ەكونوميكانىڭ, بانك سالاسىنىڭ جاي-كۇيى, رەسپۋبليكالىق بيۋدجەتتىڭ اتقارىلۋى جانە ەكونوميكا سالالارىنىڭ دامۋى تۋرالى ۇلتتىق ەكونوميكا ءمينيسترى رۋسلان دالەنوۆ, ۇلتتىق بانك توراعاسى ەربولات دوساەۆ, پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, ساۋدا جانە ينتەگراتسيا ءمينيسترى باقىت سۇلتانوۆ, سونداي-اق ەنەرگەتيكا ءمينيسترى نۇرلان نوعاەۆ باياندادى.
وسى جىلدىڭ قاڭتار-ساۋىرىندە ءجىو 2019 جىلدىڭ ءتيىستى كەزەڭىمەن سالىستىرعاندا 0,2%-عا تومەندەدى. ساۋدا جانە كولىك سەكتورى تەرىس ديناميكا كورسەتتى, تيىسىنشە 8,9% جانە 11%-عا تومەندەدى. سونىمەن قاتار وڭدەۋ ونەركاسىبىندە ءوسىم 7%-دى, ماشينا جاساۋدا – 25,4%-دى, جەڭىل ونەركاسىپتە – 13,9%-دى, فارماتسەۆتيكادا – 24,2%-دى, سونداي-اق تاۋ-كەن ونەركاسىبىندە 6%-دى, قۇرىلىستا – 5,5%-دى, بايلانىس قىزمەتتەرىندە – 9,6%-دى, اۋىل شارۋاشىلىعىندا – 2,2%-دى قۇرادى. نەگىزگى كاپيتالعا سالىنعان ينۆەستيتسيالار 0,9%-عا ءوستى. التىن-ۆاليۋتا قورى $30,5 ملرد, ۇلتتىق قور اكتيۆتەرى $58,5 ملرد قۇرادى.
ۇكىمەت باسشىسى ەلىمىزدە توتەنشە جاعدايدىڭ اياقتالۋى جانە كارانتيندىك شارالاردىڭ جەڭىلدەتىلۋىنە بايلانىستى قىزمەت كورسەتۋ سەكتورى قالپىنا كەلتىرىلە باستاۋى ءتيىس ەكەنىن اتاپ ءوتتى. بۇعان سالىقتىق ىنتالاندىرۋ, جەڭىلدىكتى نەسيەلەندىرۋ, وتاندىق تاۋارلاردى وتكىزۋگە كەپىلدىك بەرۋ تەتىگى ارقىلى ىشكى ءوندىرىستى قولداۋ جولىمەن بارلىق مەملەكەتتىك قولداۋ شارالارى ىقپال ەتەدى.
سونىمەن قاتار ۇكىمەت «اتامەكەن» ۇكپ جانە سالالىق قاۋىمداستىقتارمەن بىرلەسىپ, ىسكەرلىك بەلسەندىلىكتى ىنتالاندىرۋ, جۇمىسپەن قامتۋ جانە حالىقتىڭ تابىسىن قولداۋ شارالارىن تالقىلادى. مەملەكەت باسشىسىنىڭ تاپسىرماسى بويىنشا ازىرلەنگەن شارالاردىڭ نەگىزىندە وسى جىلدىڭ سوڭىنا دەيىن ەكونوميكالىق ءوسىمدى قالپىنا كەلتىرۋ جونىندەگى كەشەندى جوسپار ازىرلەندى. اتالعان جوسپار ۇكىمەتتىڭ كەلەسى وتىرىسىندا قارالادى.
پرەمەر-مينيستر قىزمەت كورسەتۋ سەكتورىن قالپىنا كەلتىرۋ بويىنشا ناقتى شارالار قابىلداۋدى تاپسىردى.
«جالپى, الداعى كەزەڭدەگى باسىم مىندەت ەكونوميكانىڭ ءوزىن-ءوزى قامتاماسىز ەتىلۋىن ارتتىرۋعا, باسەكەگە قابىلەتتى شيكىزاتتىق ەمەس سەكتورعا, ءتيىمدى ينۆەستيتسيالار مەن قوسىلعان قۇننىڭ وڭىرلىك جانە جاھاندىق تىزبەگىنە كىرىگۋىنە نەگىزدەلگەن جاڭا قۇرىلىمىن قالىپتاستىرۋ بولادى», — دەپ تۇيىندەدى ا. مامين.
