«ەرىم دەيتىن ەل بولماسا, ەلىم دەيتىن ەر قايدان بولسىن» دەيدى دانا حالقىمىز. جىل ساناپ ساربازداردىڭ الەۋەتى دە, جاۋىنگەرلىك دايارلىعى دا ارتىپ كەلەدى. ونىڭ بارلىعى جوعارعى باس قولباسشىمىز – قازاقستان پرەزيدەنتىنىڭ قازاقستان اسكەرىن جەتىلدىرۋگە دەگەن باتىل قادامدارىنىڭ, وڭ شەشىمدەرىنىڭ جەمىسى ەكەنىن مويىنداۋىمىز قاجەت.
ىقىلىم زامانداردان بەرى الاش اسكەرىنىڭ قاجىرى مەن قايراتى تۇلپار ءمىنىپ, تۋ العان ساربازدارىنىڭ جىگەرىمەن ولشەنگەن ەدى. بۇل ەرلىك پەن ورلىكتىڭ وسىناۋ ءححى عاسىردا دا لايىقتى ساباقتاستىعى بار. وعان دالەل – «وڭتۇستىك» وڭىرلىك قولباسشىلىعىنا قاراستى 91678 تاۋ-ەگەرلىك اسكەري پولكى.
وتان قورعاۋ ىسىنە دەگەن قىزىعۋشىلىعىم بالا كەزدەن باستاۋ الادى. ءوزىم الماتى وبلىسىنىڭ تالعار اۋدانىنا قاراستى تۇزدىباستاۋ اۋىلىنىڭ تۋماسىمىن. ورتا مەكتەپتى تامامداعاننان كەيىن, 2013 جىلى الماتىداعى قۇرلىق اسكەرلەرىنىڭ اسكەري ينستيتۋتىنا قابىلدانىپ, ونى 2017 جىلى موتواتقىشتار اسكەرلەرىنىڭ كوماندالىق-تاكتيكاسى بىلىكتىلىگى بويىنشا ءتامامدادىم. وقۋدى ويداعىداي اياقتاعان سوڭ كۇنى بۇگىنگە دەيىن قىزمەت ەتىپ كەلە جاتقان «وڭتۇستىك» وڭىرلىك قولباسشىلىعىن قاراستى 91678 تاۋ-ەگەرلىك اسكەري پولكىنا جىبەرىلدىم. بۇل پولكتىڭ ەرەكشەلىگى سول, ساربازدارى اتقا قونعان مۇنداي پولك تمد ەلدەرىندە – جالعىز! پولكتا اتتى اسكەردى قامتاماسىز ەتۋگە قاتىستى بارلىق جاعداي جاسالعان. قامبار اتا تولىنە ساربازدار وزدەرى قارايدى.
وتكەن جىلى رەسەي, قىرعىزستان, موڭعوليا جانە قازاقستان ەلدەرىنىڭ جاۋىنگەرلەرى باق سىناپ, موڭعوليادا وتكەن «ارافت» حالىقارالىق اتتى اسكەر مارافونىنا قاتىستىق. جۇلدەلى 2-ورىنعا يە بولدىق. كەيىن قازاقستانعا ورالعان سوڭ, ءى دارەجەلى «ەل قورعانى» مەدالىمەن ماراپاتتالدىم.
كۇندەلىكتى ومىردە ءبىز جاۋىنگەرلىك دايىندىقتاردى جۇرگىزەمىز. وقۋ كەستەسىنە سايكەس اتىس, تاكتيكالىق ساباقتاردى, جاتتىعۋلاردى ورىندايمىز. ال ەلىمىزدە جاريالانعان قازىرگى توتەنشە جاعداي رەجىمى كەزەڭىندە اتتى اسكەرلەرىمىز تاراز قالاسىنداعى بلوك-بەكەتتەردى كۇشەيتۋگە جۇمىلدىرىلدى. قالا اۋماعىندا باس-اياعى جەتى بلوك-بەكەت بار. ءار بەكەتكە ەكى اتتى جاۋىنگەر بەكىتىلگەن. بۇل ىندەت تە اياقتالار دەگەن سەنىمدەمىن.
بەكداير تولەگەنوۆ,
«وڭتۇستىك» وڭىرلىك قولباسشىلىعىنا قاراستى 91678 اسكەري ءبولىمىنىڭ تاۋ-ەگەرلىك روتاسىنىڭ كومانديرى, اعا لەيتەنانت
