ايماقتار • 05 ءساۋىر، 2020

ۆيرۋسپەن بەتپە-بەت: اتىراۋدىڭ دارىگەرلەرى قاۋىپتى ىندەتپەن قالاي كۇرەسۋدە؟

907 رەتكورسەتىلدى

قاۋىپتى ۆيرۋسپەن بەتپە-بەت كەلۋ وڭاي دەيسىز بە؟ اسىرەسە، قاۋىپتى دەرت جۇقتىرعان جانداردىڭ  ءومىرى ءۇشىن جانىن شۇبەرەككە تۇيگەن مەديتسينا سالاسىنىڭ قىزمەتكەرلەرى انتىنا ادالدىق تانىتۋدا. قازىر اتىراۋداعى №2 وبلىستىق اۋرۋحانانىڭ ينفەكتسيالىق ستاتسيونارىندا كوروناۆيرۋس جۇقتىرعان ناۋقاستار ەمدەلىپ جاتىر. اۋرۋحانا ديرەكتورىنىڭ ورىنباسارى ناديا ەرعاليەۆانىڭ ايتۋىنشا، دارىگەرلەر، مەدبيكەلەر مەن فەلدشەرلەر، تازالىقشىلار 27 ناۋرىزدان بەرى تاۋلىك بويى جۇمىس ىستەۋدە.

– ينفەكتسيالىق بولىمشەدە 6 دارىگەر-ينفەكتسيونيست، 3 رەانيماتولوگ بار. ءبارىنىڭ دە تاجىريبەسى مول. قازىر 9 دارىگەردىڭ ءبارى ءوز مىندەتىن  كۇنى-ءتۇنى اتقارۋدا. اۋرۋحانا اكىمشىلىگى حيرۋرگيا جانە تەراپيا بولىمشەلەرىن بوساتىپ، دەمالىس بولمەسى رەتىندە جاساقتاپ بەردى. قازىر ءبىزدىڭ دارىگەرلەر، مەدبيكەلەر مەن لابورانتتار، تازالىقشىلار ءۇشىن قولايلى جاعداي جاسالدى. ولار تاۋلىگىنە 6 رەت تاماقتانادى. تاۋلىگىنە بىرنەشە رەت دۋشقا تۇسەدى، كيىمدەرىن اۋىستىرادى، - دەيدى اۋرۋحانا ديرەكتورىنىڭ ورىنباسارى ناديا ەرعاليەۆا.  

ونىڭ ايتۋىنشا، ينفەكتسيالىق ءبولىم ءۇش ايماققا بولۋگە بولادى. ءبىرىنشىسى –تازا ايماق. ءدال وسى جەردە دارىگەرلەر ناۋقاستارعا بارماس بۇرىن ارنايى كيىم كيەدى. ونىڭ ىشىندە حيرۋرگيالىق شالبار، قورعانىش كوستيۋمى، كوزىلدىرىك، رەسپيراتور، ەكى دانادان ءبىر رەتتىك مەديتسينالىق  قولعاپ، رەزەڭكە اياق كيىم، باحيلا بار. ناۋقاستار جاتقان ءبولىم اۋماعىنا كىرگەننەن مۇنىڭ بىردە-ءبىرىن شەشۋگە بولمايدى. دەمەك، سۋ ءىشۋ دە، ءتىپتى دارەتحاناعا بارۋ دا مۇمكىن ەمەس.

ەكىنشىسى – ناۋقاستار ەم الىپ جاتقان ايماق. مۇندا دارىگەرلەر ناۋقاستارعا ەم جۇرگىزەدى. ولاردىڭ جاعدايىن تەكسەرىپ، دەنە قىزۋىن، قاتەرلى دەرتتىڭ بەلگىلەرىن باقىلايدى. سودان سوڭ  عانا تازا ايماققا شىعادى. سول كەزدە مەديتسينالىق قىزمەتكەرلەر كيگەن ارنايى كيىم جويىلادى. وزدەرى  دۋشقا ءتۇسىپ، بەتى-قولىن وڭدەۋدەن وتكىزەدى. مۇنىڭ ءبارى تازالىق ايماعىندا جۇرگىزىلەدى.

ءۇشىنشىسى –جۇمىس ىستەۋ ايماعى. بۇل جەردە ءار ناۋقاستىڭ قىزۋى،  جالپى جاعدايى تۋرالى مالىمەتتەر ەلەكتروندى جۋرنالعا جازىلادى. وزگە ايماقتارداعى ارىپتەستەرىمەن بەينەبايلانىس ارقىلى كەڭەسەدى. ءدال وسىلاي اۋىسىم سايىن قايتالانادى. دەمالىس ايماعىنداعى جاتىن بولمەلەرى قاجەتتى جيھازبەن جابدىقتالعان.

– العاشقى كۇنى وڭاي بولعان جوق. ويتكەنى، مەديتسينالىق قىزمەتكەرلەردىڭ ەشقايسىسى بۇرىن ءدال وسىنداي قاۋىپتى ينفەكتسيا جۇقتىرعاندارمەن تىكەلەي جۇمىس ىستەمەگەن. بارىمىزدە دە قورقىنىش بولدى. كەيبىرى كوز جاسىنا ەرىك بەردى. ينفەكتسيالىق بولىمدە ارنايى كيىممەن ءجۇرۋ دە قيىندىق تۋدىردى. ىستىق، قاپىرىق اۋادا جۇرگەندەيسىڭ. ءار ءسات سايىن «ينفەكتسيا جۇعا ما؟» دەگەن الاڭداۋشىلىق بولاتىنى راس. كەيىن وبلىستىق دەنساۋلىق ساقتاۋ باسقارماسى ءبىزدىڭ اۋرۋحاناعا تاجىريبەلى ەكى پسيحولوگتى جىبەردى. ولار مەديتسينالىق قىزمەتكەرلەرمەن، ناۋقاستارمەن  اڭگىمەلەسىپ، ارنايى جۇمىس جۇرگىزدى. ءبىزدىڭ ۇجىم 27 ناۋرىزدان بەرى جاڭا  رەجيممەن، جاڭا ىرعاقپەن جۇمىس ىستەۋگە بەيىمدەلدى. قازىر جۇمىسىمىز قالىپقا ءتۇستى، - دەيدى ناديا ەرعاليەۆا.

ناديا ەرعاليەۆانىڭ پىكىرىنشە، دارىگەرلەر مەن مەدبيكەلەردىڭ، لابورانتتار مەن تازالىقشىلاردىڭ اۋرۋحانادان تىسقا شىقپاعانىنا اپتادان استى. ارينە، وتباسى جىلۋىن، بالالارىن ساعىنعانى داۋسىز. الايدا، ەشقايسىسى شاعىم ايتپاعان. ءبارى دە اق حالاتتاي اپپاق ابىرويىنا داق تۇسىرمەي، ناۋقاستاردىڭ ءومىرىن ساقتاپ قالۋعا جۇمىلىپ وتىر.  

– ءبىز ازىرگە ينفەكتسيالىق ستاتسيوناردان تىس اۋماققا شىعا المايمىز. ويتكەنى، قاۋىپتى دەرتكە شالدىققاندارمەن تىعىز بايلانىستا جۇمىس ىستەيمىز. اتىراۋدا ىندەتتىڭ العاشقى وقيعاسى تىركەلگەن كۇننەن بەرى وسىندامىز. تۋىستارىمىزبەن تەلەفون ارقىلى بايلانىستامىز، - دەيدى №2 وبلىستىق اۋرۋحانا ديرەكتورىنىڭ ورىنباسارى ناديا ەرعاليەۆا.

 

جولداسبەك كوشەرباي ۇلى

اتىراۋ وبلىسى

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار