ەكونوميكا • 14 مامىر، 2020

قولما-قول تولەۋ ازايادى

15 رەت كورسەتىلدى

مەملەكەتتىك بيۋدجەتتىڭ تۇسىمدەرىنىڭ ەڭ باستى كوزى – سالىق. بۇعان ەكونوميكالىق تەو­ريا تۇرعىسىنان قارايتىن بولساق، سالىق جۇيەسىن لاففەردىڭ قيسىق سىزىعى ارقىلى جۇيەلەندىرۋگە بولادى.

ايتالىق سالىقتى ودان ءارى كوبەيتۋ ەڭبەك پەن كاسىپكەرلىك ىنتاسىن تومەندەتىپ، جوعارى كولەمدى سالىق سالۋ مەملەكەتتىك تابىستى نولگە تەڭەيدى. سەبەبى ەشكىم دە تەگىن جۇمىس ىستەگىسى كەلمەيتىنى بەلگىلى. بۇل ءتاسىل تاجىربيە جۇزىندە وتە كۇردەلى. سودان دا بولار، قازاقستان الەمدىك پراكتيكادان ءسال-ءپال وقشاۋ كەلەدى.

ەگەر پرەزيدەنت قاسىم-جومارت توقاەۆ ايتقانداي، جەكە كىرىس سالىعىنىڭ ۇدەمەلى ولشەمىن ەنگىزۋ مəسەلەسى پىسىقتالسا، ەڭبەكاقىنى قولما-قول تولەۋ دە ازايار ەدى. ەڭبەكاقى تولەۋدىڭ مەيلىنشە كەڭ تاراعان «كولەڭكەلى ءتاسىلى» دە ازايۋى مۇمكىن.

مەملەكەتكە ەڭ ءتيىمدىسى – حالىقتى سالىق تولەۋگە ىنتالاندىرۋ. ول ءۇشىن وسىنداي شارا­لاردىڭ كەڭىنەن ناسيحاتتالعانى ءجون. ماسە­لەن، كەز كەلگەن تۇرعىننىڭ ەكونوميكالىق ساۋات­تىلىعى جوعارى دەڭگەيدە ەمەس. قازىرگى كۇردەلى كەزەڭدە ولار بارىنشا سالىقتان جالتارۋعا تىرىسادى. مۇنداي جاعدايدا جەكە تۇلعا كاسىبىن وركەندەتۋ ءۇشىن بەرىلەتىن ارنايى نەسيەدەن قاعىلۋى ىقتيمال.

تاعى ءبىر ايتا كەتەتىن جايت، توتەنشە جاعداي كەزىندە بەرىلگەن قارجىلاي əلەۋمەتتىك كومەكتى العان ازاماتتاردىڭ 40 پايىزدان استامى بىرىڭعاي جيىنتىق تولەمدى العاش رەت تولەگەنى انىقتالدى. بۇل مەملەكەتتىك كومەككە مۇقتاج جانداردىڭ كوپتىگىن عانا بايقاتپايدى، ۇلكەن جاۋاپكەرشىلىكتىڭ جوقتىعىنان دا حابار بەرەتىندەي. سول سەبەپتى ولاردى ەكونوميكاعا بارىنشا تارتۋ قاجەت. قيىن-قىستاۋ كەزەڭدە مەملەكەتتىك قولداۋعا زاڭدى جۇمىس ىستەگەن، ءتيىستى سالىعىن تولەگەندەر عانا قول جەتكىزە الاتىن بولادى.

قازىرگى تاڭدا ەلىمىزدە ءوزىن ءوزى ەڭبەكپەن قامتىعان 1،5 ميلليون ادام بار. وعان كولەڭكەلى ەكونوميكادا جۇرگەندەردى قوسىڭىز. ولارعا مەملەكەتكە سالىق تولەمەگەن الدەقايدا ءتيىمدى. سوندىقتان پرەزيدەنت ق.توقاەۆتىڭ تاراپىنان ۇسىنىلعان əلەۋمەتتىك əدىلدىك ءۇشىن جالاقى مەن باسقا دا كىرىس تۇرلەرىنە قاتىستى جەكە تابىس سالىعىنىڭ مولشەرىن تومەندەتۋ ماسەلەنى شەشۋدىڭ وڭتايلى جولى دەپ ويلايمىن. سالىق كولەمى قىسقارسا، ەڭبەككە قۇلشىنىس ارتاتىنى انىق.

 

جانگەلدى شىمشىقوۆ،

ەكونوميكا عىلىمدارىنىڭ كانديداتى

 

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار