تۇركىستان وبلىسى ورداباسى اۋدانىنان مايدانعا ءتورت مىڭنان استام سارباز اتتانسا, ەلگە تەك سونىڭ ەكى مىڭدايى عانا ورالعان. ياعني مىڭداعان ورداباسىلىق سارباز ەرلىكپەن مايدان دالاسىندا وپات بولىپ, باۋىرلاستار زيراتتارىندا جەرلەنگەن. بۇگىنگى ۇرپاق ەرجۇرەك اعا بۋىننىڭ ەرلىگى ۇمىتىلماس ءۇشىن اتى-جوندەرىن مەموريالدى تاقتايشاعا ورنەكتەپ جازۋ جۇمىستارىن جۇرگىزۋدە. سونىمەن قاتار, وتان قورعاۋشىلار كۇنى جانە جەڭىستىڭ 75 جىلدىعى قارساڭىندا اۋدان ورتالىعى تەمىرلان اۋىلىنداعى ورتالىق ساياباق پايدالانۋعا بەرىلمەك.
ساياباقتىڭ ماڭايى اباتتاندىرىلىپ, دەمالىس ورنىنا اينالادى. بۇگىندە تەمىرلاننىڭ كوشەلەرىنە كۇردەلى جوندەۋ جۇمىستارى جۇرگىزىلىپ, جاڭادان اياقجولدار سالىنعان. ءار كوشەگە ءتۇرلى ساندىك اعاشتار وتىرعىزىلدى. يگى ىستەرگە باستاماشى جانە ۇيىمداستىرۋشى بولىپ وتىرعان اۋدان اكىمى الىپبەك وسەرباەۆتىڭ جاڭاشىلدىعى بۇگىنگىدەي جابىرقاۋ كەزەڭدە كوپشىلىكتىڭ ەرتەڭگە سەنىمىن نىعايتىپ, قولداۋ تابۋدا. اۋدان ورتالىعىنىڭ جاڭارىپ, جاسارا ءتۇسۋىنىڭ ءبىر عانا كورىنىسى قازىبەك بي كوشەسىندەگى جايقالا ءوسىپ تۇرعان, كوزدىڭ جاۋىن الاتىن قىزعالداقتار دەپ ايتساق تا بولار. كوشەدەگى قىزعالداقتارعا قىزىعا قارايتىن تۇرعىندار الاڭسىز سەرۋەندەر كۇننىڭ الىس ەمەستىگىنە سەنىمدى.
