ىقىلىم زاماننان كۇنى بۇگىنگە دەيىن جالعاسىپ كەلگەن قازاق حالىق ەرتەگىلەرىنىڭ ءدال قازىر قاجەتتىلىگى ءتىپتى كۇشەيىپ, ءمان-ماعىناسى ارتىپ وتىرعانداي. ولاي دەيتىن سەبەبىمىز, الاپات دەرتتەن امان قالۋ ءۇشىن جان ۇشىرعان ادامزات بالاسى ءالىپتىڭ ارتىن باعىپ, ءبىر-بىرىنەن الىستاپ, وقشاۋ وتىر. ءدال وسىنداي سىن ساعاتتا گازەتىمىز تالعامپاز كىشكەنتاي تىڭدارماندار ءۇشىن «ەگەمەننەن – ەرتەگى» جوباسىن كوپشىلىك نازارىنا ۇسىنىپ وتىر. مۇنداعى ماقسات – ۇيدە وتىرعان جاس وسكىننىڭ كوڭىلىن اۋلاۋ, قۋانىش سىيلاۋ. ەرتەگىنى «Egemen Qazaqstan» گازەتىنىڭ YouTube ارناسىنان كۇن سايىن تىڭداي الاسىزدار. نۇر-سۇلتان قالاسى اكىمدىگىنىڭ «قۋىرشاق» تەاترىنىڭ ءارتىسى, مادەنيەت سالاسىنىڭ ۇزدىگى سالتانات ماعزىم ەرتەگىلەردى تۇرلەندىرە وقىپ شىقسا, جوبانى اتقارۋعا سۋرەتشى-كاريكاتۋراشى ايداربەك عازيز, گازەت تىلشىلەرى ايا ءومىرتاي, جانبولات كەنجەعۇل اتسالىستى.
«ەرتەگى بالانى مەيىرىمگە ۇندەيدى. تاپقىرلىققا ۇيرەتەدى. ەلىمىزدىڭ باس گازەتى «Egemen Qazaqstan» مەن «قۋىرشاق» تەاترىنىڭ بىرلەسكەن جوباسى ۇرپاق ءۇشىن باستى بايلىق. ءدال قازىرگى قيىن ءساتتى بىرلەسە جەڭىپ شىعاتىنىمىز ءسوزسىز. مۇنداي جوبالاردى قولداۋىمىز كەرەك, از دا بولسا ۇلەسىمدى قوسىپ وتىرعانىما قۋانىشتىمىن», دەيدى نۇر-سۇلتان قالاسى اكىمدىگى «قۋىرشاق» تەاترىنىڭ ءارتىسى سالتانات ماعزىم.
كوركەمدىك ەستەتيكالىق قۋاتىمەن بىرگە تاربيەلىك ءمانى زور بولىپ كەلەتىن قازاق حالىق ەرتەگىلەرى ادەبيەتىمىزدىڭ اسىل قازىناسى. تۇرمىس-سالتىمىزداعى ءومىر شىندىعى ەرتەكشى بايانداعان اڭگىمەدە جاڭا ءبىر تۇرپاتقا يە بولىپ, عاجايىپ كورىنىسكە اينالىپ, كوركەمدەلە تۇسەدى. قازاق راديوسىنداعى «ەردەن اتانىڭ ەرتەگىلەرى», «زامزاگۇل اجەنىڭ ەرتەگىلەرى», «كەشكى ەرتەگىلەر» دەگەن اتپەن ءۇزىلىسسىز بەرىلىپ تۇراتىن ىزگىلىكتى ءداستۇردىڭ جالعاسىنداي بولعان شاعىن جوبامىزدى كىشكەنتاي تىڭدارماندار قۋانا قابىل الادى دەگەن ۇمىتتەمىز!
