كەشە استانانىڭ «Rixos» قوناقۇيىندە يندونەزيا رەسپۋبليكاسىنىڭ پرەزيدەنتى سۋسيلو بامبانگ يۋدويونونىڭ قازاقستانعا مەملەكەتتىك ساپارى اياسىندا قازاقستان-يندونەزيا بيزنەس قاۋىمداستىعىنىڭ فورۋمى بولىپ ءوتتى.
كەشە استانانىڭ «Rixos» قوناقۇيىندە يندونەزيا رەسپۋبليكاسىنىڭ پرەزيدەنتى سۋسيلو بامبانگ يۋدويونونىڭ قازاقستانعا مەملەكەتتىك ساپارى اياسىندا قازاقستان-يندونەزيا بيزنەس قاۋىمداستىعىنىڭ فورۋمى بولىپ ءوتتى.
ونى يندۋستريا جانە جاڭا تەحنولوگيالار مينيسترلىگى, «قازنەكسينۆەست» اقپەن قازاقستاننىڭ ساۋدا-ەكونوميكالىق پالاتاسى يندونەزيانىڭ ەكونوميكا مينيسترلىگى جانە قازاقستانداعى ەلشىلىگى مەن ىنتىماقتاسا وتىرىپ ۇيىمداستىردى. فورۋم جۇمىسىن قازاقستاننىڭ ساۋدا-ەكونوميكالىق پالاتاسىنىڭ پرەزيدەنتى سابىر ەسىمبەكوۆ اشىپ, جۇرگىزىپ وتىردى. قازاقستاننىڭ ەكونوميكا جانە بيۋدجەتتىك جوسپارلاۋ مينيسترلىگىنەن قۇتتىقتاۋ ءسوزدى ۆيتسە-مينيستر تيمۋر جاقسىلىقوۆ ايتتى. ول ەكى ەلدىڭ مەملەكەت باسشىلارىنىڭ جوعارى دەڭگەيدەگى ساپارلارمەن الماسۋى قازاقستان مەن يندونەزيا ەكونوميكالارىنىڭ ىنتىماقتاسا ءتۇسۋدى قالاعانىن كورسەتەتىن فاكتور ەكەنىن اتاپ ءوتتى.
ەكى ەلدىڭ اراسىنداعى بۇگىنگى كۇنگى ساۋدا-ەكونوميكالىق بايلانىستار تۇراقتى تۇردە دامۋ ۇستىندە. ناقتى ايتار بولساق, 2012 جىلدىڭ قورىتىندىسى بويىنشا ەكى ەلدىڭ اراسىنداعى ساۋدا اينالىمى 57,2 ملن. اقش دوللارىن قۇرادى. ال بيىلعى جىلدىڭ العاشقى جارتىسىنداعى عانا كورسەتكىش ودان ءۇش ەسە ارتىپ, 150,5 ملن. اقش دوللارى كولەمىنە جەتىپ وتىر. وسىنىڭ ءوزى قازاقستان پرەزيدەنتى ن.نازارباەۆتىڭ بىلتىرعى ءساۋىر ايىندا يندونەزياعا جاساعان رەسمي ساپارىنىڭ ىنتىماقتاستىققا يگى ىقپال ەتكەندىگىنىڭ ارقاسىندا قول جەتكىزگەن تابىس بولىپ وتىر.
سونىمەن قاتار, قازاقستاندىق ۆيتسە-مينيستر يندونەزيانى قازاقستاننىڭ وڭتۇستىك-شىعىس ازياداعى بەلسەندى جانە پەرسپەكتيۆالى ەكونوميكالىق ارىپتەسى دەپ سانايتىنىن جەتكىزدى. ءوزىنىڭ سوزىندە ول قازاقستانداعى ينۆەستيتسيالىق احۋالدىڭ بارىنشا وڭتايلى ەكەنىن, مۇنىڭ ءوزى بىرلەسكەن ىسكەرلىك ىنتىماقتاستىق ورناتۋعا بارىنشا قولايلى ەكەنىن اتاپ ءوتتى. وسىنداي تيىمدىلىكتىڭ ارقاسىندا 2012 جىلى قازاقستان ەكونوميكاسىنا 22,5 ملرد. اقش دوللارىنا تەڭ ينۆەستيتسيا تارتىلدى. بۇل 2011 جىلمەن سالىستىرعاندا 7 پايىزعا ارتىق.
يندونەزيا تاراپىنان جاۋاپ ءسوز ايتقان ەكونوميكا مينيسترىنىڭ ورىنباسارى ريزال اففاندي لۋكمان قازاقستان تارابىنا جاقسى ۇيىمداستىرىلعان قارسى الۋ ءۇشىن العىسىن جەتكىزە كەلىپ, قازاقستاندى يندونەزيانىڭ بولاشاق ۇلكەن ەكونوميكالىق ارىپتەسى رەتىندە كورگىسى كەلەتىنىن ايتتى. ءبىز قازاقستاننىڭ ەكونوميكالىق جەتىستىكتەرىن جاقسى بىلەمىز. پوستكەڭەستىك رەسپۋبليكالار اراسىندا قازاقستان ءوزىنىڭ جاقسى باستامالارىمەن بارىنشا تانىمال, دەدى ول. سونىمەن بىرگە, ۆيتسە-مينيستر جوعارى دەڭگەيدەگى رەسمي ساپارلاردىڭ بۇل ىسكە يگى ىقپال ەتەتىنىن اتاپ ءوتتى.
فورۋم بارىسىندا قازاقستان رەسپۋبليكاسى ساۋدا-ەكونوميكالىق پالاتاسى مەن يندونەزيانىڭ وسىنداي قىزمەتى اراسىندا ىنتىماقتاستىق ورناتۋ جونىندەگى كەلىسىمشارتقا قول قويىلدى. سونداي-اق, ءبىرنەشە قازاقستاندىق جانە يندونەزيالىق كومپانيالار ءوزارا ىنتىماقتاستىق ورناتۋ جونىندەگى ەكىجاقتى كەلىسىمدەرگە قول قويدى.
فورۋم بارىسىندا ءسويلەگەن شەشەندەر اراسىندا «قازەنەردجي» اسسوتسياتسياسىنىڭ اتقارۋشى ديرەكتورى رامازان جانپەيىسوۆ تە بولدى. ول 2017 جىلى قازاقستان استانا قالاسىندا بۇكىلالەمدىك مۇناي كونگرەسىن وتكىزۋگە ۇمتىلىپ وتىرعانىن اتاپ ءوتتى. وسى تاراپتا يندونەزيالىق كومپانيالاردى قازاقستاننىڭ كانديداتۋراسىن قولداۋعا شاقىردى.
جاقسىباي سامرات,
«ەگەمەن قازاقستان».
