شىندىعىن ايتقاندا, وسى ءبىر تۇيتكىل ماسەلە كوپتەن بەرى شەشىمىن تاپپاي جاتقان بولاتىن. قازاقتا «قارنىمنىڭ اشقانىنا ەمەس, قادىرىمنىڭ قاشقانىنا جىلايمىن» دەگەن ءسوز بار. قادىرىمىز قاشقان سوڭ قاھارمان ەڭبەك ءداستۇرىن جالعاستىرۋعا شىنايى سەپتىگىن تيگىزەتىن, جاس ۇرپاقتى جاسامپاز ەڭبەككە باۋليتىن ونەگە بولۋ كەرەكتىگىن ايتىپ تالاي رەت ماسەلە كوتەردىك. قارنىمىز اشقاندىقتان ەمەس, ءبىز اسارىمىزدى اساپ, جاسارىمىزدى جاساعان ادامدارمىز. ءبىزدىڭ جاسىمىزداعى ادامدارعا كوپ بايلىقتىڭ قاجەتى دە جوق. ءبىزدىڭ جيناعان بايلىعىمىز – ناتيجەلى ەڭبەك, جالقىنىڭ ەمەس, جالپىنىڭ يگىلىگى عوي.
قازىرگى ۇرپاق ارداگەرلەر ەڭبەگىنىڭ زەينەتىن كورمەي جاتقاندىعىن بايقاسا, ولار قالاي اق ادال ەڭبەككە ىنتىزار بولادى. ەسەلى ەڭبەك ەتۋگە دەگەن قۇشتارلىق قايدان پايدا بولادى؟ ساباقتاستىق بولۋى كەرەك قوي. مۇنىڭ ءوزى تاربيەنىڭ ءبىر تەتىگى. قولىمىز جەتپەي, ءسوزىمىز وتپەي جۇرگەن وزەكتى ماسەلەنى ەل گازەتى – «Egemen Qazaqstan» ۇستىمىزدەگى جىلدىڭ 6-شى اقپان كۇنگى نومىرىندە جارىق كورگەن جۋرناليست بايقال ءبايادىلدىڭ «ەردەن ەردىڭ نەسى كەم؟» دەپ اتالاتىن ماقالاسىندا ورىندى كوتەرگەن ەدى. سوتسياليستىك ەڭبەك ەرلەرىنىڭ جانكەشتى ەڭبەگىن قاۋزاپ جازىپ, ولارعا قازاقستاننىڭ ەڭبەك ەرى اتاعىن العان ادامدارمەن بىردەي ارناۋلى مەملەكەتتىك جاردەماقى تولەنۋ كەرەكتىگىن جەرىنە جەتكىزە ايتقان بولاتىن.
ونسىز دا قاتارى سەلدىرەپ قالعان سوتسياليستىك ەڭبەك ەرلەرىنىڭ كوكەيلەرىندە جۇرگەن وكپە-ناز تارقاپ, بۇگىندە لايىقتى باعاسىن الىپ وتىر. بۇل جالعىز بىزگە عانا ەمەس, تابانى تاستان تايماعان تارلانبوزداي ۋاقىتپەن ساناسپاي ەڭبەك ەتىپ, ورتاق بايلىقتى ەسەلەي مولايتقان بارشا ارداگەرلەرگە كورسەتىلگەن قۇرمەت دەپ بىلەمىز.
«ارداگەرلەر تۋرالى» زاڭدا ناقتى بىلاي دەپ كورسەتىلگەن. «سوتسياليستىك ەڭبەك ەرى» اتاعىنا جانە ءۇش دارەجەلى «ەڭبەك داڭقى» وردەندەرىنە يە بولعان ادامدارعا بەرىلەتىن ارناۋلى مەملەكەتتىك جاردەماقى مولشەرى «كەڭەس وداعىنىڭ باتىرى», «حالىق قاھارمانى», «قازاقستاننىڭ ەڭبەك ەرى» اتاقتارىن العان ادامداردىكىمەن تەڭەستىرىلىپ, 138,63 ايلىق ەسەپتىك كورسەتكىش, ياعني 385 115 تەڭگە بولىپ بەلگىلەنىپ وتىر. بۇل شەشىم ءبىز ءۇشىن ادىلدىكتىڭ سالتانات قۇرعان ءساتى دەپ تۇيسىنەمىز. قازاقتىڭ جالپاق تىلىمەن ايتقاندا, «اق تۇيەنىڭ قارنى جارىلعان ءسات». ولاي دەيتىنىم, وسىعان دەيىن سوتسياليستىك ەڭبەك ەرلەرى مەن ءىىى دارەجەلى «ەڭبەك داڭقى» وردەندەرىنىڭ تولىق يەگەرلەرى 9,60 ايلىق ەسەپتىك كورسەتكىش نەمەسە 26 668 تەڭگە مولشەرىندە عانا ارناۋلى مەملەكەتتىك جاردەماقى الىپ كەلدى.
بالكىم, ماسەلە اقشادا دا ەمەس شىعار. ەڭ باستىسى, ەڭبەكتىڭ ەلەنگەنى. تاۋەلسىز قازاق ەلىندە ەڭبەك ادامىن قۇرمەتتەۋ تۋرالى از ايتىلىپ كەلە جاتقان جوق. تۇڭعىش پرەزيدەنتىمىز نۇرسۇلتان نازارباەۆ تا بۇل ماسەلە تۋرالى تالاي رەت اتالى ءسوزىن ايتقان بولاتىن. قادىرلەۋ مەن قوشەمەتتەۋ, اق ادال ەڭبەكتى ارداق تۇتۋ اقشامەن ولشەنبەسە دە, ومىرشەڭ ونەگەنىڭ ءتىنى وسىلاي ساباقتالۋى كەرەك ەدى. ادال ەڭبەكتى مۇرات تۇتقان, ماقسات ەتكەن تۋعان ەلىمىزدىڭ تۇعىرلى ساياساتىنىڭ ارقاسىندا تۇلعامىز بيىكتەپ, تۇعىرىمىز اسقاقتاپ قالدى. سول ءۇشىن دە ەل پرەزيدەنتىنە جانە وسى ماسەلەنى دەر كەزىندە كوتەرگەن «Egemen Qazaqstan» گازەتىنە العىس ايتامىز.
ەسىلباي قادىرالين,
سوتسياليستىك ەڭبەك ەرى
كوكشەتاۋ
