كۇللى الەمدى ۇيگە قۋىپ تىققان ىندەتپەن الىسىپ العى شەپتە جاۋجۇرەك جانكەشتىلەر ءجۇر. دارىگەرلەر, پوليتسەيلەر, اسكەريلەر, ۆولونتەرلەر. جانە وسى مايداندى ۇيىمداستىرىپ رەسپۋبليكا, اكىمدىك باسشىلارى ءجۇر. ەڭ الدىمەن وسى ازاماتتارعا ەل اتىنان ەرەكشە العىس ايتامىز.
كوروناۆيرۋس بەتى قانشا قاتتى بولعانىمەن حالىق ءۇشىن, قازاقستان ءۇشىن ءبىزدىڭ كۇرەسكە توسقاۋىل بولا المادى. كەرىسىنشە, بۇل ىندەت ءبىزدى شيرىقتىرا ءتۇستى. جۇمىلدىرا ءتۇستى. سونىڭ ءبىر ايعاعى, كەشەگى وتكەن سەنات سايلاۋى. پرەزيدەنت قاسىم-جومارت توقاەۆ ۇسىنىسىمەن قازاقستان پارلامەنتى سەناتىنىڭ توراعالىعىنا جاس بۋىن وكىلى ماۋلەن اشىمباەۆ سايلاندى. تاۋەلسىزدىك تۇسىندا ەل باسقارۋداعى ەلباسى مەكتەبىنەن وتكەن جاس بۋىن. ەلىن, ءتىلىن, جەرىن جەرگە قاراتپايتىن وتانشىل ازامات. وسى وتىرىستا پرەزيدەنت توقاەۆ ءسوزىن ءبىر تىلدە, تەك مەملەكەتتىك تىلدە سويلەدى. ءسويتىپ ەڭسەمىزدى ءبىر كوتەرىپ تاستادى. ىشتەي كۇبىرلەپ وتىرمىز, وسى ءداستۇر ەندى ۇزىلمەي جالعاسا بەرسە ەكەن دەپ. وسىنداي تۇعىرلى جيىنداردا وزگە ەلدىڭ ەمەس, مەملەكەتتىك ءتىلىمىزدىڭ عانا تۋى جەلبىرەپ تۇرار بولسا, بۇگىنگىدەي ءتىل توڭىرەگىندەگى داۋ-داماي تۋىنداماس تا ەدى. مەملەكەتتىك ءتىلدىڭ توردە ءوز تۇعىرىندا تۇرعانىن كورگەن جۇرت ۋايىم جەمەس ەدى.ءتىل بىلمەيتىندەر ءۇن-ءتۇنسىز تۇقشىڭداپ قازاقستاننىڭ مەملەكەتتىك ءتىلىن ۇيرەنۋگە كىرىسە بەرەر ەدى.
ال پرەزيدەنتتىڭ «Egemen Qazaqstan» گازەتىنە دارحان قىدىرالىگە بەرگەن ەرەكشە سۇحباتىن وقىپ شىققاننان كەيىن ءوز اسەرىمىزدى قالىڭ وقىرمانمەن بولىسككەندى ءجون كوردىك.
سۇحبات باسىندا پرەزيدەنت الەمدى جايلاعان ىندەتتىڭ ەكونوميكالىق سالدارى قاي ەل ءۇشىن دە وڭاي بولمايتىنىن ايتىپتى. قازاقستان حالقى بۇل سۇراپىل سىناق سالدارىنان اۋىر زارداپ شەكپەس ءۇشىن بيىل جىل اياعىنا دەيىن اۋىل جاستارىنا ارناپ 250 مىڭ جۇمىس ورنى اشىلاتىنىن ايتىپتى. حالىقتى باسپانامەن قامتۋ باستى ماسەلە دەي كەلىپ, بيىلدان باستاپ كوپ بالالى جانە مۇگەدەك بالالى وتباسىلارعا ارنالىپ جىل سايىن شامامەن 10 مىڭ پاتەر بولىنەتىنى دە ايتىلىپتى. حالىق دەنساۋلىعىن قامتاماسىز ەتۋ ءۇشىن مەديتسينا عىلىمىن دامىتۋ مىندەت دەلىنگەن. قازاقستان ازىق-ت ۇلىك تاپشىلىعىن كورمەۋ ءۇشىن اۋىل شارۋاشىلىعىنا مەملەكەتتىك جاردەم مىندەتتى تۇردە كۇشەيتىلەتىنى دە ايتىلعان. ساياسي رەفورمالار دا قارقىن الا تۇسپەك. ەندىگى ءماجىلىس, ءماسليحات سايلاۋلارىندا جاستار مەن ايەلدەر كۆوتاسى 30 پايىزدان اسپاق. ءبىر جارىم ايعا سوزىلعان قالىڭ حالىقتى قىرقا ماتاپ قويعان كارانتين جاعدايى تۇزەلسە مامىردىڭ 11-ىندە الىنىپ تاستالىنادى دەلىنگەن. مۇنى وقىعاندا «ۋھ!», دەپ كەڭ تىنىس الدىق. بۇگىنگىدەي توقتاپ تۇرماي ءومىر ءوزىنىڭ قالىپتى ارناسىمەن ارقىراپ اعاتىن كۇنگە جەتكەندەي بولدىق. يىعىمىزدان ءزىلباتپان جۇك تۇسكەندەي بولدى. ەڭ قۋانارلىعى, پرەزيدەنت توقاەۆ, وسى سۇحباتىندا ۇلتتىق قۇندىلىقتارعا ۇلكەن ءمان بەرىپ, ايرىقشا توقتالىپتى. قالىڭ قازاقتى قاتتى الاڭداتىپ وتىرعان قازاق ءتىلى تۋرالى, ارتىق تا ەمەس, كەم دە ەمەس, بىلاي دەپتى:
«جاڭا سىن-سىناققا توتەپ بەرۋ ءۇشىن, ەڭ الدىمەن, ۇلتتىق قۇندىلىقتاردى قورعاي بىلگەن ءجون. انا ءتىلىمىزدى, سالت-ءداستۇرىمىزدى, ۇلتتىق سانا-سەزىمدى, قوعامدىق تاتۋلىق پەن كەلىسىمدى, بەرەكە-بىرلىكتى ساقتاي الماساق, كەلەر ۇرپاق ءبىزدى كەشىرمەيدى. اسىرەسە مەملەكەتتىك ءتىلدىڭ ماسەلەسى وتە ماڭىزدى. ءتىل ۇلتتىڭ تۇعىرى, ۇرپاقتىڭ عۇمىرى. قازاق ءتىلى قازاقتى الەمگە تانىتا الادى. حالىقتىڭ ءتىلى – حالىقتىڭ تولقۇجاتى. مۇنى ءاردايىم ەستە ساقتاۋ كەرەك. بىلە بىلسەك, ۇلتتىق قاۋىپسىزدىك ءتىلىمىزدى قادىرلەۋدەن باستالادى» دەگەن.
«اللاعا شۇكىر, پرەزيدەنت وسىلاي دەپتى, سەڭ قوزعالدى!», دەپ قۋانىشتارى قوينىنا سىيماي, تاڭ اتقالى تالاي ءتىل جاناشىرلارى حابارلاستى بىزگە. ايەلىمىز ۇل تاپقانداي ءماز بولىپ جاتىرمىز, ءبىر-ءبىرىمىزدى قۇتتىقتاپ.
«اللا تاعالا تۇسىرسە ەگەر ءامىرىن, ەكى دۇنيە سيار ەدى قاۋىزىنا تارىنىڭ» دەمەكشى, بۇگىندە, كوزگە كورىنبەيتىن ءبىر ۆيرۋس بۇكىل ادامزاتتىڭ «ەكى اياعىن ءبىر ەتىككە تىققانىن» كوز كوردى. بۇنداي جاعدايدا, ەڭ الدىمەن, ءوز ەلىڭدى ويلايدى ەكەنسىڭ. ەل تىزگىنىن قولعا العان ازاماتتىڭ ءار ويىمەن سوزىنە ءمان بەرەدى ەكەنسىڭ. ونىڭ ويى مەن ءسوزى كوڭىلدەن شىقسا كول بولىپ, كوڭىلدەن شىقپاسا ءشول بولادى ەكەنسىڭ. ويتكەنى, پرەزيدەنت حالىقتىڭ ويى, ءسوزى, جۇرەگى عوي. بولا بىلسە, بۇدان باسشى مەن ۇلت بىرلىگى قالىپتاسادى ەكەن. بۇل بىرلىكتەن ءتۇپتىڭ-تۇبىندە تاۋ كوتەرەر تولاعاي ۇلت تۋادى ەكەن. بىرلىگى مىقتى تولاعاي ۇلت تاريح داۋىلى شالقىپ قالاي سوقسا دا تامىرى تەرەڭ بايتەرەكتەي يىلسە دە سىنبايدى ەكەن. ءبىزدى وسىنداي تولاعاي ۇلت بولۋعا جازسىن, تاعدىر! بۇگىنگى پرەزيدەنت سۇحباتى ءبىزدى وسىنداي وپتيميستىك ويلارعا جەتەلەدى.
سماعۇل ەلۋباي,
جازۋشى
