ىندەتتى جەتىسايعا «جەتكىزگەن» ازاماتشا 21 ناۋرىز كۇنى نۇر-سۇلتان قالاسىنان پاۆلودار-قىزىلوردا باعىتىنداعى پويىزبەن شىعىپ, قاراعاندى قالاسىنا توقتاعان. التى ساعات ۆوكزالدا وتىرعان ول, ءارى قاراي پەتروپاۆل – قىزىلوردا باعىتىنداعى پويىزبەن شىمكەنت قالاسىنا كەلگەن. ءسويتىپ جەكە كولىكپەن جەتىساي قالاسىنا جەتكەن. ناۋرىزدىڭ 27-ىنەن قىزۋى كوتەرىلىپ اۋىرعان ول اۋرۋحاناعا 30 ناۋرىزدا قارالعان. العاشقىدا ناۋقاسپەن قارىم-قاتىناستا بولعان 16 ادام انىقتالعان-دى. كەيىن بۇل سان وسە تۇسكەن. ناۋقاسپەن بايلانىستا بولعان ادامداردى تەكسەرۋ بارىسىندا, وتباسىنىڭ 3 مۇشەسىنىڭ ساراپتاماسى وڭ ناتيجە بەردى.
ال COVID-19 ساراپتاماسى وڭ قورىتىندى بەرگەن بەسىنشى جاعداي الماتى قالاسىنا ىسساپارمەن بارىپ كەلگەن ازاماتتان انىقتالدى. تۇركىستان وبلىسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى نۇربەك نىشانوۆ قازىرگى تاڭدا ناۋقاستار تولىق دارىگەرلەردىڭ باقىلاۋىنا الىنعانىن, جاعدايلارى قاناعاتتانارلىق دارەجەدە ەكەنىن حابارلادى. قارىم-قاتىناستا بولعان بارلىق ادامعا ستاتسيونارلىق وقشاۋلاۋ شارالارى جۇرگىزىلگەن. ءتيىستى حاتتاماعا سايكەس, ەمدىك شارالار جاسالۋدا.
تۇركىستان وبلىسىنىڭ اكىمى ومىرزاق شوكەەۆ وڭىردە ورىن العان جاعدايعا بايلانىستى تۇرعىندارعا ۇندەۋ جولدادى. ەپيدەميولوگ ماماندار تاراپىنان تىركەلگەن اۋرۋ وشاقتارىندا زارارسىزداندىرۋ, بايلانىستا بولعانداردى تابۋ جانە وقشاۋلاۋ بويىنشا پاندەمياعا قارسى ءىس-شارالار ۇيىمداستىرىلعان. ينفەكتسيا تابىلعان جەتىساي اۋدانىنداعى ابدىحالىق اۋىلى مەن اۋدان ورتالىعىنداعى شاعىن اۋداندا كارانتين جاريالاندى. وبلىستىڭ وزگە اۋداندارىنان ينفەكتسيونيست جانە رەانيموتولوگتاردان قۇرالعان 6 بريگادا جەتىسايعا اتتانعان. وبلىستىڭ باس ينفەكتسيونيست دارىگەرى اۋداندا وسى شارالارعا باسشىلىق ەتەدى. سونداي-اق وبلىس اكىمى اۋدان اكىمىنە جانە ءتيىستى ورگاندارعا ەلدى مەكەندەر شەكاراسىنا بلوك-بەكەتتەر قويۋدى تاپسىرعانىن مالىمدەدى. توتەنشە جاعداي رەجىمىن بۇزعان ازاماتتار زاڭ اياسىندا جاۋاپقا تارتىلاتىنىن ەسكەرتتى.
ايتا كەتەلىك, وبلىستا Covid-19 كوروناۆيرۋس ينفەكتسياسىنان قولايسىز ەلدەردەن كەلگەن 495 ادام مونيتورينگتىك باقىلاۋعا الىنعان. ونىڭ 9-ى 1 «ا» ساناتىنداعى, ال 486 ادام 1 «ب» ساناتىنداعى ەلدەردەن كەلگەن.
تۇركىستان وبلىسى
