وڭىرلىك كوممۋنيكاتسيالار قىزمەتىنىڭ مالىمەتىنە سۇيەنسەك, بۇل ءۇشىن دەمەۋشىلەر مەن بەلسەندى كاسىپكەرلەر تارتىلعان. سونىڭ ىشىندە «مۇنايسەرۆيس» جشس-ءنىڭ باسشىلىعى 156 مىڭ ماسكاگا جەتەتىن 12 000 مەتر ماتا ساتىپ الىپ بەرگەن. بۇل ماتادان بىرنەشە كاسىپورىن («Sari Suppliers», «Safety Systems», «Mastertex», «ساڭىراۋلار قوعامى وك», «ەرتري» جشس) مەن ەرىكتى جاستار توبى ماسكالاردى تەگىن تىگۋدە. بۇگىنگە دەيىن 12 مىڭ ماسكا تىگىلىپ, الەۋمەتتىك ءالسىز توپ مۇشەلەرىنە, الدىڭعى شەپتە قىزمەت كورسەتىپ جۇرگەن ازاماتتارعا تەگىن تاراتىلا باستادى.
وبلىس اكىمىنىڭ ورىنباسارى ەرجان ءابىلحانوۆتىڭ ايتۋىنشا, وبلىس اكىمدىگى بۇعان دەيىن ءىرى كومپانيالاردى تارتىپ, ءوڭىردىڭ مەديتسينالىق قىزمەتكەرلەرىنە قاجەتتى قۇرال-جابدىقتار العان. ەندىگى كەزەكتە الەۋمەتتىك ءالجۋاز توپتار مەن الدىڭعى شەپتە جۇرگەندەردى تەگىن ماسكامەن قامتاماسىز ەتۋ جۇمىسى جۇرگىزىلۋدە. الداعى ۋاقىتتا مۇنداي شارالار جالعاسىن تابادى.
اكىمدىكتىڭ تەگىن ماسكا تىگىپ تاراتۋ شاراسىنا اتسالىسقانداردىڭ ءبىرى – 32 جۇمىسشىسى بار «Master Tex Atyrau» جشس-ءنىڭ ديرەكتورى بولاتبەك تولەۋبەكتىڭ ايتۋىنشا, كاسىپورىن كۇن سايىن 800 قورعانىش ماسكاسىمەن بىرگە, وبلىستاعى مەديتسينا قىزمەتكەرلەرىنە ارنالعان كومبينەزون دا تىگىپ جاتىر.
– قازاقستان پرەزيدەنتى قاسىم-جومارت توقاەۆ وتاندىق بيزنەستى قازىرگى قيىن كەزەڭدە كوروناۆيرۋس ينفەكتسياسىمەن كۇرەسكە كومەكتەسۋگە شاقىرعان بولاتىن. ءبىزدىڭ كاسىپورىندا 20 تىگىنشى تاۋلىگىنە 800-گە دەيىن قورعانىش ماسكاسىن تىگەدى. بۇگىنگە دەيىن 12 مىڭ دانادان استام ماسكا دايىندالدى. ولار مۇقتاج جاندارعا تەگىن تاراتىلۋدا. سونىمەن قاتار, اۋرۋحانالارداعى دارىگەرلەرگە دە ءبىر رەتتىك قورعانىش كومبينەزونىن دا تىگەمىز,-دەيدى بولاتبەك تولەۋبەك.
ماسكالار ەرىكتىلەر ۇيىمى مەن الەۋمەتتىك قامسىزداندىرۋ باسقارمالارى مەن بولىمدەرى ارقىلى تاراتىلۋدا. سونداي-اق, وبلىستا جەكە كاسىپكەرلەر, كاسىپورىندار مەن جەكەلەگەن ازاماتتاردىڭ تىگىپ, ساتىپ جاتقان ماسكالارىنا مونيتورينگ جۇرگىزىلۋدە. قازىر وبلىستا شامامەن كۇنىنە 25 مىڭ ماسكا تىگىلىپ, ساتىلۋدا.
جولداسبەك كوشەرباي ۇلى
