وتكەن اپتادا قالادا كارانتين رەجيمىن بۇزعانى ءۇشىن 800-دەن استام ازامات اكىمشىلىك جاۋاپكەرشىلىككە تارتىلدى, ونىڭ 32-ءى قاماۋعا الىندى, قالعاندارىنا ايىپپۇل سالىندى. نۇر-سۇلتان قالاسى بويىنشا اكىمشىلىك پوليتسيا باستىعى ەلجان شوپەكوۆتىڭ ايتۋىنشا, كارانتين كەزىندە قالا كوشەلەرىندە بەس مىڭعا جۋىق پوليتسيا قىزمەتكەرلەرى قوعامدىق ءتارتىپتى قاداعالاۋدا.
«قالا تۇرعىندارىنىڭ كوبى ءتارتىپتى بۇزىپ جاتقان جوق, الايدا پوليتسيانى الداۋعا تىرىساتىن تۇرعىندارىمىز دا بار. شاعىن كاسىپورىن يەلەرى ازاماتتار قالا ىشىندە كەدەرگىسىز, ەركىن ءجۇرىپ-تۇرۋى ءۇشىن جۇمىس ورنىنان جالعان انىقتامالار بەرگەن. ولار اكىمشىلىك, ءتىپتى قىلمىستىق جاۋاپكەرشىلىككە تارتىلۋى مۇمكىن», – دەپ اتاپ ءوتتى ە. شوپەكوۆ.
سوڭعى اپتادا ايىپپۇل تۇراعىنا 400-گە جۋىق اۆتوكولىك جونەلتىلىپ, 500-دەن استام مەملەكەتتىك ءنومىر تاركىلەندى.
«كارانتيننىڭ ءبىرىنشى كۇنىنەن باستاپ ءتارتىپ بۇزعانى ءۇشىن اكىمشىلىك جاۋاپكەرشىلىككە شامامەن ءۇش مىڭ ادام تارتىلدى. پوليتسيا تۇرعىنداردى كارانتين رەجيمىن بۇزباۋعا جانە قاۋىپسىزدىك شارالارىن ساقتاۋعا شاقىرادى. ءوزىڭىزدىڭ جانە جاقىندارىڭىزدىڭ دەنساۋلىعىن ويلاڭىز», - دەدى شوپەكوۆ.
