العاش بولىپ ارداگەرلەردى بەلگىلى وپەرا ءانشىسى مايرا مۇحامەدقىزى قۇتتىقتادى.
«بارلىعىڭىزدى 9 مامىر – جەڭىس كۇنىمەن شىن جۇرەكتەن قۇتتىقتايمىز. بۇل جەڭىستى قانى مەن تەرىن توگىپ, ەرلىكپەن الىپ بەرگەن ءبىزدىڭ اتالارىمىز, اكەلەرىمىز, ۇوس ارداگەرلەرى. ءبىز سىزدەردىڭ ەڭبەكتەرىڭىزدى ەشقاشان ۇمىتپايمىز», – دەگەن وپەرا ءانشىسى ۇلى جەڭىس ءۇشىن بارلىق ارداگەرلەرگە العىس ايتتى.
سونداي-اق ارداگەرلەردى استانالىق «جاستار» تەاترىنىڭ تانىمال اكتەرى ءادىل احمەتوۆ مەرەكەمەن قۇتتىقتادى. ءوزىنىڭ بەينەجولداۋىندا جاس اكتەر ۇلى وتان سوعىسىنداعى جەڭىستىڭ 70 جىلدىعىنا ارنالعان «اناعا اپارار جول» فيلمىندە باستى ءرولدى سومداپ, سوعىس ءدامىن سەزگەنىن ايتادى.
قازاقستاندىق تەاتر جانە كينو اكتريساسى التىناي نوگەربەك ءوزىنىڭ ارداگەرلەرگە ارناعان قۇتتىقتاۋىندا 9 مامىر ول ءۇشىن وتباسىنىڭ ۇلكەن مەرەكەسى ەكەنىن اتاپ ءوتتى. ول ءوز اتاسى مەن ناعاشى اتاسى سول قاتىگەز سوعىسقا قاتىسىپ, باقىتىنا وراي ەكەۋى دە امان ورالعانىن ايتتى.
ۇلى وتان سوعىسىنا 1 200 000 قازاقستاندىق اتتانىپ, ولاردىڭ جارتىسى مايداننان ورالماعان. 700 مىڭنان استام قازاقستاندىق سوعىسقا قاتىسۋشى ەڭبەك ارمياسى مەن ارنايى قۇرىلىس بولىمدەرىنە جازىلدى. بۇگىنگى تاڭدا ەلوردادا 44 ۇوس ارداگەرى تۇرادى.
ايتا كەتەيىك, ۇلى وتان سوعىسىنداعى جەڭىستىڭ 75 جىلدىعىنا وراي نۇر-سۇلتاندا 3 688 ادام بىرجولعى اقشالاي تولەم الدى. ونىڭ جالپى سۋمماسى 180 ملن تەڭگەنى قۇرايدى. 44 سوعىس ارداگەرى مەن مۇگەدەكتەرىنە 1 ملن تەڭگەدەن تولەندى.
