ۇلى جەڭىس كۇنى مەرەكەسىنىڭ ورنى بولەك. ويتكەنى, بۇل كۇندى ءارى قۋانىشپەن ءارى قاسىرەتپەن ەسكە الامىز! ۇلى وتان سوعىسى ەشكىمگە وڭاي سوقپادى. سۇراپىل سوعىس اناسىن بالاسىنان, بالاسىن اناسىنان, اسقار تاۋداي اكەسىنەن ايىردى. سان مىڭداعان تاعدىرلاردى تالقانداپ كەتە باردى… سولداتتاردىڭ كوڭىلىنە ساعىنىش سەزىمىن ۇيالاتتى. اتالمىش قويىلىمنىڭ ايتارى دا وسى. جاۋعا قارسى كۇرەسكەن جاۋىنگەرلەردىڭ اتا-اناسىنا, تۋعان-تۋىس, جورا-جولداس, سۇيگەن جار, بالالارىنا حات جازۋ ساتىنەن باستاۋ الاتىن سپەكتاكلدە, ۇلى جەڭىس جولىندا جان قيعان جاۋجۇرەك سولداتتاردىڭ ەرلىگى باياندالادى. سونىمەن قاتار, ءتۇرلى وقيعالارعا تولى تۋىندى دا, كەشەگى باتىر اتالارىمىزدىڭ قايسارلىعى سۋرەتتەلەدى.
ءيا, سوعىس جىلدارىندا سولدات بىتكەن قولىنا قارۋ الىپ مايدانعا اتتانسا, ونەرپاز قاۋىم, كومپوزيتور, سازگەر, اقىندارىمىز جاۋمەن بەتپە-بەت كەلگەن جاۋىنگەرلەر مەن حالىقتىڭ رۋحىن كوتەرۋ ماقساتىندا, قانشاما شىعارمالار تۋدىردى. ولار سولداتتارعا ەرەكشە جىگەر, كۇش-قۋات بەردى. اتالعان سپەكتاكلدە سانامىزدا ماڭگىلىك ساقتالىپ, جادىمىزدا جاڭعىرىپ تۇرار اندەر دە ورىندالادى.
عاجايىپ ەرتەگىدەگى ءاربىر كەيىپكەردىڭ ەرلىگى بالالارعا ۇلگى, ونەگە بولماق. وتاندى, ەلدى, جەردى سۇيۋگە شاقىراتىن سپەكتاكلدە نۇر-سۇلتان قالاسى اكىمدىگى قۋىرشاق تەاترىنىڭ اكتەرلەرى كادۋىلگى ادام كەيپىندە ءھام قۋىرشاقتار ارقىلى ونەر كورسەتەدى. قويىلىمداعى سيقىرلى باقىراشقا جان بىتىرەدى. باقىراش بولسا, تەمىردەي ءتارتىپ پەن تاۋسىلماس ءتوزىمنىڭ ارقاسىندا جاۋدى جەڭىپ شىعادى.
باس قالامىزدىڭ قۋىرشاق تەاترى سۇيىكتى دە سۇيكىمدى كىشكەنتاي كورەرمەندەرىن, «ساربازدىڭ باقىراشى» اتتى قويىلىمىن تاماشالاۋعا شاقىرادى. سونداي-اق, 9-مامىر كۇنى قۋىرشاق تەاترىنىڭ Instagram پاراقشاسىندا, ساعات 15.00دە تىكەلەي ەفيردە وتەتىن, ء«بىزدىڭ ەسىمىزدە» اتتى مەرەكەلىك كونتسەرتىندە اسىعا كۇتەدى.
