ء«بىز بۇگىنگە دەيىن 250 مىڭنىڭ شاماسىندا 4 كاتەگوريا بويىنشا تەگىن تەست جاسادىق. ولار – شەت ەلدەن كەلگەندەر, كوروناۆيرۋسپەن اۋىرعاندار جانە ولارمەن بايلانىستا بولعاندار, كارانتين كەزىندە قىزمەتىن توقتاتپاعاندار (مەديتسينا قىزمەتكەرلەرى, اسكەري قىزمەتشىلەر, كوممۋنالدىق قىزمەت, ساۋدامەن اينالىساتىندار جانە ت.ب.), قارتتار ءۇيى كونتينگەنتى. ءۇشىنشى جانە ءتورتىنشى كاتەگورياداعىلاردىڭ 90%-ى تەستتەن ءوتتى. بارلىعى تەگىن (شامامەن, 70 مىڭ ادام). بۇل وڭاي شارۋا ەمەس, ءارى شىعىندى دا قاجەت ەتەتىن شارا. بيۋدجەتتىڭ 2,8 ملرد تەڭگەسى وسى باعىتقا جۇمسالدى», - دەدى مينيستر.
سونداي-اق مينيستر ەلدەگى ەپيدەميا ءالى توقتاماعانىن, دەگەنمەن, ەكونوميكانى كەزەڭ-كەزەڭمەن قالپىنا كەلتىرۋ كەرەك ەكەنىن اتاپ ءوتتى.
«بولاشاقتا ەپيدەميا جاعدايى تۇراقتالعان سوڭ حالىقتى ءۇش باعىت بويىنشا تەستىلەۋگە كوشۋ ماسەلەسى قولعا الىنباق. ياعني, ۆيرۋس جۇقتىرعاندار جانە ولارمەن بايلانىستا بولعانداردى تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) اياسىندا بيۋدجەت ەسەبىنەن تەستىلەۋ, الەۋمەتتىك كەستە بويىنشا جۇمىس ىستەيتىن ساقتاندىرىلعان ازاماتتاردى – ءمامس ەسەبىنەن. مەديتسينالىق قىزمەتكەرلەر مەن اسكەريلەردى مەملەكەتتىك قارجىلاندىرۋ ەسەبىنەن تەستىلەۋ مۇمكىندىگى قارالىپ جاتىر. ال, قالعاندارىن اقىلى تۇردە تەستىلەۋ», - دەدى ەلجان ءبىرتانوۆ.
