«ەنەرگەتيكا ءمينيسترىنىڭ بۇيرىعىمەن اباي مۇحتار ۇلى شاڭعىتباەۆ اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ توراعاسى قىزمەتىنە تاعايىندالدى» دەلىنگەن مينيسترلىكتىڭ ءباسپاسوز قىزمەتى تاراتقان اقپاراتتا.
اباي شاڭعىتباەۆ قازاق پوليتەحنيكالىق ينستيتۋتىن بىترگەن. ەڭبەك جولىن 1988 جىلى «زاپكازەنەرگو» رۋ ەلەكتر جەلىلەرىنىڭ وڭتۇستىك كاسىپورنىندا بايلانىس ەلەكترومونتەرى, رەلەلىك قورعاۋ جانە اۆتوماتيكا قىزمەتىنىڭ ينجەنەرى بولىپ باستاعان. ءار جىلدارى قر يندۋستريا جانە جاڭا تەحنولوگيالار مينيسترلىگىنىڭ مەملەكەتتىك ەنەرگەتيكالىق قاداعالاۋ جانە باقىلاۋ كوميتەتى اۋماقتىق بولىمشەلەردى ۇيلەستىرۋ, مونيتورينگ جانە جەكە جانە زاڭدى تۇلعالاردىڭ وتىنىشتەرىمەن جۇمىس باسقارماسىنىڭ باس ساراپشىسى, تۇتىنۋشىلاردىڭ ەلەكتر جەلىلەرى مەن ەلەكتر قوندىرعىلارىن قاداعالاۋ جانە باقىلاۋ باسقارماسىنىڭ باستىعى, قر ەنەرگەتيكا مينيسترلىگى ەلەكتر ەنەرگەتيكاسى دەپارتامەنتى ديرەكتورىنىڭ ورىنباسارى, قر ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ استانا قالاسى بويىنشا اۋماقتىق دەپارتامەنتىنىڭ باسشىسى قىزمەتتەرىن اتقارعان. 2016 جىلدان جاڭا قىزمەتكە تاعايىندالعانعا دەيىن قر ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتى توراعاسىنىڭ ورىنباسارى بولعان.
