قوعام • 08 ءساۋىر، 2020

«جۇمىلا كوتەرگەن جۇك جەڭىل» - اقان ابدۋاليەۆ

155 رەتكورسەتىلدى

قازاق قاي زاماننان دا سابىرمەن دوس، اقىلمەن جولداس حالىق. سونىڭ ارقاسىندا نەشە ءتۇرلى قيىن-قىستاۋ زاماننان ءوتىپ، شەكاراسىن شەگەندەپ، ەل-جۇرتىن تۇگەندەپ، وسى بەيبىت كۇنگە جەتتى. الەم جۇرتىن الاڭداتقان اتى جامان اۋرۋدان دا قۇتىلۋدىڭ ءبىر جولى – سول بىرلىكتە بولسا كەرەك-ءتى.

ەلباسى نۇرسۇلتان ءابىش ۇلى نازارباەۆتىڭ «بىرلەسە بىلگەن ەل ءبارىن جەڭەدى» ماقالاسى ۇلت كوشباسشىسىنان دەمەۋ كۇتكەن حالىققا ۇلكەن ءۇمىت پەن بولاشاققا سەنىم سىيلاعان، دەر كەزىندە جولدانعان ۇندەۋ بولدى دەر ەدىم. قازاقستان حالقىنا ەلباسىنىڭ ۇندەۋىنىڭ ماڭىزى زور. ويتكەنى، تاۋەلسىز قازاقستاننىڭ تۇڭعىش پرەزيدەنتى – ەلباسى ادامزات بالاسىنا ءبىر ەمەس، بىرنەشە جاھاندىق جوبا ۇسىنعان جانە ونىڭ جۇزەگە اسۋىنا تىكەلەي ىقپال ەتكەن تاريحي تۇلعا. اشۋدى اقىلعا جەڭگىزىپ، كۇمان مەن كۇدىكتى ۇمىتكە ۇلاستىرا بىلەتىن بىتىمگەر باسشى تورتكۇل دۇنيەنى مامىلەگەرلىگىمەن، باستاماشىلدىعىمەن، بەيبىتقۇمارلىعىمەن ءتانتى ەتىپ، ەلدىڭ ىقىلاسىنا بولەنىپ كەلەدى. بۇعان ەلباسىنىڭ حالىقارالىق جيىنداردىڭ بيىك مىنبەرلەرىنەن جاساعان مالىمدەمەلەرى مەن جاھان جۇرتى جۇمىلىپ جۇزەگە اسىرىپ جاتقان جارقىن جوبالارى دالەل. بۇكىل الەممەن قوسا، الماعايىپ زاماننىڭ تابالدىرىعىنا تاپ بولعان قازاق ەلىنە جاساعان بۇگىنگى مالىمدەمەسى دە، ەلگە سەرپىن، جاستارعا جالىن بەرەرى انىق.

وسىنداي قيىن ساتتە ۇلت كوشباسشىسى حالىقتىڭ قامىن ويلاپ، ەل ەرتەڭى ءۇشىن الاڭداۋشىلىق تانىتىپ وتىر. ادامزاتتىڭ جۇرەگىنە جارا بولىپ جابىسقان جاھاندىق جاعدايعا الاڭ كوڭىلمەن قارايتىن، ونىڭ ىشىندە قازاق ەلىنىڭ ەرتەڭى ءۇشىن باتىل شەشىمگە بارا الاتىن ەلباسى بۇگىن دە ارقاشان ەل-جۇرتپەن بىرگە ەكەنىن كورسەتتى. ۇلت زيالىلارى مەن جاستارعا ۇندەۋ جولداپ، الەمدىك تىعىرىقتان شىعۋى، مەملەكەتىمىزدىڭ بۇل قيىندىقتان ءوتىپ كەتۋىنە قاتىستى كورەگەن شەشىم ايتتى دەۋگە بولادى. ارينە، ول – ەل بىرلىگى. ۇلتتىڭ تۇتاستىعى دا، حالىقتىڭ ىنتىماعى قازىر ەڭ ماڭىزدى كۇش. «جۇمىلا كوتەرگەن جۇك جەڭىل» ەكەنىن ۇمىتپايىق. ەلباسى باستاماسىن قولداپ، قيىن كەزەڭدە ەلدىگىمىزدى، بىرلىگىمىزدى كورسەتەيىك.

ءبىز – بىرگەمىز! بارلىق قيىندىقتى بىرگە جەڭەمىز! ەل – امان، جۇرت تىنىش بولسىن!

 

اقان ابدۋاليەۆ،

قازاقستان رەسپۋبليكاسىنىڭ ەڭبەك سىڭىرگەن قايراتكەرى، ت.ق.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى

 

 

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار