بۇگىن پرەزيدەنت نۇرسۇلتان نازارباەۆ پارلامەنت V شاقىرىلىمىنىڭ 3 سەسسياسىن اشۋ بارىسىندا ەلىمىز جەتىستىكتەرىن اتاپ ءوتىپ, الدا تۇرعان مىندەتتەردى دە جۇيەلەپ شىقتى. بۇل تۋرالى «قازاقپارات» اگەنتتىگى حابارلادى.
«قازاقستان ەكونوميكاسىنىڭ قۇقىقتىق نەگىزى جاقسارىپ, سالىق جۇيەسى جەتىلدىرىلدى. شاعىن جانە ورتا بيزنەستى دامىتۋدىڭ زاڭنامالىق كوپ ماسەلەلەرى شەشىلدى. زەينەتاقى جۇيەسىن جاڭعىرتۋ, ءبىلىم بەرۋ جيناقتاۋ جۇيەسىن قۇرۋ, مەملەكەتتىك قىزمەت كورسەتۋ تۋرالى جانە باسقا دا كوپتەگەن ماڭىزدى الەۋمەتتىك زاڭدار قابىلداندى. بۇگىنگى تاڭدا پارلامەنتتىڭ قاراۋىندا وتىزعا جۋىق زاڭ جوباسى بار. پارلامەنتىمىز جوعارى ساياسي جاۋاپكەرشىلىك رەجيمىندە جۇمىس ىستەپ, حالىق وكىلى رەتىندە ءوز مىندەتىن ابىرويمەن اتقاردى. الداعى ۋاقىتتا بىرەگەي ەكونوميكالىق كەڭىستىك باعىتىن دامىتۋدا دا پارلامەنتتى ماڭىزدى جۇمىستار كۇتىپ تۇر. بەلارۋس ەلىمەن جانە رەسەيمەن بىرلەسە ءبىز ەۋرازيالىق ەكونوميكالىق وداق قۇراتىن بولامىز. 2014 جىلى ەۋرازيالىق ينتەگراتسيانىڭ جاڭا دەڭگەيىندەگى بازالىق كەلىسىم-شارتتاردىڭ باستى قۇجاتتار توپتاماسىن ازىرلەۋ اياقتالماق. وسىعان وراي پارلامەنت ءماجىلىسى مەن سەناتىنىڭ دەپۋتاتتارى زاڭ شىعارماشىلىعىنداعى وسى باعىتتاردىڭ بارلىعى بويىنشا جەمىستى جۇمىستار اتقارادى دەپ سەنەمىن», - دەدى مەملەكەت باسشىسى ءسوز ورايىندا.
ەلباسى بيىلعى جىلدىڭ قاراشاسىندا «ەكسپو-2017» حالىقارالىق كورمەسىن وتكىزۋ ءۇشىن قاجەتتى زاڭ جوباسى ەنگىزىلەتىنىن, جەر قويناۋىن ءونىمسىز الىپساتارلىق پراكتيكاسىنان قورعاۋ قاجەتتىگىن دە اتاپ ءوتتى. كەيبىرەۋلەر كەزىندە جەردى مەنشىگىنە الىپ, ءالى كۇنگە دەيىن وعان ينۆەستيتسيا قۇيماي وتىر ەكەن. سوندىقتان دا مۇنىڭ اق-قاراسىن اشۋ وتە ماڭىزدى بولىپ وتىر.
«جاھاندىق جاڭا داعدارىستىڭ مۇمكىندىگى ازايماي وتىر. ەكسپورتتىق ءونىم مەن شيكىزاتقا باعانىڭ تۇراقسىزدىعى ۇزاق مەرزىمدى ءۇردىس سەكىلدى. سىرتقى نەسيەلەندىرۋگە عانا سەنىم ارتۋ قيسىنسىز, سوندىقتان ەلدى دامىتۋدىڭ بارلىق ىشكى مۇمكىندىكتەرى مەن كوزدەرىن جۇمىلدىرۋ كەرەك. وسىعان بايلانىستى بيزنەستىڭ ءوزىن سەنىمدى سەزىنۋىنە مۇمكىندىك بەرەتىن قۇقىقتىق ورتانى قۇرۋ ماڭىزدى بولىپ تابىلادى. اتاپ ايتقاندا, مەن ۇكىمەتكە كاسىپكەرلىك كودەكستىڭ جوباسىن ازىرلەۋدى تاپسىردىم. وندا قازاقستاندىق كاسىپكەرلىك قىزمەتىنىڭ جانە مەملەكەتپەن ءوزارا ءىس-قيمىلدىڭ بازالىق ۇستانىمدارى ايقىندالۋى ءتيىس. بۇل ءبىزدىڭ بيزنەستىڭ كونستيتۋتسياسى ىسپەتتەس بولۋى قاجەت», - دەدى پرەزيدەنت. كەلەسى ماڭىزدى زاڭ جوباسى «رۇقسات بەرۋ جانە ەسكەرتۋلەر تۋرالى» ەكەنىن ايتا كەلە, وندا بيزنەس-قۇرىلىمدارعا قاتىستى كەز كەلگەن بيۋروكراتيالىق قول سۇعۋشىلىقتان ناقتى كەپىلدىكتەر جازىلۋى ءتيىس. اعىمداعى جىلدىڭ سوڭىنا دەيىن ۇكىمەتكە اتالعان جوبانى ماجىلىسكە ەنگىزۋدى تاپسىرامىن», - دەپ جۇكتەدى.
دانيار تۇيمەباي.
