جالپى, جالعان اقپاراتتى جىلدام تاراتاتىن جەلىلەر اراسىندا WhatsApp توپ باستاپ تۇر ەكەن. ورىنسىز قالجىڭ مەن تۇرپايى ءازىلدىڭ سوڭى تۇتاس اۋىلدى دۇرلىكتىرگەن جاعداي ءجيى قايتالانىپ جاتقانى جاسىرىن ەمەس. ال قازىرگىدەي كارانتين ۋاقىتىندا جۇقپالى ىندەتتىڭ تارالۋى مەن ناۋقاستارعا قاتىستى دالەلدەنبەگەن اقپارات تاراتىپ, ءبولىسۋ ءتىپتى اۋىر قىلمىس بولىپ سانالادى. ءدال وسى جاعداي الماتى وبلىسىندا بىرنەشە مارتە قايتالاندى. اۋەلگىدە قاپشاعاي قالاسىندا قىزمەت ەتەتىن دارىگەر كوروناۆيرۋستىڭ تارالۋى جايىندا ازىلدەيمىن دەپ وپىق جەگەن بولاتىن. وتكەندە قاراتال اۋدانىنىڭ ورتالىعى ۇشتوبە قالاسىنان ءىندەت وشاعىنىڭ انىقتالعانى جايىندا جازبا جاريالاعان اۆتور دا ۇستالىپ, ايىپتى بولدى. جاقىندا عانا جامبىل اۋدانىنا قاراستى ۇمبەتالى اۋىلىنىڭ 31 جاستاعى تۇرعىنى WhatsApp ارقىلى حابار تاراتىپ, وڭىردەگى قاينازار مەن ۇزىناعاش اۋىلدارىندا ەكى ادامنىڭ كوروناۆيرۋس جۇقتىرعانى تۋرالى جالعان اقپاراتجولداپ جىبەرگەن. وكىنىشكە قاراي, بۇل اقپاراتتار دارگەرلەردىڭ جۇمىسىنا كادىمگىدەي كەدەرگى كەلتىرەدى ەكەن. ويتكەنى, ىندەت جايلى تاراعان قانداي دا بولماسىن حابار ءبىرىنشى كەزەكتە تەكسەرىلەدى. اقپاراتتا ايتىلعان مەكەنگە ارنايى بريگادا بارىپ, جاعدايدى ساراپتاپ, ىندەت وشاعىنىڭ بار-جوعىن ناقتىلاپ وتىرادى. ال مۇنىڭ قانشالىقتى قولايسىزدىق اكەلىپ, توسىن شىعىنعا باتىراتىنىن باعامداي بەرىڭىز...
قازىر وبلىستىڭ بارلىق اۋدانىنداعى ورتالىق اۋرۋحانالاردىڭ جانىنان كوروناۆيرۋسقا قاتىستى جاريالانعان جالعان اقپاراتتى انىقتايتىن جەدەل توپ قۇرىلعان. بۇل توپ قانداي ءبىر حابار تاراعان جەردى جەدەل انىقتاپ, ىندەت بەلگىسى بايقالا قالعان جاعدايدا الدىن الۋ شارالارىن جاسايدى ەكەن.
- كوروناۆيرۋس تۋرالى قانداي دا بولسىن جاريا بولعان اقپاراتتى جەدەل ءارى مۇقيات تەكسەرۋگە مىندەتتىمىز. بىراق, جالعان اقپارات دارىگەرلەردىڭ جۇمىسىنا ايتارلىقتاي كەدەرگى كەلتىرەدى. ويتكەنى, ەل اراسىندا دەنساۋلىق ساقتاۋ سالاسىنا قاتىستى قانداي دا ءبىر اڭگىمە شىققان جاعدايدا, ءبىز ونى تەكسەرىپ, ونىڭ قايدان شىققانىن انىقتاپ ءبىلۋىمىز كەرەك. ول ءبىزدىڭ وسىعان دەيىن اتقاراپ تاستاعان جۇمىسىمىزدى قايتا قاراپ, تەكسەرۋگە ماجبۇرلەيدى. ياعني, ءبىز مامانداردىڭ باسىم بولىگىن وسى جۇمىسقا تارتامىز دا, دارىگەرلەر اتقارۋى ءتيىس نەگىزگى جۇمىستار كەيىنگى قالادى. سوندىقتان ازاماتتاردىڭ تەك تەكسەرىلگەن, رەسمي انىقتالعان اقپاراتتارعا عانا جۇگىنگەنى ءجون بولار ەدى, - دەيدى الماتى وبلىسى دەنساۋلىق ساقتاۋ باسقارماسىنىڭ باسشىسى باۋىرجان ىسقاق.
ايتپاقشى, وتىرىك-راسى انىقتالماعان كەز-كەلگەن حاباردى كوپشىلىككە تاراتۋ, قوعامدىق ورتادا دۇربەلەڭ تۋعىزىپ قانا قويماي, زاڭ الدىنداعى جاۋاپ بەرۋگە ءماجبۇر ەتەدى. مىسالعا, توتەنشە جاعداي كەزىندە جالعان اقپارات تاراتۋ فاكتىءسى قىلمىستىق كودەكستىڭ 274-بابىنىڭ 4-بولىگى بويىنشا جازالانادى. ياعني, جەكە تۇلعانىڭ جالعان اقپارات تاراتقان انىقتالسا, وعان ءۇش جىلدان 7 جىلعا دەيىنگى مەرزىمگە قۇقىن شەكتەۋ نەمەسە باس بوستاندىعىنان ايىرۋعا دەيىن ۇكىم كەسىلەدى.
