ورمان دالا ورتتەرىنىڭ جيىلەپ كەتۋىنە بايلانىستى ءتىلسىز جاۋعا قارسى كۇرەس جانە قاۋىپسىزدىك شارالارى كۇشەيتىلۋدە. بۇل باعىتتا قالا اۋدان اكىمدەرىنە جانە مەملەكەتتىك مەكەمە باسشىلارىنا ناقتى تاپسىرمالار بەرىلگەن. «سونىمەن قاتار, وبلىس اكىمىنىڭ ءبىرىنشى ورىنباسارىنا 2020 جىلدىڭ ءورت قاۋىپتى ماۋسىمىندا وبلىس اۋماعىندا ورمان, دالا ورتتەرىنىڭ الدىن الۋ جانە جويۋ جونىندەگى ءىس-شارالار جوسپارى ازىرلەنىپ, بەكىتۋگە ۇسىنىلدى», دەدى وڭىرلىك كوممۋنيكاتسيالىق قىزمەتىندە وتكەن بريفينگتە وبلىستىق توتەنشە جاعدايلار دەپارتامەنتى باستىعىنىڭ ورىنباسارى ەرالى اقىلبەكوۆ.
جىل باسىنان بەرى ورىن العان 15 ورمان دالا ورتتەرىنىڭ 12-ءسى «سىرداريا-تۇركىستان مەملەكەتتىك وڭىرلىك تابيعي پاركى» كوممۋنالدىق مەملەكەتتىك مەكەمەسىنە قاراستى جەردە ورىن العان, 1 جاعداي سوزاق اۋدانىندا, تاعى 2 ءورت «وتىرار ورمان جانە جانۋارلار الەمىنىڭ قورعاۋ جونىندەگى مەملەكەتتىك مەكەمەسى» كوممۋنالدىق مەملەكەتتىك مەكەمەسىندە تىركەلگەن. وتكەن جىلدىڭ 3 ايىندا ەشقانداي ءورت وقيعاسى ورىن الماعان ەكەن. جالپى وتكەن جىلى 5 ءورت وقيعاسى تىركەلگەن. سالدارىنان 63,1 گەكتار جەر وتقا ورانىپ, ورمان شارۋاشىلىعىنا 562,2 مىڭ تەڭگە شىعىن كەلگەن.
تۇركىستان وبلىسى
