اقش-تا 37 جاستاعى اۆتومەحانيك جۇرەگى توقتاپ, دارىگەرلەر ءولىم فاكتىسىن تىركەپ قويعاننان كەيىن 45 مينۋت وتكەندە, قايتا ءتىرىلىپ كەتتى. تاجىريبەلى دارىگەرلەر بولعان وقيعاعا قاتتى قايران قالدى. بۇل تۋرالى اۆس تەلەارناسى حابارلادى.
ينتسيدەنت تامىزدىڭ باسىندا ورىن العان. الايدا, ول تۋرالى مالىمەت بۇقارالىق اقپارات قۇرالدارىنا ەندى عانا بەرىلگەن. سول كەزدە وگايو شتاتىندا تۇراتىن توني يال ەسىمدى اۆتومەحانيك اۋرۋحاناعا ەس-ءتۇسسىز حالدە جەتكىزىلەدى.
سونىڭ الدىندا عانا ايەلى مەليسسا ۇيىقتاپ جاتقان كۇيەۋىنىڭ وزگەشە دىبىس شىعاراتىنىن اڭعارعان. ايەل بىرنەشە رەت ونى وياتپاقشى بولىپتى. بىراق وياتا ول ويانا قويماعان. سوسىن ول كۇيەۋىنە جاساندى دەم جىبەرىپ, جەدەل جاردەم شاقىرتقان.
دارىگەرلەر كەلە سالا يالدى تەكسەرە باستاعاندا, ونىڭ جۇرەگى كەنەت توقتاپ قالادى. بىراق دەفيبريللياتوردى قوسىپ, بىرنەشە رەت ونى ءتىرىلتىپ الۋعا ارەكەت جاساعان سوڭ توني قايتادان ومىرگە ورالعان. ال كلينيكاعا جەتكىزىلگەسىن مەحانيكتىڭ جاعدايى ناشارلاپ كەتەدى. دارىگەرلەر تاعى دا اپپاراتتىڭ كومەگىمەن ونى ءتىرىلتىپ الۋعا تالاپتانادى. الايدا, بۇل جولى ماناعى ساتتىلىك قايتالانا قويمايدى. سوسىن ولارعا ءولىم دەرەگىن تىركەگەننەن باسقا امال قالمايدى.
ءسويتىپ, مەديكتەر پاتسيەنتتى ءولدى دەپ تابادى. ولار دەنەنى مايىتحاناعا جىبەرۋگە دايىنداي باستايدى. سوڭىنان مارقۇممەن قوشتاسۋلارى ءۇشىن پالاتاعا ونىڭ جاقىندارىن كىرگىزەدى. سول كەزدە مەحانيكتىڭ ۇلى لورەنس: «پاپا, سەن بۇگىن ولمەيسىڭ!» ايقايلايدى. كەنەت قۇددى ءبىر سول ءسوزدى كۇتىپ جاتقانداي, ەر كىسى قوزعالىپ, ءوزىنىڭ ءتىرى ەكەنىنەن حابار بەرە باستايدى. ءتونيدىڭ جۇرەگى وسىلاي قايتا سوعىپ كەتەدى. بۇل ونىڭ ولگەن ۋاقىتى بەلگىلەنگەننەن كەيىن 45 مينۋتتان سوڭ ورىن الادى.
«مەن مۇنى عاجاپ نارسە دەپ ەسەپتەيمىن. سەبەبى, مۇندايدى بۇرىن ەشقاشان كەزدەستىرگەن ەمەسپىن», - دەپ مويىندايدى كارديولوگ رادجا نازير سوسىن. ونىڭ ايتۋىنشا, 20 جىلدىق ەڭبەك وتىلىندە ولگەن ادامنىڭ بۇلايشا ءتىرىلىپ كەتۋ فاكتىسى بولماپتى.
مەديكتەر قازىر قالايشا مۇنداي عاجايىپتىڭ ورىن العانىن ءتۇسىندىرىپ بەرە الاتىن ەمەس. سوڭىنان ولار يالدىڭ جۇرەگىن جان-جاقتى تەكسەرىپ شىعىپ, ودان ەشقانداي اقاۋ مەن دەرت تاپپايدى.
ارادا بىرنەشە كۇن وتكەسىن اۆتومەحانيك اۋرۋحانادان شىعىپ, ۇيىنە ورالادى. بىراق ءوزى باسىنان كەشكەن وقيعالارىنىڭ ءبىرىن دە بىلمەيتىن بولىپ شىقتى. ونىڭ ەسىندە ەڭ سوڭعى قالعاندارى تەك 4 تامىز كۇنى تۇندە ۇيىقتاۋعا جاتقانى عانا بولىپتى.
مۇرات ايتقوجا.
