پرەمەر-ءمينيستردىڭ ورىنباسارى اتاپ وتكەندەي, قازاقستاندا 2 ايعا جۋىق ۋاقىت بويى توتەنشە جاعداي جانە كارانتيندىك شەكتەۋ رەجيمى ساقتالدى.
«بۇگىندە قابىلدانعان شارالار, ياعني شەكتەۋ شارالارى تولىعىمەن ءوزىن ءوزى اقتادى دەپ سەنىممەن ايتۋعا بولادى. ءبىز ەلىمىزدە ينفەكتسيانىڭ تارالۋىن باسقارىلاتىن دەڭگەيدە ساقتاي الدىق. جاعداي مەملەكەت باسشىسى قاسىم-جومارت كەمەل ۇلىنىڭ جەكە باقىلاۋىندا بولدى», - دەدى ە. توعجانوۆ.
پرەزيدەنت ءمالىم ەتكەندەي, 11 مامىردان باستاپ ەلىمىزدە توتەنشە جاعداي رەجيمى اياقتالدى. الايدا, ە. توعجانوۆتىڭ ايتۋىنشا, قاۋىپ ءالى بار جانە قاتەرلەردى ەسكەرمەۋگە بولمايدى. سوندىقتان كارانتين شارالارى جالعاسادى. شەكتەۋ شارالارى ءاربىر وڭىردەگى ەپيدەميولوگيالىق احۋالعا بايلانىستى كەزەڭ-كەزەڭمەن الىنىپ تاستالادى.
«سىزدەرگە بەلگىلى بولعانداي, كارانتين شارالارىن جەڭىلدەتۋدى ءبىز 20 ساۋىردەن باستادىق. وسى كەزەڭ ارالىعىندا 1,1 ملن جۋىق ادام جۇمىسىن قايتا باستادى. بۇگىنگى كۇننەن باستاپ اۋماعى 2 مىڭ ش.م. دەيىن بولاتىن ازىق-ت ۇلىكتىك ەمەس دۇكەندەر, سۇلۋلىق سالوندارى, بالالاردى دامىتۋ ورتالىقتارى جۇمىسقا كىرىسەدى. ساياباقتار مەن گۇلزارلاردا ادامداردىڭ سەرۋەندەۋىنە رۇقسات ەتىلەدى. ساياباقتاردىڭ جانىنداعى ويىن-ساۋىق قىزمەتتەرىنىڭ جۇمىسى ءالى شەكتەلەدى», - دەدى پرەمەر-ءمينيستردىڭ ورىنباسارى.
سونىمەن قاتار, سپورتتىق جاتتىعۋلار وتكىزۋگە, مادەنيەت قىزمەتكەرلەرىنە رەپەتيتسيالار جۇرگىزۋگە رۇقسات ەتىلەدى. جۇمىس ىستەيتىن اتا-انالار ءۇشىن بالاباقشالاردا سانيتارلىق نورمالاردى ساقتاۋمەن كەزەكشى توپتار ۇيىمداستىرىلادى.
ە. توعجانوۆتىڭ ايتۋىنشا, كاسىپكەرلەر مەن تۇرعىنداردان ساۋدا ويىن-ساۋىق ورتالىقتارىنىڭ, مەيرامحانالار مەن قوناق ۇيلەردىڭ جۇمىسىن قايتا باستاۋعا قاتىستى كوپتەگەن سۇراقتار كەلىپ تۇسۋدە.
«بۇل كەزەڭدە ولاردىڭ جۇمىسقا كىرىسپەيتىنىن ەرەكشە اتاپ ايتقىم كەلەدى. بۇل ماسەلە وڭىرلەردەگى سانيتارلىق-ەپيدەميولوگيالىق احۋالدى ەسكەرۋمەن ءسال كەيىن قاراستىرىلاتىن بولادى», - دەپ تۇيىندەدى پرەمەر-ءمينيستردىڭ ورىنباسارى.
