ءا. سمايىلوۆ اتاپ وتكەندەي, اعىمداعى جىلعى 4 ايدىڭ قورتىندىسى بويىنشا مەملەكەتتىك بيۋدجەتكە 2,7 ترلن تەڭگە كىرىس ءتۇستى. جوسپار 103,9%-عا اتقارىلدى. رەسپۋبليكالىق بيۋدجەتكە 1,7 ترلن تەڭگە كىرىس ءتۇستى.
سالىقتار بويىنشا جوسپار 61 ملرد تەڭگەگە ورىندالمادى. ونىڭ نەگىزگى سومالارى ققس جانە كتس ەسەبىنەن. جوسپاردىڭ ورىندالماۋىنا سىرتقى نارىقتاعى فاكتورلار دا اسەر ەتۋدە.
نەگىزگى ەكسپورتتىق پوزيتسيالار بويىنشا 2019 جىلدىڭ 4 ايىمەن سالىستىرعاندا باعالار ورتا ەسەپپەن 19%-عا جانە جىل باسىنان 15%-عا تومەندەدى.
قىزمەت كورسەتۋ سالالارىنان دا ءتۇسىم ازايدى.
جەرگىلىكتى بيۋدجەتتەردىڭ ءوز كىرىستەرى 119%-عا ورىندالىپ, 1,3 ترلن تەڭگەنى قۇرادى. بارلىق وڭىرلەردە كىرىستەردىڭ جوسپارى ارتىعىمەن ورىندالدى.
مەملەكەتتىك بيۋدجەت شىعىستارى 97,7%-عا, رەسپۋبليكالىق 98,6%-عا, جەرگىلىكتى بيۋدجەتتەر 97,1%-عا اتقارىلدى.
«رەسپۋبليكالىق بيۋدجەتتىڭ شىعىستارى ەسەپتى كەزەڭدە 4 ,3 ترلن تەڭگەنى قۇرادى. 62 ملرد تەڭگەگە اتقارىلمادى. ونىڭ 14 ملرد تەڭگەسى ۇنەمدەۋ بولدى. يگەرىلمەۋ سوماسى 48 ملرد تەڭگەنى قۇرادى. يگەرىلمەۋدىڭ نەگىزگى سەبەپتەرى — كونكۋرستىق راسىمدەردى ۇزاق جانە ۋاقتىلى وتكىزبەۋ, ناقتى كورسەتىلگەن قىزمەت كولەمى, اتقارىلعان جۇمىستارعا اقى تولەۋ, كەلىسىمدەردى جاساسۋ راسىمدەرىن ۇزاق جۇرگىزۋ, سوتتا تالاپ-ارىز جۇمىستارىن جۇرگىزۋ», — دەپ ءتۇسىندىردى ءا. سمايىلوۆ.
ناقتىلانعان بيۋدجەتتە داعدارىسقا قارسى شارالارعا قوسىمشا 1,1 ترلن تەڭگە قاراستىلدى. بۇل سومانىڭ 70%-ى جەرگىلىكتى بيۋدجەتتەرگە «ەڭبەك» مەملەكەتتىك باعدارلاماسى, «اۋىل - ەل بەسىگى», بيزنەستىڭ جول كارتاسى اياسىندا كاسىپكەرلەردىڭ جوبالارىن سۋبسيادالاۋعا جانە كەپىلدەندىرۋگە, اگروونەركاسىپ كەشەنىن سۋبسيادالاۋعا كوزدەلگەن.
«بارلىق قاجەتتى بيۋدجەتتىك پروتسەدۋرالار جۇزەگە اسىرىلدى. مەملەكەتتىك ساتىپ الۋلار جەڭىلدەتىلگەن پروتسەدۋرالار ارقىلى جۇرگىزىلۋدە. وسى قاراجاتتىڭ يگەرىلۋ بارىسى قاتاڭ باقىلاۋدا بولادى», — دەدى ءا. سمايىلوۆ.
