەن دەمونستراتسيا، شەرۋ مەن پيكەتتەۋ وتكىزۋ بويىنشا كونستيتۋتسيالىق قۇقىعىن ىسكە اسىرۋ، سونداي-اق، ولاردىڭ وتكىزىلۋى مۇمكىن ارنايى ورىندارىن ايقىنداۋ.

مەملەكەت باسشىسىنىڭ تاپسىرماسى بويىنشا جوبادا بەيبىت جينالىستار وتكىزۋ ءۇشىن حابارلاما ءتارتىبىن ەنگىزۋ كوزدەلگەنىن دە اتاپ وتكەن ءجون.

دەپۋتاتتار زاڭ جوباسىن تالقىلاۋ بارىسىندا بىرقاتار تۇجىرىمدامالىق وزگەرىستەر ۇسىندى. ماسەلەن، نۇر-سۇلتان، الماتى، شىمكەنت قالالارىندا جانە وبلىس ورتالىقتارىندا پيكەتتەر، جينالىستار مەن ميتينگىلەر ءۇشىن ارنايى ورىندار سانى قالانىڭ ءاربىر اۋدانىنىڭ ورتالىق بولىگىندە كەمىندە ۇشەۋ بولۋ كەرەكتىگى ايتىلدى. سونىمەن قاتار بەيبىت جينالىستاردى ۇيىمداستىرۋشىنىڭ وعان قاتىسۋشىلاردان ءوز بەتىن بۇركەمەۋدى، ونىڭ ىشىندە بەت-الپەتىن تانۋعا كەدەرگى كەلتىرەتىن كيىم-كەشەكتى نەمەسە وزگە دە زاتتاردى پايدالانباۋدى تالاپ ەتۋ جونىندەگى مىندەتىن الىپ تاستاۋ ۇسىنىلدى. بۇل رەتتە ۇيىمداستىرۋشىلار مەن قاتىسۋشىلاردىڭ دەنساۋلىق ساقتاۋعا ارنالعان جەكە قورعانىش قۇرالدارىن پايدالانۋ جونىندەگى قۇقىعىن بەكىتۋ ماسەلەسى نازارعا الىنعان. سەناتورلاردىڭ وسى جانە باسقا دا تۇزەتۋلەرى قۇجاتتىڭ قورىتىندى ماتىنىندە كورىنىس تاپتى.

ماۋلەن اشىمباەۆ ازاماتتاردىڭ كونستيتۋتسيالىق قۇقىقتارىن قامتاماسىز ەتۋ ءۇشىن قابىلداناتىن زاڭ جوباسىنىڭ ماڭىزىن اتاپ ءوتتى.

– قارالعان زاڭ جوبالارى ەلىمىزدىڭ ودان ءارى دامۋىنا وڭ اسەر ەتەدى. ۇسىنىلىپ وتىرعان قۇجاتتار قازاقستانداعى ساياسي ۇدەرىستەردى ودان ءارى دامىتۋ، ادام قۇقىقتارىن قامتاماسىز ەتۋ مەن دەموكراتيالاندىرۋ جولىنداعى ماڭىزدى قادام دەپ ايتۋعا تولىق نەگىز بار، – دەدى سەنات توراعاسى.

جاڭا زاڭ جوباسىندا بەيبىت جينالىستاردى ۇيىمداستىرۋشىلاردىڭ، ولارعا قاتىسۋشىلاردىڭ مارتەبەسى، قۇقىقتارى مەن مىندەتتەرى بەكىتىلدى جانە مەملەكەتتىك ورگانداردىڭ قۇزىرەتى بەلگىلەندى. سونداي-اق، بەيبىت جينالىستاردى وتكىزۋگە رۇقسات بەرمەيتىن نەگىزدەردىڭ بارىنشا تولىق تىزبەسى ناقتىلاندى، ءارى باس تارتۋ دالەلدى جانە نەگىزدى بولۋى ءتيىس ەكەنى ايقىندالدى.

ودان باسقا، بەيبىت جينالىستارعا قاتىسۋشىنىڭ (قاتىسۋشىلاردىڭ) زاڭناما تالاپتارىن بۇزۋى بەيبىت جينالىستاردى توقتاتۋعا نەگىز بولا المايتىنى تۋرالى ەرەجە ۇسىنىلدى.

وتىرىستا بەيبىت جينالىستاردى ۇيىمداستىرۋ جانە وتكىزۋ ءتارتىبى ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى ىلەسپە قۇجات تا قارالدى.

تالقىلاۋ قورىتىندىسى بويىنشا سەنات زاڭ جوبالارىن ەنگىزىلگەن وزگەرىستەرمەن جانە تولىقتىرۋلارمەن ماجىلىسكە جىبەرۋ تۋرالى شەشىم قابىلدادى.

سونىمەن قاتار دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە توتەنشە جاعداي ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قابىلدادى. قۇجات ازاماتتاردىڭ قاۋىپسىزدىگىن قامتاماسىز ەتۋ جانە كونستيتۋتسيالىق قۇرىلىستى قورعاۋ ءۇشىن توتەنشە جاعداي كەزەڭىندە شۇعىل شارا قابىلداۋ ماقساتىندا ازىرلەنگەن بولاتىن. قوسىمشا بايانداما جاساعان تولەۋبەك مۇقاشەۆتىڭ ايتۋىنشا، زاڭ جوباسىن ىسكە اسىرۋ داعدارىسقا قارسى ءتيىمدى ساياسات ارقىلى بارلىق مەملەكەتتىك جۇيەنىڭ الەۋمەتتىك-ەكونوميكالىق تۇراقتىلىعى مەن ورنىقتىلىعىن جانە ۇلتتىق قاۋىپسىزدىكتى قامتاماسىز ەتۋگە مۇمكىندىك بەرەدى.

بۇدان باسقا سەناتورلار زاڭناماعا جۇمىلدىرۋ دايىندىعى مەن جۇمىلدىرۋ ماسەلەلەرى بويىنشا تۇزەتۋلەر ەنگىزۋ تۋرالى زاڭدى قابىلدادى. قۇجاتتىڭ ماقساتى – جۇمىلدىرۋ دايىندىعى مەن جۇمىلدىرۋ جۇيەسىن، سونداي-اق مەملەكەتتىك ماتەريالدىق رەزەرۆتى قالىپتاستىرۋ، ساقتاۋ جانە پايدالانۋ بولىگىندە ازاماتتىق قورعاۋدىڭ مەملەكەتتىك جۇيەسىن جەتىلدىرۋ. سەناتور تالعات مۇساباەۆ زاڭ جوباسىن قابىلداۋ ادامداردىڭ جۇمىلدىرۋ دايىندىعى سالاسىنداعى مىندەتتەرىن ورىنداماعانى ءۇشىن جاۋاپكەرشىلىگىن ارتتىرۋعا، جۇمىلدىرۋ دايىندىعى مەن جۇمىلدىرۋ بويىنشا ءىس-شارالاردىڭ ۇيىمداستىرىلۋىنا جانە وتكىزىلۋىنە تۇراقتى باقىلاۋ ورناتۋعا، مەملەكەتتىك ماتەريالدىق رەزەرۆتەگى ماتەريالدىق رەسۋرستاردىڭ قورىن ساقتاۋعا جانە ۋاقتىلى جاڭارتۋعا مۇمكىندىك بەرەتىنىن اتاپ ءوتتى.

سونداي-اق، جوعارعى پالاتا دەپۋتاتتارى مامانداندىرىلعان مەكەمەلەردىڭ ارتىقشىلىقتارى مەن يممۋنيتەتتەرى تۋرالى كونۆەنتسيانى دا راتيفيكاتسيالادى. قازاقستان اۋماعىندا مامانداندىرىلعان مەكەمەلەردىڭ قىزمەتى ءۇشىن كونۆەنتسيادا كورسەتىلگەن ەرەكشە جاعدايلاردى جاساۋ راتيفيكاتسيالاۋدىڭ نەگىزگى مىندەتى بولىپ تابىلادى. اتاپ ايتقاندا، مۇنداي مەكەمەلەر، ولاردىڭ اكتيۆتەرى، كىرىستەرى جانە باسقا دا مەنشىگى بارلىق تىكەلەي سالىقتاردان بوساتىلادى، ال لاۋازىمدى ادامدار بىرىككەن ۇلتتار ۇيىمىنىڭ لاۋازىمدى ادامدارىنا تيەسىلى جەڭىلدىكتەردى پايدالانادى. قوسىمشا بايانداماشى تولەۋبەك مۇقاشەۆتىڭ ايتۋىنشا، زاڭ جوباسىن قابىلداۋ ەلىمىزدە مامانداندىرىلعان مەكەمەلەردىڭ ەكىجاقتى جانە كوپجاقتى ىنتىماقتاستىقتى كەڭەيتۋگە جانە تەرەڭدەتۋگە، ونىڭ ۇيلەستىرىلۋى مەن تيىمدىلىگىن ارتتىرۋعا ىقپال ەتەتىن قىزمەتىنە قولايلى جاعداي جاسايدى.

سوڭعى جاڭالىقتار

تۇركىستان جاسىل قالاعا اينالۋدا

وڭتۇستىك قازاقستان • كەشە

ۇقساس جاڭالىقتار