«ارداگەرلەر تۋرالى» زاڭدا نەگىزىنەن الەۋمەتتىك جاعىنان قورعالاتىن ارداگەرلەردىڭ 5 ءتۇرلى ساناتى اتاپ كورسەتىلگەن جانە ولار ءۇشىن ارنايى مەملەكەتتىك جاردەماقى مولشەرى تاعايىندالعان. بۇل زاڭ بويىنشا ەندى ۇلى وتان سوعىسىنىڭ ارداگەرلەرىنە, باسقا مەملەكەتتەر اۋماعىنداعى ۇرىس قيمىلدارىنا قاتىسقان ارداگەرلەرگە جانە جەڭىلدىكتەر بويىنشا ۇوس ارداگەرلەرىنە تەڭەستىرىلگەن ارداگەرلەرگە, ەڭبەك ارداگەرلەرىنە, سونىمەن قاتار وسى زاڭنىڭ كۇشى قولدانىلاتىن باسقا دا ادامدارعا ەرەكشە جاعدايلار جاسالماق.
زاڭنىڭ 4-بابى مەن 8-باپتارى ارالىعىندا جاعداي جاسالاتىن ارداگەرلەردىڭ ساناتتارى قامتىلسا, 9-باپتا ارداگەرلەردىڭ مارتەبەسى بەلگىلەنگەن. 10-14-باپتاردا ارداگەرلەردى الەۋمەتتىك قولداۋ شارالارىنىڭ تۇرلەرى اتاپ كورسەتىلگەن. الەۋمەتتىك قولداۋ شارالارىنىڭ ەڭ باستىسى – جوعارىدا اتالعان ارداگەرلەردىڭ بارلىعىنا جۇيەلى تۇردە ارناۋلى مەملەكەتتىك جاردەماقى تولەنەتىن بولادى. جەڭىستىڭ 75 جىلدىعى قارساڭىندا مەملەكەت باسشىسىنىڭ «ارداگەرلەر تۋرالى» زاڭدى قولدانىسقا ەنگىزۋى جوعارىدا اتالعان ساناتتاعى ارداگەرلەردىڭ عانا ەمەس, بۇكىل كوپشىلىك قاۋىمنىڭ دا ويىنان شىققان يگى ءىس.
قابىلدانعان زاڭنىڭ باستى ماقساتى بويىنشا ەندى ارداگەرلەرگە الەۋمەتتىك قولداۋ شارالارى كۇشەيتىلەدى. جاڭا زاڭنىڭ ەرەكشەلىكتەرىمەن ەگجەي-تەگجەيلى تانىسقان قازاقستاننىڭ ءاربىر ازاماتى « ۇلى وتان سوعىسىنىڭ قاتىسۋشىلارى مەن مۇگەدەكتەرىنە جانە سولارعا تەڭەستىرىلگەن ادامدارعا بەرىلەتىن جەڭىلدىكتەر مەن ولاردى الەۋمەتتىك قورعاۋ تۋرالى» 1995 جىلعى 28 ساۋىردەگى زاڭنىڭ كۇشى جويىلعانىن ەستە ۇستاعاندارى ءجون دەپ بىلەمىن. ەسكى زاڭدا ءۇستىرت اتالىپ وتىلگەن نەمەسە قالتارىستا قالىپ كەتكەن كوپتەگەن ماسەلەلەر بۇل جولعى جاڭا زاڭدا جان-جاقتى قوزعالىپ, تەرەڭ تالدانىپ, وزگەرتىلە تولىقتىرىلىپ, كەڭىنەن قامتىلا قاراستىرىلعان. پرەزيدەنت ق.توقاەۆ قول قويىپ, قولدانىسقا ەنگىزگەن جاڭا زاڭ وسىنىسىمەن قۇندى.
ءۇمىت بيتەنوۆا,
اقىن
