1995 جىلى قابىلدانعان زاڭدا چەرنوبىل اپاتى زاردابىن جويۋشىلاردى الەۋمەتتىك قولداۋ تۋرالى قاراستىرىلعان ەدى. بىراق ول ەكى جىلدان كەيىن توقتاپ قالدى دا, ءبىز زاڭى جوق, ماسەلەسى كوپ ۇيىمعا اينالىپ شىعا كەلگەنبىز. اتوم زاردابى ويىنشىق ەمەس, ونى جويۋعا قاتىسقانداردىڭ كوپشىلىگى ومىردەن تىم ەرتە كەتتى. قازىر قاتاردا جۇرگەندەردى دە سىرقات مەڭدەگەن. وسىلاي بولا تۇرسا دا كەيدە ماسەلەمىزدى كىمگە ايتارىمىزدى بىلمەي داعدارعان كەزىمىز دە ەستە. سوندىقتان دا جاڭا زاڭنىڭ قابىلدانۋى وسى سالاداعى بارلىق قۇقىقتىق ءارى الەۋمەتتىك كەمشىلىكتەردىڭ ورنىن تولتىردى دەسەك تە بولادى.
جاڭا زاڭ بويىنشا ءبىز سوعىس ارداگەرلەرىمەن تەڭەستىرىلدىك. سوعان سايكەس جەڭىلدىكتەر مەن كومەكتەر بەلگىلەنگەن. بۇل جەردە ەسكەرە كەتەتىن ءبىر ماسەلە, اتوم زاردابىن جويۋعا قاتىسقان ازاماتتاردىڭ دەنى جۇمىس ىستەمەيدى. كەزىندە زياندى ساۋلە كەسىرىنەن كوپشىلىگى مۇگەدەكتىككە شىققان. ءبىر زەينەتاقىدان باسقا تابىسى جوق. سوندىقتان دا ارناۋلى مەملەكەتتىك جاردەماقىنىڭ وسكەنى كادىمگىدەي كومەك.
بۇل زاڭنان ارداگەرلەردىڭ جاڭا ساناتتارى قالىپتاستىرىلعانىن كورەمىز. وتان سوعىسى, اۋعانستان سوعىسى ارداگەرلەرىمەن قاتار تاجىكستانداعى, تاۋلى قاراباحتاعى قاقتىعىستارعا قاتىسقاندار دا زاڭ اياسىندا الەۋمەتتىك قولداۋعا يە بولىپ وتىر. بۇل ءبىزدىڭ قوعامدا ارداگەر ەڭبەگىنىڭ ەلەۋسىز قالمايتىندىعىن كورسەتەدى.
جۇمابەك شاحاتوۆ,
قىزىلوردا قالالىق «چەرنوبىل» قوعامدىق بىرلەستىگىنىڭ توراعاسى
