– جاڭا جۇيەگە قاتىستى ستۋدەنتتەردىڭ شاعىمى بار ما؟ وقۋ پروتسەسى قالاي ءجۇرىپ جاتىر؟
– پاندەميا ەلىمىزدەگى ءبىلىم سالاسىنىڭ بارلىق دەڭگەيىنە دە اسەر ەتكەنى ءمالىم. بۇقارالىق اقپارات قۇرالدارىنان, الەۋمەتتىك جەلىلەردەن مەكتەپ وقۋشىلارىنىڭ قاشىقتان وقۋعا بايلانىستى كورگەن قيىنشىلىقتارىن, ۇيرەنىسە الماي جاتقانىن وقىپ, كورىپ وتىرمىز. بۇل ماسەلە جوعارعى وقۋ ورىندارىن دا اينالىپ وتكەن جوق. ستۋدەنتتەر تاراپىنان ينتەرنەت جىلدامدىعىنىڭ ناشار ەكەنى تۋرالى شاعىمدار ءجيى ايتىلدى. وعان قوسا قاشىقتان وقۋعا قاجەت پلاتفورمالار مەن پورتالداردىڭ اشىلماۋى, كەيبىر ستۋدەنتتەردە وقۋعا قاجەتتى قۇرىلعىلاردىڭ, ياعني كومپيۋتەر, روۋتەردىڭ جەتىسپەۋشىلىگى سياقتى قيىندىقتار تۋىندادى. بۇل ماسەلەلەردىڭ بارلىعى ءتيىستى ورگاندارعا حابارلاندى. بۇگىندە ءبىلىم جانە عىلىم مينيسترلىگى مەن ۋنيۆەرسيتەت رەكتورلارى قاجەت شارالاردى تالقىلاۋ ۇستىندە.
– وسى ماسەلەگە بايلانىستى ستۋدەنتتەر اليانسى ءبىلىم الۋشىلار مەن وقۋ ورىندارىنىڭ اراسىنداعى كوپىر رەتىندە قانداي مىندەتتەر اتقارادى؟
– جۋىردا 20 ءساۋىر كۇنى ءبىلىم جانە عىلىم مينيسترلىگى وكىلدەرى, ۋنيۆەرسيتەت رەكتورلارىمەن ۆيدەو-كونفەرەنتسيا ءوتتى. ستۋدەنتتەردىڭ اتىنان اتالعان جيىنعا قاتىستىم. ۇيىمعا كەلىپ تۇسكەن حاتتاردى, الەۋمەتتىك جەلىدە قوزعالعان سۇراقتاردى سارالاپ, تيىستىلەرىن سول كونفەرەنتسيادا ايتتىم. قۇزىرلى ورگاندار ستۋدەنتتەردىڭ ماسەلەسىنەن تولىقتاي حاباردار. وقۋ جىلى قورىتىندىلاناتىن كەز جاقىنداعان سايىن ستۋدەنتتەردى ەمتيحان, مەملەكەتتىك اتتەستاتسيا ماسەلەلەرى كوبىرەك تولعاندىرادى. كونفەرەنتسيادا بەلگىلى بولعانداي, ءبىلىم جانە عىلىم مينيسترلىگىنىڭ 2018 جىلعى بۇيرىعىنا سايكەس, ءار وقۋ ورنى ارنايى كوميسسيا قۇرىپ, ەمتيحان الۋ رەتىن ءوزى شەشەتىن بولادى. وسى ورايدا ەلىمىزدەگى ءبىلىم جۇيەسى بولون پروتسەسىنە نەگىزدەلگەنىن, ياعني ستۋدەنتتەردىڭ تاڭداۋىنا باسىمدىق بەرىلەتىنىن ەسكە سالىپ, ەمتيحان رەتىن بەلگىلەۋگە ستۋدەنتتەردى ارالاستىرىپ, ولاردىڭ ويىنا قۇلاق اسسا دەگەن تىلەگىمدى جەتكىزدىم.
– بيىل ۇيىمنىڭ قۇرىلعانىنا 15 جىل تولىپتى. وسىعان وراي قانداي باستامالار قولعا الىندى؟
– نەگىزى, 15 جىلدىققا بايلانىستى جوسپار كوپ بولاتىن. دەگەنمەن كارانتين كەزىندە ولاردىڭ بارلىعىن ىسكە اسىرۋ مۇمكىندىگى جوق. الايدا حاكىم اباي اتامىزدىڭ 175 جىلدىعىنا وراي جاستار اراسىندا ۇلى اقىننىڭ ولەڭدەرىن, قارا سوزدەرىن الەۋمەتتىك جەلىلەردە ناسيحاتتاۋدامىز. وسىعان وراي كارانتين كەزىندە بوس ۋاقىتتى ءتيىمدى پايدالانۋعا شاقىرىپ, جاستار عىلىمي زەرتتەۋ ورتالىعىمەن بىرلەسىپ كىتاپ وقۋ مارافونىن باستادىق. ناتيجەسى جامان ەمەس. جاستاردىڭ اراسىندا بەلسەندى, كىتاپقۇمارلار سانى دا كوپ. سونىمەن بىرگە ۆيرۋستىڭ الدىن الۋعا قاتىستى اقپارات تاراتىپ, ءتۇسىندىرۋ جۇمىستارىن جۇرگىزىپ كەلەمىز. بۇل دا ىندەتتەن ساقتانۋدىڭ ءبىر جولى. ءار وبلىستا Nur Otan پارتياسىمەن بىرلەسىپ جۇمىس ىستەپ جاتقان ۆولونتەرلىك توپتارىمىز بار. مەرەيتوي قارساڭىندا ءار وبلىستا 1500 ماسكا, 150 قولعاپ تاراتىپ, الەۋمەتتىك جاعدايى تومەن 15 وتباسىعا كومەك كورسەتىلدى.
– رەسپۋبليكامىزدىڭ تۇكپىر-تۇكپىرىندەگى ستۋدەنتتەرمەن بايلانىس جولعا قويىلعان با؟
– ءار وبلىستىڭ اكىمدىگىمەن بايلانىس ورناتىلعان. سوندىقتان ستۋدەنتتەرمەن بايلانىسىمىز ەش ۇزىلمەيدى. ولار كەز كەلگەن ۋاقىتتا, ءارتۇرلى ماسەلەمەن حابارلاسا الادى. قاشىقتان وقۋ ءالى جالعاسادى. سوندىقتان مينيسترلىك تاراپىنان قابىلدانعان ءاربىر شەشىم مەن حابار مىندەتتى تۇردە ستۋدەنتتەرگە جەتكىزىلەدى. جاڭا جۇيەنى دامىتۋعا دا كومەگىمىزدى ايامايمىز. ءبىلىم جانە عىلىم ءمينيسترى ايتقانداي, وسى جاعدايدان كەيىن ءبىلىم جۇيەسى وزگەرە تۇسپەك. ال جاستار وعان دايىن بولعانىمىز ابزال. ءبىزدىڭ ۇيىم زامان تالابىنا ساي, تەحنولوگيادان حابارى بار, كوزى اشىق جاستاردى قالىپتاستىرۋدى ماقسات ەتەدى.
– اڭگىمەڭىزگە راحمەت.
اڭگىمەلەسكەن
سۆەتلانا عالىمجانقىزى,
«Egemen Qazaqstan»
