بۇرناعى كۇنى الماتى قالاسى المالى اۋداندىق سوتى بىلتىرعى جىلعى تامىز ايىندا ىلە الاتاۋى ۇلتتىق تابيعي ساياباعى اۋماعىندا جاسالعان جاپپاي كىسى ولىمىنە باستى كۇدىكتى سانالىپ وتىرعان سايان قايىروۆتىڭ ۇستىنەن سوت پروتسەسىن باستادى.
بۇرناعى كۇنى الماتى قالاسى المالى اۋداندىق سوتى بىلتىرعى جىلعى تامىز ايىندا ىلە الاتاۋى ۇلتتىق تابيعي ساياباعى اۋماعىندا جاسالعان جاپپاي كىسى ولىمىنە باستى كۇدىكتى سانالىپ وتىرعان سايان قايىروۆتىڭ ۇستىنەن سوت پروتسەسىن باستادى.
سوتتا الدىمەن ۇلتتىق ساياباقتاعى 12 ادامنىڭ ولىمىنە بايلانىستى الدىن الا جابىق رەجىمدەگى تىڭداۋ بولىپ ءوتتى. ادۆوكات جاندوس بۇلحايىردىڭ سوزىنە قاراعاندا, ونىڭ قورعاۋىنداعى ازاماتقا شەكارانى زاڭسىز كەسىپ ءوتىپ, تەررورلىق ۇيىمنىڭ جۇمىسىنا جانە ىلە الاتاۋى ۇلتتىق ساياباعىنداعى قاندى قىرعىنعا قاتىسقان, دەگەن ايىپ تاعىلىپ وتىرعان كورىنەدى. قورعاۋشى سونداي-اق, وعان كىسى ءولتىردى دەگەن ناقتىلى ايىپ تاعىلا قويماعانىن ايتادى. سەبەبى, ول قاندى قاساپ جاسالىپ جاتقان كەزدە قىرعىزستاندا بولعان سياقتى.
ايىپتالۋشى سايان قايىروۆتىڭ زايىبى شىنار بيسەنباەۆا دا وسىلاي دەيدى. ول كۇيەۋىنىڭ بۇل وقيعادان ءبىر اي بۇرىن قىرعىزستان جاققا ساپارلاپ كەتكەنىن جەتكىزدى. ول سونداي-اق, ءوزىنىڭ سول ۋاقىتتارى سودىرلار ۇلتتىق پارككە قۇرعان لاگەردە بولعانىن دا جوققا شىعارمايدى. ايتۋى بويىنشا, مۇندا ودان باسقا تاعى بىرنەشە ايەل مەن بالالار بولعان. كەيىن ورمانشى مەن ونىڭ جاقىندارى تاپ وسى لاگەردىڭ ۇستىنەن تۇسەدى. ولار سول ءۇشىن دە ولتىرىلگەن بولىپ شىقتى.
وسى تۇستا ءبىر ايتا كەتەتىن جايت, سودىرلار قىرعىننان سوڭ وزدەرىمەن بىرگە 10 جاسار يسلام دەگەن بالانى الا كەتەدى. ال باعاناشىل اۋىلى تۇسىندا بولعان ارنايى وپەراتسيانىڭ كەزىندە بۇل بالاقاي قازا تابادى. جوعارىدا اتالعان شىنار بيسەنباەۆا كۇيەۋى سايان قاماۋعا الىنعاننان كەيىن ونىڭ ءوز ۇلى ەكەنىن ايتىپ جۇرگەن كورىنەدى. مۇنىڭ قانشالىقتى راس-وتىرىك ەكەنى ازىرگە انىقتالعان جوق. سەبەبى, جۋرناليستەردىڭ تىكەلەي قويعان سۇراقتارىنا ايەل جاۋاپ بەرۋدەن باس تارتىپ وتىر.
ەسكە سالا كەتەيىك, بۇل قايعىلى وقيعا 2012 جىلعى 13 تامىز كۇنى الماتىعا تاياۋ ماڭداعى اقساي شاتقالىندا ورىن الدى. وسى جەردە قىلمىسكەرلەر 12 ادامدى باۋىزداپ ءولتىردى. ولاردىڭ اراسىندا ءوزىنىڭ براكونەرلەرگە ىمىراسىزدىعىمەن ەرەكشە كوزگە ءتۇسىپ كەلگەن ەگەر پانايوت زاحاروپۋلو, ونىڭ ايەلى مەن قىزمەتتەس دوستارى بولعان. ال ورمانشىنىڭ ۇلى يگور اياق استىنان جوق بولىپ كەتكەن. ونىڭ كەيىنگى تاعدىرى جونىندە ءالى كۇنگە دەيىن ناقتى دەرەك جوق.
قۇقىق قورعاۋ ورگاندارىنىڭ مالىمەتتەرى بويىنشا, باتىس قازاقستان وبلىسىنىڭ قازتالوۆ اۋدانىنداعى بوستاندىق اۋىلىنىڭ تۋماسى بولىپ تابىلاتىن 1975 جىلعى سايان قايىروۆ – ۇيىمداسقان قىلمىسكەرلەر توبى مەن ىلە الاتاۋى ساياباعىندا بولعان قاندى قىرعىن تۋرالى جان-جاقتى ايتىپ بەرە الاتىن بىردەن-ءبىر ادام. ول قازاقستانداعى راديكالدى ءدىني اعىمنىڭ بەلسەندى مۇشەسى بولىپ تابىلادى. ساياباقتاعى وقيعادان كەيىن وعان بىردەن ىزدەۋ جاريالانعان. ۇلتتىق قاۋىپسىزدىك قىزمەتكەرلەرى س.قايىروۆتى بيىلعى 16 مامىردا قىرعىزستاننىڭ شۋ وبلىسىندا پاتەر جالداپ جاتقان جەرىندە قولعا ءتۇسىردى. ۇستالعان كەزىندە ونىڭ قالتاسىنان قازاقستان ازاماتتىعىن بىلدىرەتىن قۇجاتتان بولەك, قىرعىزستاننىڭ ەكى پاسپورتى شىققان. وسى ءىس بويىنشا ەكىنشى ءبىر كۇدىكتى ادام – جامبىل وبلىسىنداعى جۋالى اۋدانىنىڭ تۇرعىنى, 1978 جىلعى زاۋىربەك بوتاباەۆ ءالى ىزدەستىرىلىپ جاتىر.
مۇرات ايتقوجا.
