«قازىر ۇيدەن شىقپاي وتىرۋدىڭ ءوزى سىناققا اينالدى. وسىنداي كەزدە وقشاۋلانعان حالىقتىڭ تەلەديدار مەن ينتەرنەتكە كوبىرەك ۋاقىت بولەتىنى جاسىرىن ەمەس. سوندىقتان ءماندى, ماعىنالى دۇنيەلەردى ارتتىرۋدىڭ ماڭىزى زور. وسى رەتتە سونداي يگى ىستەردىڭ ءبىرى دە بىرەگەيى رەتىندە «ەگەمەننەن ەرتەگى» جوباسىن اتاپ وتكىم كەلەدى. كۇن سايىن «Egemen Qazaqstan» گازەتىنىڭ YouTube ارناسىنان بەرىلەتىن ەرتەگىلەر مىناداي جايما-شۋاق كۇندەردە دالاعا شىعۋعا اسىعاتىن ويىن بالاسى ءۇشىن تاپتىرماس ەرمەك بولارى ءسوزسىز» دەپ جازدى م.اشىمباەۆ.
سونداي-اق ول ۇلتتىق قۇندىلىقتاردى دارىپتەيتىن ەرتەگىنىڭ تاربيە قۇرالى ەكەنىن باسا ايتتى.
«ەرتەگىنىڭ ەرمەكتەن بۇرىن ناعىز تاربيە قۇرالى ەكەنى بەلگىلى. ويتكەنى ول ارقىلى ىزگى قاسيەتتەر مەن اسىل قۇندىلىقتار دارىپتەلەدى. ءار قازاق بىلەتىن «ەر توستىك», «التىن ساقا» ەرتەگىلەرى سوعان دالەل. شىن مانىندە, وسىنداي تاعىلىمى مول تۋىندىلاردى تىڭداپ وسكەن بالانىڭ ۇلتتىق جادىگەرلەردى جادىنا ساقتاپ, تامىرىنان ەشقاشان اجىرامايتىنى انىق»,- دەدى بەلگىلى ساياساتكەر.
ماۋلەن اشىمباەۆ جاڭا باستامانىڭ ومىرشەڭ بولۋىن تىلەپ, باسىلىم باسشىسىنا العىس ءبىلدىردى.
