قازىرگە دەيىن بەلگىلى بولعان دەرەكتەرگە جۇگىنسەك, 42 500 تەڭگە كولەمىندەگى وتەماقى بۇيىراتىندار ۇلەسى 300 مىڭنان استام ادام شاماسىندا ەكەن. ونىڭ ىشىندە 3100 تۇلعا جۇقپالى ىندەتكە قارسى كۇرەس شارالارىنىڭ كۇشەيۋىنە وراي جۇمىستان قول ۇزۋگە ءماجبۇر بولعاندار قاتارىندا. سونداي-اق, ءوزىن ءوزى جۇمىسپەن قامتىعاندار 265 مىڭ ادام مەن 48 مىڭ جۇمىسسىز دا وتەماقىدان ءۇمىتتى. ال مەملەكەت باسشىسى قاسىم-جومارت توقاەۆ ءوز ۇندەۋىندە «توتەنشە جاعداي كەزىندە تابىسىنان ايىرىلعاندارعا ەڭ تومەنگى جالاقى مولشەرى ياعني, 42 500 تەڭگە كولەمىندە اي سايىنعى تولەم ەنگىزۋدى تاپسىرامىن. جالپى بۇل كومەكتى كەمىندە 1,5 ميلليوننان استام ازامات الا الادى» دەگەن بولاتىن. جالپى, 42 500 تەڭگە وتەماقىنى تولەۋ ءۇشىن 6 ءتۇرلى سانات بەلگىلەنگەن. جۇمىسقا قولداۋ كورسەتۋ ءۇشىن ەڭبەك جانە حالىقتى الەۋمەتتىك قورعاۋ مينيسترلىگى تاراپىنان الەۋمەتتىك تولەمدەر الۋ ەرەجەسى ازىرلەندى. بۇل جۇمىس الماتى وبىلىسىندا دا قولعا الىنعان.
-وسى جەردە اتالعان تولەمنىڭ ەڭ الدىمەن مىندەتتى الەۋمەتتىك ساقتاندىرۋ جۇيەسىنە قاتىسۋشىلار ءۇشىن بەرىلەتىنىن اتاپ ايتقىم كەلەدى. بۇل ماسەلەنى ناقتىلاۋمەن وبلىس بويىنشا قۇرىلعان 22 شتاب اينالىسىپ جاتىر. دەرەك بويىنشا, شتابقا 142 جۇمىس بەرۋشىدەن جانە 201 قىزمەتكەردەن ءوتىنىش تۇسكەن. ال شتابتىڭ قاراۋىنان وتكەن وتىنىشتەرگە قاتىستى شەشىم «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ بولىمشەلەرىنە جولدانادى. قازىرگە دەيىن 126 ادام 42 500 تەڭگە كولەمىندەگى الەۋمەتتىك تولەمدى الدى, - دەيدى الماتى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى زايدا ءىلىمجانوۆا.
