شىعىس قازاقستان: دوستىق ءۇيى چەللەندج باستادى

شىعىس قازاقستان وبلىسىنىڭ قازاقستان حالقى اسسامبلەياسى حاتشىلىعى مەن دوستىق ءۇيى قازاقستان حالقىنىڭ بىرلىگى كۇنى قۇرمەتىنە چەللەندج باستادى.

ونىڭ باستى ماقساتى – وبلىستىڭ مادەني مۇراسىن ناسيحاتتاپ، دياسپورالار اراسىنداعى كەلىسىمدى نىعايتۋ.

«توتەنشە جاعداي كەزىندە ارامىز الىس بولسا دا، ءبىر-بىرىمىزگە تىلەكشى، باۋىرمال حالىقپىز. ءبىر شاڭىراق استىندا تاتۋ-ءتاتتى ءومىر ءسۇرىپ، قيىن-قىستاۋ شاقتا ءبىر-بىرىمىزگە دەمەۋ بولامىز.

جوعارىدا اتالعان چەللەندجدى ورىس، ۋكراين، بەلورۋس، نەمىس ەتنومادەني بىرلەستىكتەرى جانە «اقنيەت» ۆوكالدىق ءانسامبلى، انالار كەڭەسى، بەسقاراعاي اۋداندىق دوستىق ءۇيىنىڭ «دوسStar» جاستار كلۋبى قولداپ، بىردەن ءىلىپ اكەتتى. چەللەندجگە قاتىسۋشىلار مەملەكەتتىك تۋىمىزدى ءبىر-بىرلەرىنە جولداپ، «مەنىڭ وتانىم – قازاقستان! ءبىز بىرگەمىز!» دەپ ۇرانداپ، ەستافەتا قىزۋ تۇردە جالعاسىپ جاتىر. ءار دياسپورانىڭ كوز تارتار ۇلتتىق كيىمدەرى شارانىڭ ءسانىن كىرگىزە تۇسكەندەي. چەللەندجدىڭ باستالعانىنا كوپ بولماسا دا، عالامتوردا جاقسى تارالۋدا. بەينەروليكتى دوستىق ءۇيى – قوعامدىق كەلىسىم ورتالىعىنىڭ ينستاگرام پاراقشاسىنان كورە الاسىزدار. ايتا كەتەيىك، چەلەندجدى قابىل العان پاۆلودارلىق دوستارىمىز جۋىق ارادا جالعاستىرادى» دەيدى شىعىس قازاقستان وبلىسى قحا حاتشىلىعىنىڭ مەڭگەرۋشىسى جاننا اسقاروۆا.

شىعىس قازاقستان وبلىسى