كەشە قىزىلوردا قالاسىندا «نازارباەۆ زياتكەرلىك مەكتەبىنىڭ» اشىلۋ سالتاناتى بولىپ ءوتتى. بۇل تۋرالى «قازاقپارات» ءتىلشىسى حابارلادى.
ەسكە سالايىق, ەلىمىزدەگى مۇنداي ءبىرىنشى مەكتەپ 2009 جىلى استانا قالاسىندا پايدالانۋعا بەرىلگەن بولاتىن. سودان بەرگى 4 جىلدا وسىنداي رەسپۋبليكانىڭ 11 قالاسىندا 13 مەكتەپ اشىلدى. قىزىلوردادا رەتتىك سانى بويىنشا سولاردىڭ 14-ءشىسى قاتارعا قوسىلدى. ال الداعى جىلدارى دارىندى بالالارعا ارنالعان مۇنداي ءبىلىم وردالارى الماتى (ەكىنشى), پەتروپاۆل, قوستاناي, اتىراۋ جانە اقتاۋ قالالارىندا پايدالانۋعا بەرىلمەكشى.
قىزىلورداداعى زياتكەرلىك مەكتەپتىڭ 7-11 سىنىپتارىندا 2013-2014 وقۋ جىلىندا 533 دارىندى بالا وقيتىن بولادى. وقۋ ورنىندا ارنايى ىرىكتەۋدەن وتكەن 90 جوعارى بىلىكتى مۇعالىم ساباق بەرەدى.
مەكتەپتىڭ اشىلۋ سالتاناتىنا وبلىس اكىمى قىرىمبەك كوشەرباەۆ قاتىسىپ, جينالعانداردى كونستيتۋتسيا جانە ءبىلىم كۇندەرىمەن قۇتتىقتادى. ول ءوز سوزىندە وقۋ ورنىنا وبلىستىق اكىمدىك بارلىق قامقورلىقتى جاسايتىنىن اتاپ ءوتتى. «نازارباەۆ زياتكەرلىك مەكتەبىنىڭ» ءتورايىمى كۇلاش شايمەردەنوۆا وزدەرىنە جۇكتەلىپ وتىرعان مىندەتتەردىڭ دەڭگەيىنەن تابىلاتىندارىن ايتتى.
ال قۇرىلىستى جۇرگىزگەن «اق وردا» قۇرىلىس كومپانياسىنىڭ باسشىسى مەكتەپ ديرەكتورىنا جاڭا عيماراتتىڭ نىشاندىق كىلتىن تابىس ەتتى. شارا سوڭى ءداستۇرلى «العاشقى قوڭىراۋمەن» اياقتالدى.
مۇرات ايتقوجا.
