جۇمىس بارىسىندا قۇرىلىس الاڭدارىندا بارلىق قۇرىلىسشىلارعا مەديتسينالىق بەتپەردە تاعىپ ءجۇرۋ مىندەتتەلگەن. ءار نىساندا مەديتسينالىق پۋنكتتەر جۇمىس ىستەپ, جۇمىسشىلاردىڭ دەنە قىزۋى ولشەنەدى. سونداي-اق, ولار انتيسەپتيكپەن قامتاماسىز ەتىلگەن. جۇمىسشىلارعا اراقاشىق 2 مەتردەن كەم بولماۋى كەرەكتىگى ەسكەرتىلگەن. ودان بولەك, قۇرىلىس نىساندارىنىڭ اۋماعىندا COVID-19 ۆيرۋسىنان ساقتانۋ تاسىلدەرى جازىلعان ەسكەرتۋ پلاكاتتارى ىلىنگەن.
تۇركىستان قالاسىنداعى بىرقاتار قۇرىلىس الاڭدارىن ارالاپ, اتقارىلىپ جاتقان جۇمىستارمەن تانىسىپ شىققان وبلىس اكىمىنىڭ ءبىرىنشى ورىنباسارى قوسمان ايتمۇحامەتوۆ وڭىردە قۇرىلىس توقتامايتىنىن مالىمدەدى. «توتەنشە جاعدايعا بايلانىستى وبلىستىڭ باس سانيتار دارىگەرى قوسىمشا شەكتەۋلەر بەلگىلەدى. الايدا, بۇل قۇرىلىس جۇمىستارىنا ەشقانداي كەدەرگى كەلتىرمەيدى. بارلىق جۇمىسشىلارعا ءىس بارىسىندا ءتيىستى ساقتىق شارالارىن قاتاڭ تۇردە ساقتاپ ءجۇرۋ تۋرالى تالاپ قويىلىپ وتىر. بۇگىنگە دەيىن ەشقانداي كەمشىلىكتەر ورىن العان جوق. بارلىعى قالىپتى جاعدايدا», – دەدى ق.ايتمۇحامەتوۆ. بىرقاتار قۇرىلىس ماتەريالدارى شىمكەنت قالاسىنان اكەلەتىندىكتەن ازداعان قيىندىقتار تۋىنداعان. دەگەنمەن, ەكى جاقتى كەلىسىمنىڭ ارقاسىندا بۇل ماسەلە دە وڭ شەشىمىن تاپقان.
تۇركىستان وبلىسى
