يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ, نۇر-سۇلتان قالاسىنىڭ اكىمى التاي كولگىنوۆ, شىمكەنت قالاسىنىڭ اكىمى مۇرات ايتەنوۆ جانە باتىس قازاقستان وبلىسىنىڭ اكىمى عالي ەسقاليەۆ, سونداي-اق پرەمەر-ءمينيستردىڭ ورىنباسارى رومان سكليار بايانداما جاسادى.
وسى جىلى «نۇرلى جەر» باعدارلاماسى اياسىندا 15 ملن شارشى مەتر تۇرعىن ءۇي سالۋ جوسپارلانعان. حالىقتىڭ الەۋمەتتىك جاعىنان وسال توپتارى, از قامتىلعاندار مەن جاستار, بيۋدجەتتىك ۇيىمداردىڭ قىزمەتكەرلەرى قاتارىنان 32 مىڭنان اسا وتباسى جالعا بەرىلەتىن جانە كرەديتتىك پاتەرلەرمەن قامتاماسىز ەتىلەدى.
«قاراپايىم زاتتار ەكونوميكاسى» جەڭىلدىكتى نەسيەلەۋ باعدارلاماسى اياسىندا قازىرگى كەزدە وتاندىق قۇرىلىس يندۋسترياسى بويىنشا 178 ملرد تەڭگەنى قۇرايتىن 33 جوبا ىسكە اسىرىلىپ جاتىر (شىنى, ارماتۋرا, سانفايانس, كەراميكا تاقتاشالارى, لاك بوياۋلارىن شىعارۋ). ولاردى ىسكە قوسۋ تۇرعىن ءۇي قۇرىلىسىندا قازاقستاندىق ۇلەستى 95%-عا ارتتىرۋعا جانە 8 مىڭداي جاڭا جۇمىس ورنىن قۇرۋعا مۇمكىندىك بەرەدى.
«قازىرگى جاعدايداعى ۇكىمەتتىڭ ەڭ ماڭىزدى مىندەتى – قۇرىلىس قارقىنىن ۇلعايتۋ, حالىقتى تۇرعىن ۇيمەن قامتۋ, جۇمىس ورىندارىن ساقتاۋ جانە جاڭا جۇمىس ورىندارىن قۇرۋ. بۇگىندە قۇرىلىس سالاسىندا شامامەن 700 مىڭ ادام جۇمىس ىستەيدى», — دەپ ا. مامين, قۇرىلىس سالاسىنىڭ ەكونوميكانىڭ نەگىزگى درايۆەرلەرىنىڭ ءبىرى ەكەنىن اتاپ ءوتتى.
پرەمەر-مينيستر قۇرىلىس ماۋسىمىن ۋاقىتىندا باستاۋدى, جوسپارلانعان تۇرعىن ءۇي كولەمىن بەرۋدى جانە بولىنگەن قاراجاتتىڭ تولىق يگەرىلۋىن قامتاماسىز ەتۋدى تاپسىردى.
ۇكىمەت باسشىسى اكىمدەرگە قۇرىلىستىڭ جەدەل قارقىنىن قامتاماسىز ەتۋدى, قارجىلاندىرۋ جوسپارلارىن تۇزەتۋدى جانە بۇعان دەيىن مالىمدەلگەن مەرزىمدەردى قايتا قاراۋدى, سونداي-اق قۇرىلىستىڭ مالىمدەلگەن كولەمى بويىنشا بارلىق جوبالىق قۇجاتتامانى ازىرلەۋدى اياقتاۋدى تاپسىردى.
ا. مامين يندۋستريا جانە ينفراقۇرىلىمدىق دامۋ مينيسترلىگىنە «اتامەكەن» ۇكپ-مەن بىرلەسىپ «قاراپايىم زاتتار ەكونوميكاسى» باعدارلاماسى اياسىندا جۇزەگە اسىرىلىپ جاتقان قۇرىلىس يندۋسترياسى جوبالارىنىڭ ۋاقىتىلى ەنگىزىلۋىن قامتاماسىز ەتۋدى جانە وتاندىق جاڭا وندىرىستەردى قۇرۋ جۇمىسىن جانداندىرۋدى تاپسىردى.
