مەملەكەت باسشىسى, قازاقستان قارۋلى كۇشتەرىنىڭ باس قولباسشىسى قاسىم-جومارت توقاەۆتىڭ جارلىعىن ورىنداۋ ماقساتىندا باتىس قازاقستان وبلىسىندا دا دايىندىق جۇمىستارى اتقارىلۋدا. مەملەكەت باسشىسىنىڭ شاقىرۋىن اقجايىقتىقتار قىزۋ قولدادى. جارلىق شىققان كۇننەن بەرى 300-گە جۋىق باتىسقازاقستاندىق ازامات ءوز ەركىمەن ارناۋلى جيىنعا بارۋعا ءوتىنىش ءبىلدىردى.
شاقىرىلاتىن اسكەري مىندەتتىلەردىڭ سانىن جانە ارناۋلى جيىنداردى وتكىزۋ مەرزىمىن ءار ءوڭىردىڭ ىشكى قاجەتتىلىگىنە قاراي جەرگىلىكتى اتقارۋشى ورىندار شەشەدى. اسكەري مىندەتتىلەردى ارنايى جيىنعا شاقىرۋ ءۇش ايعا دەيىن سوزىلۋى مۇمكىن. قازىرگى تاڭدا ءتيىستى قۇجاتتار دايىندالۋدا.
ارناۋلى جيىندارعا الىنۋشىلار وبلىس اۋماعىندا توتەنشە جاعداي تالاپتارىن ساقتاۋعا, زارارسىزداندىرۋ شارالارىن وتكىزۋگە, بلوك-بەكەتتەردە جانە قالا ىشىندە پاترۋلدىك كەزەكشىلىك اتقارۋعا جۇمىلدىرىلاتىن بولادى. سوندىقتان ءوتىنىش بىلدىرۋشىلەردىڭ ىشىندە بۇرىن زارارسىزداندىرۋ جۇمىستارىنا قاتىسى بار ماماندارعا, مەديتسينالىق سالادا جۇمىس ىستەگەندەرگە, ۇلتتىق ۇلاندا, قالالىق پاترۋلدە اسكەري قىزمەتىن وتەگەندەرگە كوڭىل بولەمىز. ارينە نيەت بىلدىرگەندەر كوميسسيادان وتسە عانا اسكەري قىزمەتكە قابىلدانادى. ولار قازاقستان قارۋلى كۇشتەرى قاتارىنا ەنگىزىلگەننەن كەيىن «اسكەري قىزمەت جانە اسكەري قىزمەتشى تۋرالى» زاڭىنا سايكەس الەۋمەتتىك سيپاتتاعى بارلىق جەڭىلدىكتى پايدالانادى.
جاقىندا عانا قاپشاعاي گارنيزونىنان 150 اسكەري قىزمەتشى ورال قالاسىنا اكەلىندى. ولار بىردەن وبلىس ورتالىعىندا دەزينفەكتسيالىق شارالاردى اتقارۋعا اتسالىستى. قازىر قالا مەن وبلىس اۋماعىنداعى بلوك-بەكەتتەرگە, قالا ىشىندەگى پاترۋلدىك كۇزەتكە كومەكتەسىپ جاتىر. جاعداي تولىق باقىلاۋدا.
وتان قورعاۋ – قازاقستان رەسپۋبليكاسىنىڭ ءار ازاماتىنىڭ ابىرويلى بورىشى. سونىڭ ىشىندە ەل باسىنا كۇن تۋعان ساتتە, بۇكىل الەمدى ابىگەرگە سالعان كوروناۆيرۋس ىندەتىمەن كۇرەستە اسكەري مىندەتتى ازاماتتار ءوز ەركىمەن الدىڭعى شەپكە شىعۋى زاڭدى. سوندىقتان ارناۋلى جيىنداردىڭ قۇرىلۋى – تەك قاجەتتىلىكتەن تۋعان ماسەلە ەمەس, پاتريوتتىق شارا دەپ ەسەپتەيمىن. بۇل ءبىزدىڭ بىرلىگىمىزدى, وتانشىلدىعىمىزدى كورسەتەدى. ءبىز ءبىر بولساق, كەز كەلگەن قيىندىقتى جەڭىپ شىعاتىنىمىز انىق.
ماقسات مۇقانوۆ,
پولكوۆنيك, باتىس قازاقستان وبلىسى اكىمىنىڭ اسكەري قاۋىپسىزدىك جانە قورعانىس ماسەلەلەرى جونىندەگى كومەكشىسى
