ءبىرىنشى كەزەكتە مينيستر «تالدىقورعان – قالباتاۋ – وسكەمەن» اۆتوموبيل جولىنىڭ شىعىس قازاقستان جانە الماتى وبلىستارىنداعى ۋچاسكەلەرىنە باردى. جول الاكول كۋرورتتىق ايماعى ماڭىندا جاتاتىندىقتان, ەلىمىزدىڭ تۋريستىك كلاستەرىن دامىتۋدا ۇلكەن ماڭىزعا يە. بيىل اۆتوجولدا تولىقتاي قوزعالىس اشىلادى دەپ جوسپارلانىپ وتىر. جول 1-ءشى جانە 2-ءشى تەحنيكالىق ساناتتارعا سايكەستەندىرىلمەك.
وڭىرگە كەلەتىن تۋريستەر سانىن ارتتىرۋعا سەپتىگىن تيگىزەتىن تاعى دا ءبىر جوبا – قىتاي شەكاراسىنا دەيىن اپاراتىن ء«ۇشارال – دوستىق» تاسجولىن قايتا جاڭارتۋ جوباسى. جۇمىستار اياقتالعان سوڭ تۋريستەر سانى عانا ەمەس, اۆتوكولىكتەرىمەن جۇك تاسىمالىنىڭ كولەمى ارتادى. بيىل جولدىڭ 60 شاقىرىمىندا قوزعالىس اشىلادى دەپ جوسپارلانعان. سونداي-اق, وبلىس ءۇشىن ۇلكەن مۇمكىندىكتەرگە جول اشاتىن جوبالاردىڭ ءبىرى – «قالباتاۋ – مايقاپشاعاي» جولىن قايتا جاڭارتۋ جوباسى. تاسجولدىڭ 415 شاقىرىمىندا قوزعالىس بيىل اشىلادى. بۇل ەلدىمەكەندەر اراسىنداعى بارىس-كەلىستى ارتتىرىپ, قازاقستاننىڭ شىعىسىنان قىتايعا قاراي قوسىمشا ترانزيتتىك ءدالىز اشادى. ءۇشىنشى تەحنيكالىق ساناتتاعى جول ەكى جولاعى بار ەكىنشى ساناتتاعى جولعا اينالادى.
الماتى وبلىسىندا مينيستر «التىن وردا» بازارى ماڭىنداعى «الماتى – بىشكەك» اۆتوجولىنىڭ 16-19 شاقىرىمدارىن قايتا جاڭارتۋ جۇمىسىمەن تانىستى. مۇندا قۇرىلىس-مونتاجداۋ جۇمىستارى قارقىن العان. قالا ماڭىنداعى ەلدىمەكەندەردەن الماتىعا كەلەتىن كولىك سانىنىڭ كوپتىگىنە بايلانىستى جولدىڭ وتكىزۋ قابىلەتتىلىگى تومەن بولاتىن. 2020 جىلى بۇل جولدا قوزعالىس اشىلعاننان كەيىن ماسەلە تولىقتاي شەشىمىن تاپپاق.
مۇنىمەن قوسا, مينيستر بەيبىت اتامقۇلوۆ باستاعان توپ «الماتى – بىشكەك» جولىنىڭ 18+700 «اسىل ارمان» تۇرعىن ءۇي كەشەنى ۋچاسكەسىندەگى جۇمىستاردى تەكسەردى. بۇگىنگى تاڭدا مۇندا جول وتپەسىنىڭ نەگىزىن جايلاستىرۋ جۇمىستارى جانە شامالعان ستانتسياسىنىڭ بۇرما جولى ارقىلى وتەتىن «رف شەكاراسى (ەكاتەرينبۋرگ) – الماتى» (42 – 49 شاقىرىمى) تاسجولىن قايتا جاڭارتۋ جۇمىستارى جۇرگىزىلىپ جاتىر. قازىر جول ۋچاسكەسىندە قۇرىلىس-مونتاجداۋ جۇمىستارى ءجۇرىپ جاتىر. ەستاكادا ءى تەحنيكالىق ساناتقا ساي بولادى.
مينيستر سونداي-اق, قايتا جاڭارتۋ جۇمىستارى ءجۇرىپ جاتقان جامبىل جانە الماتى وبلىستارىنداعى «ۇزىناعاش – وتار» جولىنىڭ ۋچاسكەلەرىنە بارىپ قايتتى. جىل سوڭىنا دەيىن جولدىڭ 56 شاقىرىمىندا قوزعالىس اشىلادى دەگەن جوسپار بار. سونداي-اق, مينيسترلىك باسشىسى «قورداي» وتكىزۋ بەكەتىن قايتا جاڭارتۋ جۇمىستارى بارىسىمەن تانىستى. قازىر ەكى ەلدىڭ ازاماتتارى «قاراسۋ», «سورتوبە», «اۋقاتتى» بەكەتتەرى ارقىلى شەكارادان وتكىزىلۋدە. جاڭارتىلعان وتكىزۋ بەكەتى جىل سوڭىندا پايدالانۋعا بەرىلەدى. قايتا جاڭارتۋ جۇمىستارى اياقتالعان سوڭ «قورداي» بەكەتى تاۋلىگىنە 50 مىڭ ادامدى وتكىزە الادى.
وڭىردە «مەركى–بۋرىلبايتال», «كۇرتى–بۋرىلبايتال» جانە «بالقاش- بۋرىلبايتال» سياقتى تاعى بىرنەشە اۋقىمدى جوبا جۇزەگە اسىرىلىپ جاتىر. بۇگىنگى تاڭدا نىسانداردا قۇرىلىس جۇمىستارى قارقىن العان. جوبا ەلىمىزدىڭ وڭتۇستىك جانە ورتالىق وڭىرلەرىن بايلانىستىرىپ, ولاردىڭ ترانزيتتىك جانە تۋريستىك الەۋەتىن ارتتىرۋعا سەپتىگىن تيگىزەدى. «مەركى – بۋرىلبايتال» جولىنىڭ 262 شاقىرىمىندا قوزعالىس بيىل اشىلۋى ءتيىس. «كۇرتى – بۋرىلبايتال» جانە «بالقاش–بۋرىلبايتال» جولدارىندا قايتا جاڭارتۋ جۇمىستارى اياقتالعان سوڭ الماتىدان بالقاشقا دەيىن 4-5 ساعاتتىڭ ىشىندە جەتۋگە بولادى.
