قازاقستان • 13 مامىر، 2020

«بوگاتىر كومىر» جشس بىلتىر 44 ملن توننا ەنەرگەتيكالىق كومىر ءوندىردى

19 رەت كورسەتىلدى

«بوگاتىر كومىر» جشس – «بوگاتىر» جانە «سەۆەرنىي» كەنىشتەرىندە اشىق تاسىلمەن كومىر وندىرەتىن الەمدەگى ەڭ ءىرى كاسىپورىنداردىڭ ءبىرى. كومىر رازرەزدەرى پاۆلودار وبلىسىندا ەكىباستۇز قالاسىنا جاقىن ورنالاسقان. بۇل تۋرالى يدم ءباسپاسوز قىزمەتى حابارلادى.

كەن ورنىنىڭ تەڭگەرىمدىك قورى شامامەن 3 ملرد توننا كومىردى قۇرايدى. كومپانيا وندىرىستىك قىزمەتتىڭ باسىنان باستاپ ءوندىرىستى تەحنيكالىق قايتا جاراقتاندىرۋمەن اينالىسادى. تاس كومىردى ءوندىرۋ بويىنشا كوشباسشى جانە رەسەيگە كومىردى نەگىزگى ەكسپورتتاۋشى. بۇگىنگى تاڭدا كاسىپورىندا 7 مىڭنان استام ادام ەڭبەك ەتەدى.

2019 جىلدىڭ ناتيجەلەرى بويىنشا «بوگاتىر كومىر» جشس 44،85 ملن توننا ەنەرگەتيكالىق كومىر ءوندىردى. ىشكى نارىققا 33،8 ملن توننا كومىر تيەلىپ، رەسەيلىك تۇتىنۋشىلارعا 10،9 ملن توننا ەكسپورتتالدى. كومپانيا بيىل دا وسى كورسەتكىشتەردى ساقتاپ قالۋعا نيەتتى.

«بوگاتىر كومىر» جشس وندىرەتىن كومىر قازاقستاننىڭ ءىرى ەلەكتر ستانتسيالارىن وتىنمەن قامتاماسىز ەتەدى. ەلىمىزدىڭ بارلىق ەلەكتر ەنەرگياسىن ءوندىرۋدىڭ شامامەن 33% كومپانيا ونىمىنە تيەسىلى. سونداي-اق رەسەيدىڭ ءىرى ورتا ۋرال ەلەكتر ستانتسيالارى، ونىڭ ىشىندە رەتستين ماەس، ترويتسك ماەس كومپانيالارىنا جەتكىزەدى.

2014 جىلى «بوگاتىر كومىر» جشس (بەنەفيتسيارلارى «سامۇرىق-ەنەرگو» اق (50%) جانە «رۋسال» بك (50%) اك كومىر ءوندىرۋدىڭ تسيكلدىك-اعىمدىق تەحنولوگياسىنا (تسات) كوشۋ جوباسىن ماقۇلدادى. بۇل، ەڭ الدىمەن، تاۋ-كەن جۇمىستارىنىڭ نەعۇرلىم تەرەڭ قاباتتارعا كوشۋىنە، كەن ورنىن يگەرۋدىڭ تاۋ-كەن-گەولوگيالىق جانە تاۋ-كەن تەحنيكالىق جاعدايلارىنىڭ ناشارلاۋىنا بايلانىستى. قازىرگى ۋاقىتتا جوبانىڭ تەحنيكالىق–ەكونوميكالىق نەگىزدەمەسى ازىرلەندى. نەگىزگى جابدىقتى جەتكىزۋشى بولىپ گەرمانيانىڭ «ThyssenKrupp» ونەركاسىپتىك كونتسەرنى انىقتالىپ، ونىمەن كەلىسىمشارت جاسالدى جانە ينجينيرينگتىك جۇمىستاردى جۇرگىزۋ باستالدى. №1 جەلى جانە №2 جەلى جابدىقتارىن دايىنداۋ جانە جەتكىزۋ ءۇشىن ءبىرىنشى جانە ەكىنشى اۆانس تولەمى جۇرگىزىلدى. ەادب-مەن نەسيە شارتىنا قول قويىلدى.

جوبا شەڭبەرىندە كارەرىشىلىك قويمالاردى جانە روتورلى ەكسكاۆاتورلاردى ۇساقتاۋ-اۋىستىرىپ تيەۋ پۋنكتتەرىنە اۋىستىرۋ جانە كارەرىشىلىك تەمىر جولداردى كومىردى كونۆەيەرلىك تاسىمالداۋعا اۋىستىرۋ ارقىلى ءوندىرىستى جاڭعىرتۋ كوزدەلگەن. بۇل جاڭاشىلدىق «بوگاتىر كومىر» جشس نەگىزگى قۇرالدارى قورىن جاڭارتۋعا، وندىرىلەتىن كومىردىڭ وندىرىستىك قۋاتى مەن تۇتىنۋ ساپاسىن ارتتىرۋعا، وندىرۋگە جۇمسالاتىن شىعىندى ازايتۋعا جانە ەكولوگياعا تەرىس اسەرىن شەكتەۋگە مۇمكىندىك بەرەدى.

سونىمەن قاتار كومىر ءوندىرۋ بويىنشا «بوگاتىر» رازرەزىنىڭ قۋاتى جىلىنا 32 ملن - نان 40 ملن تونناعا دەيىن ارتادى. ەڭبەك ونىمدىلىگى 25% جوعارىلايدى. كومىر ءوندىرۋدىڭ وندىرىستىك وزىندىك قۇنى 12%  تومەندەيدى جانە ۆاگوندار اينالىمىنىڭ ورتاشا ۋاقىتى 14،3 ساعاتتان 5،4 ساعاتقا دەيىن قىسقارادى. سونىمەن قاتار جوبادا ەكى كونۆەيەرلىك جەلى قۇرىلىسى قاراستىرىلعان. ولار 2020 - 2022 جىلدارى 2 كەزەڭمەن ىسكە اسىرىلادى.

ارينە، اتالمىش جوبا ەلىمىز ءۇشىن اسا ماڭىزدى بولىپ سانالادى. ول تاۋ-كەن ونەركاسىبىندە جانە كارەرلەردى قازۋدا جۇزەگە اسىرىلادى. جوبا كەن ورنىن ودان ءارى دامىتۋعا ىقپال ەتەدى، سونداي-اق كومىر ەكسپورتى ەسەبىنەن ءوزارا ساۋدا كولەمىن ۇلعايتۋدى كوزدەيدى جانە مەملەكەتتەردىڭ ءوزارا وندىرىستىك ىنتىماقتاستىعىن قولدايدى. قۇرىلىس جانە ودان ءارى پايدالانۋ كەزەڭىندە كومىر ءونىمىن ءوندىرۋدى ۇلعايتۋعا ىقپال ەتەدى.

بۇدان باسقا، جاڭا بىرەگەي جابدىقتار مەن ەنەرگەتيكالىق كومىر ءوندىرۋ تەحنولوگياسى ەنگىزىلۋدە. بۇل يننوۆاتسيالىق قۇرامداس بولىكتى ايقىنداپ، رازرەزدەر ىشىندە تۇقىمدى ورنالاستىرۋ جوسپارىنا بايلانىستى ءوندىرۋدىڭ قورشاعان ورتاعا تەرىس اسەرىن ازايتۋدى كوزدەيدى. سونداي-اق شەتەلدىك قارجى ينستيتۋتتارىنىڭ قاراجاتى تارتىلاتىنىن اتاپ وتكەن ءجون. جوبانىڭ حالىقارالىق دەڭگەيدە ماڭىزدىلىعىن ارتتىرادى، حالىقارالىق بانك تاجىريبەسىنە ساي بولىپ، كۇردەلى جانە ءىرى مامىلەلەر بويىنشا ەادب قۇزىرەتىن ارتتىرۋعا ىقپال ەتەدى.

جالپى، جوبانى تابىستى ىسكە اسىرۋ پاۆلودار وبلىسى حالقىنىڭ تابىس دەڭگەيىن، ءومىر ءسۇرۋ ساپاسىن جانە ەڭبەك جاعدايلارىن ارتتىرۋعا، بارلىق دەڭگەيدەگى بيۋدجەتكە سالىق تولەمدەرىنىڭ ارتۋىنا ىقپال ەتەتىن بولادى. وسىلايشا، جوبانى ىسكە اسىرۋ قازاقستان ەكونوميكاسى ءۇشىن وڭ ناتيجە بەرىپ قانا قويماي، الداعى ۋاقىتتا ەۋرازيالىق كەڭىستىكتەگى ەلدەر ەكونوميكاسىنىڭ ساۋدا الەۋەتىن كەڭەيتۋگە جول اشادى.

 

سوڭعى جاڭالىقتار

تۇركىستان جاسىل قالاعا اينالۋدا

وڭتۇستىك قازاقستان • كەشە

ۇقساس جاڭالىقتار